John 12:15-40

¹⁵“Zion di vefa, ori ga re! Ve kumo yi kini baegasa donkey mida fafau keu rido.”

¹⁶Ouresi ini usi dina vene mina tau diba de niyadi. Idu Iesu dadi rae resi vabara moiyori, bi mokeyadi beika tau ina rofu bura reyadi ma beika tau ina rofu reyadi.

¹⁷Iesu sa amegamadi Lazarus guri ideri raka nisi muyena gutuna edadiyo ma veyadi vene tau gade yaku toga niokugamadi.

¹⁸Mina dada amiye tau gade Iesu baku regika neyadi—mina rebe reyo neideyadi dada.

¹⁹Ye Pharisee vene yaku iniye iniye niyadi, “Vefa, una bi ruru rei kava resifa. Ye vefa gokai mina kono tora noibanu vene tau gade usi didedi!”

²⁰Irakuna di medari Sei nivakegi Jerusalem ri boyadi vene di utari bi Greek vene bedakai.

²¹Ye Philip, kaere bi Bethsaida rofu Galilee amiye, ina rofu baesi niyadi, “Amiye tora, una ura Iesu vegi resifa.”

²²Philip nesi Andrew nioteimaro, ma vakoi Iesu rofu nesi nioteimaradi.

²³Ye nikabai reyo, “Amiye di mida di roka moi odoro rigo di meda bi okiyo mini.

²⁴Rama iniye ya nida: witi meko konori yaresi de muyego vonisi, bi meko yokoi makari kana amego. Idu muyego vonisi, bi ini meko tau gade rama nigedi.

²⁵Kaere ini vegu ura rego, bi de moigo, ma kaere mina konori ini vegu ura de rego, bi toga toga ameibobina vegu rofu moi gira rigo.

²⁶Amiye yokoi na rofu naivo rego vonisi, bi na usi baeyaine; ma goina sanari amegida, ina ka amego. Amiye yokoi na rofu naivo rego vonisi, nai Baba yaku moi kikifa rego.

²⁷“Gua nai vima bi esika esika redo—ye beika nigida? ‘Baba, mina meda nemoko rofu na moi vegu rigiya’, vo nigida ba? Idu mina dada na bi mina meda nemoko rofu deyaka.

²⁸Baba, yi roka moi odoro ri!” Ma goroka yokoi omari gutuna deyo, “Sena nai roka moi odoro riyaka, ma dudusa regida.”

²⁹Minari amegamadi vene tau yaku mina neidesi niyadi bi ofu niyo, ma bedakai yaku niyadi, bi “Sei di naivo naivo vima ina rofu ago niyo!”

³⁰Kamini Iesu yaku niyo, “Mina goroka bi diya nai buni dada, idu ya vene yi buni dada.

³¹Mina kono di kota rena meda bi gua mini; ye gua mina kono di ourefeidena amiye bi umeki rei feidego.

³²Ma mina konori na moi odoro rigori, amiye tau noibanu na rofu afei baegida.”

³³(Makai niyo bi gokai ida dudu muyego ina rofu nioteimaro.)

³⁴Ye amiye tau gade yaku nikabai reyadi, “Ago girari neideyafa Keriso bi toga toga amebigo, ye ya gokai nisa Amiye di mida bi moi odoro riyagane? Mina Amiye di mida bi kaere?”

³⁵Ye ina vene rofu niyo, “Mina vabara bi yasa de amei doba rego. Vabara yasa amedori, diga bogasa rebifa, de bi mukuna yaku ya ebu rego baebu. Kaere mukunari diga bogasa redo amiye goinari dido bi ina toto.

³⁶Vabara yasa amedori, ina rofu mokena vari gira aefa, ye ya bi vabara di mida mida nigedi dada.” Sina ni vau resi ferei disi ina vene rofu iniye moi sui riyo.

³⁷Gokai sena ini neri rebe tau regamo, idu ina vene bi toga mokena vari gira de aegamadi,

³⁸ye Sei di ago niyo amiye Isaiah di ago bi moi rama aego dada: “Varika amiye, kaere yaku uni ago neidesi mokena vari gira aeyo? Ma kaere rofu Varika amiye di vava moi ogau riyo?”

³⁹Mina dada mokena vari gira de aeyadi, adina Isaiah dudusa niyo:

⁴⁰“Sei yaku ini nemoko moi taufa risi ini uka kebi riyo, ini nemoko dudu vesi ini uka dudu diba nisi na rofu kero regedi baebu, ma ina moi buni rigida.”