San Juan 12:15-40

¹⁵Amo ximawikah akimeh chanchiwah Sión; xikitakah nomorey ya walmuika, tlejkotiwits ipan se burrojtsi.

¹⁶Itech non tonati itlamachtijkawah mach okajsikamatkeh tlan kijtosneki tlan otlamochi, pero satepa ijkuak Jesús oyá ilwikak, itlamachtijkawah okualilnamikeh yoijkuilitoka nochi tlan Ye panoskia.

¹⁷N tlakah non okatkah iwan Jesús ijkuak okínotski n Lázaro ijtik miketékochtli iwa okiyoliti de kan mikemeh, otetlapowijtinemiah tlan okitakeh.

¹⁸Yika, miakeh okinamikitoh n Jesús, porke okimatkeh okichi non milagro.

¹⁹Pero n fariseos okimoliayah: —Xikitakah, nochteh n tlakah yawih inawak Jesús. Iwa tejwah amitla tiweleti tikchiwah.

²⁰Itech non ilwitl de Paskua noiwa owalajkeh sikimeh tlakah de Grecia akimeh noiwa okiweyijkachiwakoh Dios.

²¹Yejwah omijkuanijkeh inawak Felipe non okatka de Betsaida, iwa okitlatlautijkeh: —Tlakatl, tiknekih tikitaskeh n Jesús.

²²Felipe okitlajtoltito n Andrés; iwa san ken ome okitlapowitoh n Jesús.

²³Ijkuakó Jesús okinmili: —Yoajsiko n ora ijkuak nechweyijkachiwaskeh Ne Non onimochi ni tlakatl.

²⁴De milajka, de milajka nomechilia, tla se kitooka se xínachtli iwa non xínachtli amo miki, non xínachtli mokawas iselti iwa amitla kitemakas. Pero tla non xínachtli miki, kitemakas miak itlakilo.

²⁵Akin amo kitemakas iyolilis nonawak, kipolos ijkuak mikis. Pero akin kitemakas iyolilis nonawak itech nin tlaltíkpaktli amo kipolos yej kipias yolílistli non amayik tlami.

²⁶Akin kinekis nechtekitilis, mawiki nowa, iwa kan Ne niyetos, noiwa ompa yetos. Tla aka nechtekitilia, Notajtsi kiweyijkatlalis.

²⁷'Axa satlawel nimoyolkokoa, ¿Iwa tlan nikijtos? ¿Mach weletis nikilis: “Notajtsi, techmakixti itech nin tlaijyowílistli”? Amó, mach weletis ijkó nikilis porke saman para ye Ne oniwala.

²⁸Notajtsi, maweyijkachito Motoka. Ijkuakó omokak se tlájtoli de ilwikak: —Yonikweyijkachi iwa oksepa nikweyijkachiwas.

²⁹N tlakah non ompa okatkah, ijkuak okikakeh n tlájtoli, okijtoayah, otlatékuinki, iwa oksikimeh okijtoayah: —Se ángel okitlapowi.

³⁰Ijkuakó Jesús okinmili: —Non tlájtoli amo omokak para Ne manikkaki, yej para nomejwah xikkakikah.

³¹Yoajsiko n tonati ijkuak kintlajtlakoltiskeh n tlaltikpaktlakah, iwa axa kualkixtiskeh akin kinawatia nin tlaltíkpaktli.

³²Iwa ijkuak nechajkokuiskeh itech krus, nochteh nikinyoltilanas para mawikih nonawak.

³³Ijkó Jesús okinmajsikamatilti kenijki mikiskia.

³⁴N tlakah okinankilijkeh: —Itlajkuilol Dios kijtoa Cristo nochipa yolitos. ¿Kenijki Te tikijtoa non omochiwako tlakatl moneki makajkokuikah? ¿Akin ye akin omochi tlakatl?

³⁵Ijkuakó Jesús okinmili: —San kanaj kech tonati niyetos nomowah. Xinemikah ika notlawil axa ken ok nonweletih, amo kichiwa nomechajsiti n tleyuálistli. Porke akin nemi itech tleyuálistli amo kimati kan ik yawi.

³⁶Axa ken ok nonkipixtokeh n tláwili, xikkawilikah mamoskaltih non tláwili itech nomoyolo, ijkó nonyetoskeh tepilwah de non tláwili. Ijkuak Jesús okimijto ninteh tlájtolteh, oyá okinmotlaatilito.

³⁷Maya Jesús okinchi miakeh milagros inmixpah n judíojteh, amo okineltokayah.

³⁸Ijkó omochi tlan okijto n profeta Isaías: Noteko, ¿akin okineltokak motlajtol non tejwah otiktematiltijkeh? ¿Akin inawak yomonexti iweletilis n Toteko?

³⁹Yejwah mach otlaneltokayah, Isaías noiwa okijto:

⁴⁰Dios okintokti ayakmó matlachiakah iwa okinyoltlakuawaltih, para amo matlachiakah ika inmixtololowah nion mateajsikamatikah ika inyolo, nion mamoyolkopakah nonawak, para manikimpajti.