San Juan 12:15-40

¹⁵Kchësy to sinak to meñ Sión ktsyebty to. Kol kuy gaanoo lëë xrey do sëëd sobsye xaa lady tu burr wiñ.

¹⁶Klo byeñdy xpëëdscuel Jesús nii beeñtsyey Jesús, per tsi lëë Jesús lox byëp kpaa, lëë xpëëdscuel xaa psaladzy nii kël nii sinrii ktsyool xaa aan nli gaa singo ptsyool xaa.

¹⁷Kchësy meñ nii kon xa kwlii Jesús Lázaro leñ paa ni xa beeñ kpañ xaa xaa bitiitso.

¹⁸Kuktsiil nëz meñ Jesús porñee biñ meñ nii lëë xaa beeñtsyey kyalntson go.

¹⁹Per lëë xaa fariseo bislo xñee lo xcombañer: —¿Pe chan dow na? Ni tu pe chilody kuuñtsyeey no. Kchësy meñ no xlad xaa.

²⁰Lady kchësy meñ nii kukiily lay lo Dios paskw no bla xaa sit.

²¹Lëë xaa sit ko big lo tu xaa Betsaida nii lë Felip aan lëë xaa chëb: —Xey, chakladzy noo tyon noo Jesús.

²²Lëë Felip kukëbo lo Ndresy, aan chop xaa kukëbo lo Jesús.

²³Lëë Jesús nii nak mguiy nii pxaal Dios chëb: —Lëë wor kutsiñ nii lëë Dios klisklaa naa.

²⁴Nli xñen nii deelñee kñaady xobxtily lo lyu, ktyaldyo, per deelñee kñaaw, lëëw ktyaly.

²⁵Kchësy meñ nii xkëstyoo xkyalmbañ lo kislyu re kety, per kejty meñ nii xkëstyoody xkyalmbañ, sink lëë meñ go jkaa kyalmbañ nii xnitylody.

²⁶Kchësy xaa nii chakladzy kuñ xtsiñaa no nii kiidnal xaa naa parñee laañee tson siko tso xaa. Xle Tat Tios lo meñ nii chuñ xtsiñaa.

²⁷’Mban xteedy styoon nina, per ¿pe sëpaa lo Tat Tios nayak nii kteelaa xaa naa lo kyalnë re con par ngo syelyaa?

²⁸Tat Tios, bluuy xkyalwnabeyoo. Tsigo lëë meñ biñ tsiy tu xaa nii pchoo kpaa chëb: —Lëëw bluylaa, per lëëw kluyaa stub.

²⁹Kchësy meñ biñ tsiy xaa go aan no meñ kwnee: —Tu nkwsiyo. No gaa meñ kwnee: —Lëdyo, tu angly kwnee lo xaa.

³⁰Lëë Jesús chëb: —Lëdy por naa biñ do tsiy xaa go, sink por lëë dow.

³¹Lëë wor kutsiñ nii lëë kyalxtisy kak lo kislyu re, ni lëë wor kutsiñ nii lëë Dios ksonëz xaa nii xñabey lo kislyu re.

³²Tsiñee lëën kyë lo crusy, lëën kuñ nii kchësy meñ kpig lon.

³³Singo mod lëë xaa chëb xa kety xaa.

³⁴Tsigo lëë meñ chëb: —Lo xleey noo xñee nii tsiñee lëë Crist kiid kpidy xaa. ¿Penak tsigo xñeel no nii kety mguiy nii pxaal Dios? Cho nak kaa mguiy nii pxaal Dios.

³⁵Lëë Jesús chëb: —Xtsedre kan do bini. Kol kyënsë lëë ka lëë bini bii no parñee jkaady to nguey, por nandy kchë meñ nii xkyënsë lo nguey pa si.

³⁶Lëë ka bii chan do bini, kol jkaaxcuento parñee tugak tsow lo do. Loxsye chëb Jesús ngo lëë xaa bi aan lëë xaa kwyolan lo meñ go.

³⁷Nikxe nii kon meñ kchë kyalntson nii beeñtsyey Jesús, bnilasty meñ xtiits xaa,

³⁸sink lëë meñ beeñ cumplir nii pkëë profet Isaías tsiñee chëb xaa: Tat Tios, ¿cho bniladzy xtiitsoo na dyon? ¿Cho lo bluuy gaal xkyalwnabeyoo?

³⁹Pchilody niladzy meñ xtiits Dios, porñee lë gak profet Isaías pkëë sinrii:

⁴⁰Lëë Dios ptse lo meñ ni lëë xaa beeñ jkyedzy styoo meñ, parñee kandy meñ ni kyeñdy meñ. Kchë nrii ptsyool meñ parñee ktikchedy meñ styoo lon, tsiin ktsilyaa xtol meñ.