Text copied!
CopyCompare
Se kaling peokit - Genesis

Genesis 13

Help us?
Click on verse(s) to share them!
1Nesayo si Abram lekat te Ehipto aw limikò sikandin doton te Negeb sakop te Canaan sipat te esawa din aw kedakel te kedònan din. Timaking heman si Lot kandin.
2Ontò meyaman si Abram, so medita se karniro din, kambing, aw baka, aw dakel heman se selapì aw bolawan din.
3Pegkesayo din lekat te Negeb, mig-alin-alin sikandin pesalo doton te Betel lamig dimateng sikandin doton te tapay ogpeanan din kidoen te tengà-tengà te Betel aw Ai.
4Yan heman se tapay din ininangan te sonoganan te ayam-ayam. Todà sikandin migsimba te Timanem kidoen.
5Nayan, timaking heman si Lot ki Abram, aw doen heman menge pamilya din, aw sineligan din, aw menge karniro, kambing, aw baka din.
6Yan kenà botong se tanà loyawan te kedita te ayam-ayam te didowa dan aw megsebad dan, so pelaban medita se ayam-ayam dan.
7Yan se doun te migbolaw se menge telediyaga i Abram aw menge telediyaga i Lot. (Doen heman menge tege Canaan aw tege Perisi mig-ogpà pa kidoen.)
8Yan minikagi si Abram diyà ki Lot, “Eked a keibeg aw megbolaw ki aw megbolaw heman se menge telediyaga ta, so anak ko sikona.
9Yan mèpiya aw megpeteniyay ki den. Na, pegpeatap-atap ka den te kebelad te tanà seini. Aw pemellien no se tanà lenged te bibang, malin a doton te tanà lenged te kowanan. Aw pemellien no se tanà lenged te kowanan, malin a doton te tanà lenged te bibang.”
10Migpeatap-atap si Lot, aw kinità din te mèpiya se kebelad te tanà medapag te wayeg te Jordan taman te lonsod te Soar, so dakel se wayeg kidoen iling te kekeyowan intanem te Timanem, aw iling te Ehipto. (Neinang iyan te wedà pa bàti te Timanem se lonsod te Sodoma aw Gomora kidoen medapag te wayeg te Jordan.)
11Yan pinemallì i Lot se kebelad te tanà medapag te wayeg te Jordan, aw minalin sikandin lenged te eglibtakan. Yan se pegpeteniyay te didowa dan.
12Mig-ogpà pa si Abram doton te Canaan, meneng minalin si Lot doton te menge lonsod kidoen medapag te wayeg te Jordan, aw mig-ogpà sikandin medapag te lonsod te Sodoma.
13Ontò medaet se eg-inangen te menge tege Sodoma. Ontò medaet se salà eg-inangen dan diyà te Timanem.
14Penga te pegkesayo i Lot, minikagi se Timanem diyà ki Abram, “Pegpeatap-atap ka den doton te kebelad te tanà pengkey kenan se kitaen nikaw.
15Se kebelad te tanà kitaen nikaw, yan se ibegay ko diyà kamno aw menge bowad-bowad nikaw te wedad temanan.
16Inangen ko medita se bowad-bowad nikaw igsà eked dan kebilang. Labi pa mola se pegbilang te menge napò te tanà.
17Nayan, peglegeb ka den doton te kebelad te tanà, so yan se ibegay ko diyà kamno.”
18Penga niyan, minalin si Abram, aw mig-ogpà sikandin kidoen medapag te menge olayan i Mamre doton te Hebron, aw mig-inang sikandin te sonoganan te ayam-ayam kidoen amon megsimba sikandin te Timanem.