San Juan 12:15-40

¹⁵Le'e chonxenḻe Diosen' ciuda Jerusalénṉa', bi žeble; ḻe ṉa', ba za' Rey c̱helen' žie' to burr dao'.

¹⁶Na' beṉe' ca' zjanaque' Jesúsen' txen gague cate gosejni'ide' chac con can' bosozoj ben' goso'e xtiža' Diosen' cani'. Beyož got Jesúsen' na' goc yogo' da' ca' gosaquen' cont bla'lagüe ḻe Jesúsen' naque' beṉe' zaca' juisyw, cana'ch jasyeza'laže' diža' ca' da' zjanyoj c̱he Jesúsen' na' gosejni'iden'.

¹⁷Beṉe' ca' besele'e cate' Jesúsen' boḻ güiže' Lázaron' na' bosbane' ḻe' cont bechoje' ḻo' ban' gosoe'lene' beṉe' ca' že' ḻo ciudan' diža' can' goquen'.

¹⁸Na' da'nan' beṉe' zan jaseleze' Jesúsen' da' ba gosende' diža' c̱he yeḻa' guac dan' bene' bosbane' Lázaron'.

¹⁹Nach beṉe' fariseo ca' gose' ḻježe': ―Ba chle'ele bibi chac bi goncho. Yogo'ze beṉe' ba chosozenague' c̱he'.

²⁰Na' zjalen to c̱hope beṉe' griego beṉe' ca' ja'aque' gosonxene' Diosen' ḻo ḻṉin'.

²¹Na' beṉe' ca' besežine' gan' zoa Felipen' ben' nac beṉe' Betsaida ga mbane distritw Galilean', na' gose'ene': ―Si'xenšco', chaclaže'to' güe'lento' Jesúsen' diža'.

²²Na' Felipen' gwyeje' jaṉe'e Andrésen' nach choptie' jaseže' Jesúsen' ca'.

²³Nach Jesúsen' gože' ḻegaque': ―Ṉa'a ba bžin hor gac yogo'ḻoḻ da' cheyaḻa' gac cont la'lagüe naca' beṉe' zaca' juisyw.

²⁴Žia' to da' zejen, še to trigon' bi yexiṉjen cate' lažon' ḻo yon', con chega'aṉcze tozen; perw še yexiṉjen na' yelan', da' zan trigon' goṉen.

²⁵Note'tez beṉe' con chi' yic̱hje' gac güen c̱hegaque' yežlio nga, beṉe' ca' yesebiaye'e. Na' note'teze beṉe' chesene' bibi nonen še bi gac c̱hegaque' yežlio nga, šjasyezoe' len Diosen' toḻi tocaṉe.

²⁶Na' note'tez beṉe' chesaclaže' yesone' xšinan', cheyaḻa' yesejnilaže' neda' na' yosozenague' c̱hia'. Na' gan' soa' neda' ḻecze na' yesezoa beṉe' ca' yeson xšinan'. Note'tez beṉe' yeson xšinan', X̱an' gone' cont yesacxene'.

²⁷’Ba chžaglagua' ḻo' yic̱hjlažda'oguan'. ¿Chaquele ṉabda' X̱an' yosle' neda' ḻo da' ca' ba zoa gac c̱hia' ṉa'a? Bitw gona' ca', ḻe za'a cont gac c̱hia' yogo' da' ca'.

²⁸Nach boḻ güiže' Diosen', gwne': ―X̱a', ben len neda' cont yesacbe'e beṉe' naco' beṉe' zaca' juisyw. Beyož gwne' ca' na' gwṉe Dios ben' zoa yaban', gwne': ―Ba bena' len le' cont chesacbe'e beṉe' naca' beṉe' zaca' juisyw na' za' goncha' ca' yeto.

²⁹Na' zan beṉe' ca' že' na' gosende' dan' gwna Diosen' na' gosene' gwzion' gwṉe. Na' yebaḻe' gosene': ―To angl gwṉe' ḻe'.

³⁰Na' Jesúsen' gwne': ―Diosen' gwṉe' neda' zižje gague cont ṉezda' neda' chzenague' c̱hia' san cont ṉeze le'e.

³¹Ba bžin ža Diosen' c̱hogbi'en' c̱he beṉe' ca' bi chesejḻe'e c̱hia'. Na' ba bžin ža Satanás dan' chnabia' da' x̱igüe' ca' na' dan' chnabia'te beṉe' ca' bi chosozenag c̱he Diosen' solao ṉit yeḻa' chnabia' c̱hen.

³²Na' cate' yeseḻise' neda' to ḻe'e yag, cana'ch gona' cont zan beṉe' že' doxen ḻo yežlion' yesejnilaže' neda'.

³³Gwne' ca' cont goseṉezde' yesot beṉe' ḻe' yosode'ene' to ḻe'e yag cruz.

³⁴Na' beṉe' ca' že'na' clele gosejni'ide' dan' gwnen' na' gose'e ḻe': ―Ba beneto' can' ža Xtiža' Diosen' da' nyojen, na' ṉezeto' žan Cristo ben' seḻa' Diosen' yedeṉabi'e nación c̱hechon' soe' toḻi tocaṉe. Na' le' ¿bixc̱hen' žo' naco' beṉe' gwseḻa' Dios goljo' beṉac̱h na' žo' yesote' le' to ḻe'e yag cruz še ca'? ¿Nox naco' šaca'?

³⁵Nach Jesúsen' gože' ḻegaque': ―Yešlož da'ozen' soa' len le'e, neda' nsa' be'ni' c̱he yic̱hjlažda'olen'. Ḻe gwzenag c̱hia' šlac ṉe' de latje šo' be'ni' c̱hian' ḻo' yic̱hjlažda'olen', cont bi cuiayi'lenḻe da' mal dan' chnabia' le'e. Ben' chda gan' nac c̱hoḻ bi chacbe'ede' gan' zeje'. Can' naquen len le'e.

³⁶Ḻe šejnilaže' neda' šlac ṉe' zoa' len le'e, cont šo' be'ni' c̱hian' ḻo' yic̱hjlažda'olen'. Gwde gwna Jesúsen' ca' beze'e na' bcuaše'de' ḻegaque'.

³⁷Na' ḻa'czḻa' beṉe' Israel gualaž c̱heto' ca' besele'ede' ben Jesúsen' da' zan yeḻa' guac, zane' bi gosejnilaže'ne'.

³⁸Goc can' bzoj da' Isaíasen' ben' be' xtiža' Diosen' cani', gwne': X̱anto', nono chejḻe' diža' dan' chyix̱jue'eton', na' nono chesacbe'e blo'o yeḻa' guac c̱hion'.

³⁹Bi goc yesejḻe'e, ḻe goc c̱hegaque' can' ža yeto dan' bzoj da' Isaíasen', žan:

⁴⁰Diosen' bene' cont bi gosejni'ide' na' cont zjanaque' beṉe' güedena. Ba bene' cont chesele'ede' na' bi zjaṉezde' bi zejen, na' bi chesacbe'ede' ḻo' yic̱hjlažda'ogaque' bi zejen dan' chlo'ede' ḻegaque'. Šaca' chesejni'ide' na' chesacbe'ede' bi zejen dan' chlo'eda' ḻegaque', ba besyetiṉjde' na' ba beca'a xtoḻa'gaquen' šaca'.