Johane 12:15-40

¹⁵“Zioŋte otâ, go mi hâwicguoc; manakic, ŋicwofuŋgezi fakac, doŋgi motecnere âsio fakac.”

¹⁶Dâŋ i motecfâc‐ticne jaŋe mârâc mi mana‐hâmombiŋ. Juku Jesu sambâŋ tatamac‐ticnao risie feme dâŋ irec manasurâ ʒiŋuc mana tarambiŋ: I ere qâreŋkekicnere sâc ijaha ecnembiŋ.

¹⁷Jesu e Lazaro wiracneme ʒâŋeruŋkonec wahame honembiŋ ŋic guru sâko i jaŋe gâcne dâŋ binaŋ ejarembiŋ.

¹⁸Eme mâsi irec biŋe manambiŋte bocjahazi hatao ra bâfuambiŋ hâcne.

¹⁹Eme farisaio ŋic jaŋe jaŋackoaŋ ʒiŋuc muhuc muc manac embiŋ: “Manaŋgopieŋ, ŋoŋe dâŋgie bâipiehapie ŋic mâmâc sasawa erao qohota‐fâreŋgopieŋ ine!”

²⁰Judaŋic hombaŋte Jerusalem haeo fisimbiŋ jaŋere ŋondeŋko Grikŋic qâpuc moc moc mâmâc juhuc Anutu mai ecnembiŋ.

²¹Eme jaŋe Filipo Besaida haeonec Galilaia mâreŋkonec erao rarâ ʒiŋuc âzâcnembiŋ: “Ŋicbomboŋ, nâŋe Jesu honezo muŋgopeneŋ.”

²²Mupie Filipozi Anderea âzâcneme mâmâc Jesurao rarâ dâŋ i âzâcnepic.

²³Âzâcnepire ʒiŋuc muwec: “Ŋic Fâri Wâtuŋne huriri qâreŋ‐ticne fua tâcneocte ʒâfo maickekac hâcne.

²⁴Jâmbomac jâmbâŋ ŋazape mananiŋ, jacgoŋ hândâŋ e mâreŋko mi hurâ mâc foku foocmu, mâreŋte nânâ eme ine fârine bocjaha fuaocmu.

²⁵Moc e juju‐ticne âgo ecneme sifuckecneocmu, moc e mâreŋko juhuc juju‐ticne râsi ecneme juju sanaŋte biŋe focneocmu.

²⁶Moc e nore kiŋaŋ qaqa ezo murâ bâjâpecnuzejec, eme no jupemuoa kiŋaŋ qaqa‐nanezi juocmu. Moc e no kiŋaŋ qanareocmu, e Mamac‐nanezi erickeocmu.

²⁷Ʒi maŋnane fâfârerâ ɋarac ɋarac qakac. Ehame weniŋuc mupemu? ‘Mamac go dameŋ maicnukac i bâsuec’ iŋuc mupe? Misac, iŋuc aricne, dameŋ i hâcne maicnuocte mukicne.

²⁸Irec Mamac go mutec ʒâŋe biŋegere huriri qâreŋ fua tâcnezejec.” Mume sambâŋkonec dâŋ ʒiŋuc wahawec: “I huriri qâreŋ‐ticne fuawec erâ huriri qâreŋ jaha fua raocmu.”

²⁹Eme ŋicguru domambiŋ jaŋe manarâ mumbiŋ, “Ɋuŋ hejec.” Â gâcnezi mumbiŋ, “Aŋelo moczi dâŋ âzâcnejec.”

³⁰Mupie Jesuzi micjeŋicko rorâ ʒiŋuc jazawec: “Dâŋ i nahacnere mâcne, ŋoŋere erâ fuajec.

³¹Ʒi mâreŋko ââke râwiŋ dameŋ maickekacte mâreŋ ʒirec ŋicbomboŋ e hetuŋkezo.

³²Mâreŋkonec bâfeŋnupie mâreŋ sâc ŋic fârec‐jopape norao fisiniŋmu.”

³³I hâmoc weniŋucne hâmoocmu irec dâŋ suŋsuŋne iŋuc muwec.

³⁴Mume ŋicguru domambiŋ jaŋe ʒiŋuc âzâcnembiŋ: “Nâŋe mitio dâŋ kecʒiŋuc manaeŋgopeneŋ: Kristo e mi hâmohuc juraʒihuc juocmu. Eme goki wemocte ʒiŋuc mukic: ‘Ŋic Fâri Wâtuŋne e bâfeŋneniŋmu’? Ŋic Fâri Wâtuŋne e mo?”

³⁵Eme Jesuzi dâŋ ʒiŋuc bâtikie‐jarewec: “Ʒoctamac e ŋondeŋ‐ŋeŋicko dameŋ bembeŋne mac tamaeocmu. Irec dapâczi foŋŋopazacte ʒoctamac foŋarehame e maickerâ junʒepieŋ. Moc e dapâcko rahuc hata mi hone taraocmu.

³⁶Irec ʒoctamac foŋarehame maŋzi sakarehuc kikefuŋfâc‐ticne enʒepieŋ.” Jesu e dâŋ iŋuc murâ ra soŋsoŋko juwec.

³⁷Jesu e mâsi fuŋne ʒâŋe fai‐jeŋicko bame hone‐bipiehuc sifu erao mi roweckembiŋ.

³⁸I porofete Jesajare dâŋ sanaŋkeocte iŋuc embiŋ. E dâŋ ʒiŋuc qâreŋkewec: “Wofuŋ, biŋedâŋge mupene mozi mana ʒakieekac? Â Wofuŋte me i morao fua taniŋkeekac?”

³⁹Erâ Jesure dâŋ mi mana ʒakiembiŋ i Jesajare dâŋqâreŋ moc fokacte embiŋ ine kecʒiŋuc:

⁴⁰“E ʒâŋe‐jeŋic tiŋtuŋ barâ maŋjeŋic bâzickewec, jaŋe ʒâŋezi wiac hone taranʒipiŋte, â maŋzi wiac mana taranʒipiŋte, ehuc maŋjeŋic bârisiepie bâpiaŋ‐jopazipore.”