Yoane 12:15-40

¹⁵“Amiu le Yerusalem lala, amiu ve amarau re sina, Amiu avisuia, nanagane na kiamiu p̃arin sup̃e naga pimi ke pun amiu narui. Naga kus ke ga narin ninus nen togki tai, pa totano ea pimi ke.”

¹⁶Ana e pogos nene, imimi nalogena kiena ne Yesu lala pe mesitom̃al re visena nene poli, a siraunia, pogos nap̃a pa pae ma e peni, imimi mepisu kilale ga na wa sane visena marua na nanua ne naga pisayu naga mesmes, ana mepisu sane naga kila sur punu ga mesmesu ga sa nap̃a Visena Wa lala apisa nanua sumo asape yoko Navisaarena yum̃aenia.

¹⁷Ana p̃isi na pupia p̃ina nene kila ke naworworena pa Yesu sanene na. Lala moki la nap̃a nakoneva asike amio naga pogos nap̃a pio Lasaros m̃al si petan marena, ana la apa apisawal pupia kile nene pan yeririna tap̃ena lala,

¹⁸ana pogos nap̃a lala amloge sur la nap̃a Yesu miyum̃aenia, sinelan asape avisuia, ana la apim vena ava avisuia.

¹⁹Ana lala punu ga nene, pupia p̃ina pa tai narui, ana pogos nap̃a le Varasi la apisuia, amloge piowa, asilin p̃arila, apisape “Top̃aryon yar nene pano-o piowa ga. Naga taulu ita punu ga, pure yomarava wetelu nene apa ataveve naga rui.”

²⁰Ana e yeririna moki la nap̃a ke metava ma Yerusalem vena alotun Ntewa e p̃ap̃agena nene, lala p̃asia pe ape le Yu re poli, lala le Krik la nap̃a apim amlelaga e Ntewa sane le Yu lala.

²¹Ana pogos nap̃a amloge manene laa kia kiena ne Yesu, asape avisu naga. Apa akale, akirawal kiena nalogena nap̃a Pilip nae Petsaeta ma Kalele, ana apiun Yesu tania.

²²Ana Pilip pa pisawal pa Antru, p̃isi na lalua apa apisawal pa Yesu.

²³Ana pogos nap̃a Yesu mloge sape la nap̃a pe ape le Yu re la poli asape avisuia, naga pisawal sape “Nanagane na pe pogos mesmesu vena Ntewa kila kiau kia, inu Narina ne Yeririna, va metava.

²⁴Nepisa pe lelaga pan amiu, sane visae kurus tai, visae ve amapla re, yoko naga taaga to korena ga tom̃a sanene. Ana visae amapla, yoko menun nena ga, ana siraunia kilia war si mras ve moki.

²⁵“Sanene, naga nap̃a kekaran manene laa malena kiena e yomarava nini, taulu nap̃a kekaran inu, yoko kilaluia, a naga nap̃a pe sitom manene re naga poli, yoko naga sum̃a ga woga ga vano-o tol malena viu nap̃a pe luas re poli.

²⁶“Yere Yu pona yere Krik nap̃a sape sinenan kiau yum̃aena, sinenan sape ilanu, naga monar taveve in lue ga. Ana pogos nap̃a naga taveve inu ke sanene, yoko e lele ya nap̃a sa neva nesike ea, a naga m̃ena kilia amio inu. Yar nap̃a pe yar na kiau yum̃aena, yoko Ntewa la kia wo vania.”

²⁷Ana Yesu siar sitomveve ke nap̃a yoko ve ve piavi re na, monar mare, ana mloge urmi pap̃isi e naga. P̃isi na sape “Nanagane na, nemloge sane sitomena la moki e losineu. ?Yoko nevisa ya ne va kau Ata? ?Popon nelen, neviun vetania, nesape: Ata, awis otarlua inu e aora m̃arera na loge viowaena nene? Pona piowa ga nap̃a nevisa sanene, vanon in na nepim e yomarava nini vanon nenaga yum̃aena ne nanene.

²⁸Peraga, popon nevisa ve sa ga nene, nevisave: Ata, awis okila kiom̃a kia vim ve keviu kome sur la nap̃a sa akila van inu.” Ana pogos nap̃a Yesu pisa pa visena nene, pulgo tai metava ma e peni pis pitomi tano, pisape “Inu na nekila ke kiau kia pa metava kom ga e ko rui, a yoko nekila ke sina ga na wa.”

²⁹Ana p̃ina la nap̃a asu ke lavis ga amloge m̃aagena na pulgo nene, ana p̃asia asape polilu ga tai, la p̃as asape “Peraga, navisi ga ta ne pisi ke pania.”

³⁰Ana Yesu pisa pan la sape “Pulgona nap̃a temloge ne, naga pe pitomi re sape in na neloge poli, a pitomin amiu, vena amiu akilia sane inu nepimi pe.

³¹Monar ve sanene vanon nagane na, pe pog na lip̃ereen yeririna na yomarava narui, pe pog na kovenluaen p̃arin sup̃e na yomarava narui nap̃a Yermare.

³²Vena nekila yum̃aena nene, monar netamalele metava e laki torovia, ana pogos nap̃a nem̃eke metava sanene, nekilia noure yeririna punu ga aim pun inu.”

³³Ana visena kiena ne Yesu, naga pisa pe nakilaen imi merarava van la sane kiena marena pe marena tai nap̃a ve sanape.

³⁴Ana pogos nap̃a p̃ina la amloge, asape “Memloge ke nap̃a apuloyu ke Visena Wa, pisa ke sape Navisaarena naga mal lue ga, tap̃atete mare pogos tai. ?Ana sanape nap̃a ko na opisa ke osape yoko atelan Narin Yeririna metava vena mare? ?Pona ko na opisa ke ga tap̃ena tai yo? Narin Yeririna ya nap̃a opisa ke ne, nap̃a yoko ve sanene vania?”

³⁵Ana Yesu pisatam̃e pan la, pisape “Inu na nepe yomerarava kiena ne Ntewa, a nekilia nesum̃a si nemio amiu yam ve plas ga. Ana pogos nap̃a nesike nemio amiu, popon ayal e kiau yomerarava nena, visae peraga, yoko pupumalko kalo make amiu, a yar nap̃a sape yali, tap̃atete visulup̃ar si kiena mrapa.

³⁶Pogos nap̃a inu nap̃a nepe yomerarava nene nesike ke nemio amiu wa, popon alelaga e inu, vena amiu m̃ena akilia aim ave yeririna na yomerarava lala.” Ana pogos nap̃a Yesu pisa pa visena la nene, naga mligan la asike, petan la pa tapolou e lele tai nap̃a tap̃atete aimin sina naga.

³⁷Yesu miyum̃aen pupia kile la moki e marala rui, ana pe suri korena, lala pe sinelan re asape alelaga e naga poli.

³⁸Ana kiela p̃elaga na sanene, akila ke sina ga sa ga nap̃a le Yu marua la nasumo akila e pogos kiena ne yermarua Aisea, nap̃a pisayu e visena la lua nap̃a pisawalia. Nasumo pisa sanene, pisape “Ntewa na mava, imimi mepisasawal ke pan la, ana lala pe akekaran re asape alelaga poli, a ko ko na okila meraravan kiom̃a puriukawaena na lumom̃a van la, ana lala a ne pisulup̃aria? Pe ta re poli.”

³⁹Ana na luania, naga m̃ena pisa sanapen lala amon lelagaena e Yesu, pisa sanini, pisape

⁴⁰“Ntewa p̃aryon la pano-o peraga, p̃isi na kila ga kilamarala la pimi pe kilamara p̃ala, kila losinela la pimi m̃arera laa pap̃isi. P̃isi na kilamarala la tap̃atete si avisu ruru suria, po losinela la aninulup̃ar suria. Visae pere, yoko la avilon la ap̃asup̃e la aim pa panu rui, vena nekila ruru kiela malena la.”