SAN JUAN 12:15-40

¹⁵“Ni̱ cape̱cuántit huixín hua̱nti̱ huilátit c-Jerusalén; huata mejor capa̱xuhuátit, chu̱ caucxílhtit mireycán hua̱nti̱ naca̱ma̱paksi̱yá̱n; xlá̱ pu̱mima̱ tantum a̱xnu̱ tu̱ ka̱tahuilani̱t.”

¹⁶Xli̱ma̱kalhtahuáka̱t Jesús ni̱ tzinú̱ xakata̱ksma̱kó̱ hua̱ntu̱ luhua xqui̱taxtuma̱, hua̱mpi̱ acxni̱ aya xlakastakuanani̱t ca̱li̱ní̱n a̱cu luhua akata̱ksko̱lh sa̱mpi̱ acxnicú̱ xlacán lacapa̱stacko̱lh pi̱ chuná̱ xtatzoktahuilani̱t hua̱ntu̱ xlá̱ naakspulay Jesús, chu̱ luhua xli̱ca̱na̱ chuná̱ xqui̱taxtunini̱t.

¹⁷Yamá̱ hua̱nti̱ xqui̱lako̱ni̱t c-Betania, chu̱ na̱ antá̱ xta̱ya̱kó̱ Jesús acxni̱ xlá̱ xma̱lakastakuani̱ni̱t ca̱li̱ní̱n Lázaro, xtasaxtuni̱t c-xtahuaxni anta̱ni̱ xma̱acnu̱cani̱t, xlacán cani̱huá̱ xli̱chihui̱nanko̱ni̱t c-Jerusalén hua̱ntu̱ xqui̱ucxilhko̱ni̱t.

¹⁸Huachá̱ xpa̱lacata luhua lhu̱hua̱ anko̱lh li̱pa̱xtokko̱y, sa̱mpi̱ aya xli̱ta̱chihui̱nanko̱cani̱t hua̱ntu̱ xlá̱ xtlahuani̱t tlanca xtatlahu, chu̱ xca̱cni̱naniputunko̱y.

¹⁹Puschí̱ yama̱ fariseos xlacán ni̱ lakati̱ko̱lh, chu̱ chuná̱ tzucuko̱lh la̱huaniko̱y: —Luhua caj caucxílhtit la̱ quin nia̱lh tú̱ catili̱taxtuhu, sa̱mpi̱ pacs huá̱ takokako̱y, chu̱ li̱pa̱huanko̱y tama̱ chixcú.

²⁰Luhua lhu̱hua judíos hua̱nti̱ xminko̱ni̱tanchá̱ c-aktum makat tíyat huanicán Grecia na̱ antá̱ xminko̱ni̱t lakataquilhpu̱tananko̱y c-Jerusalén xli̱makua xlama̱ xapa̱scua ta̱kspuntza̱lí̱n.

²¹Xlacán laktalacatzúhui̱ko̱lh Felipe, huachá̱ ti̱ xala c-Betsaida tu̱ ma̱paksi̱y Galilea. Squiniko̱lh li̱tlá̱n, huaniko̱lh: —Chixcú, clakapasputuna̱hu, chu̱ cta̱chihui̱namputuna̱hu Jesús.

²²Felipe li̱ta̱chihuí̱nalh Andrés, chu̱ xcha̱tuycán anko̱lh huaniko̱y Jesús hua̱ntu̱ xlacasquinko̱y yama̱ chixcuhuí̱n,

²³Jesús chuná̱ huaniko̱lh: —La̱nchú̱ accha̱ni̱ttá̱ quilhtamacú̱ acxni̱ quit Xatalacsacni Chixcú̱ nacni̱y laqui̱mpi̱ nacma̱siyupalaya̱chá̱ yama̱ ca̱cni̱ tu̱ xapu̱lana̱ xackalhi̱y.

²⁴Sa̱mpi̱ xli̱ca̱na̱ cca̱huaniyá̱n, pi̱ acxni̱ nacni̱y, xta̱chuná̱ nali̱taxtuy la̱ akspulay aktum xatalhtzi trigo hua̱ntu̱ chancán, acxni̱ tama̱ya̱chá̱ ca̱tiyatna, xli̱ca̱na̱ pi̱ nani̱y c-xnacú̱, hua̱mpi̱ xlá̱ a̱li̱sta̱lh naakpún, chu̱ luhua lhu̱hua̱ nahuán xtahuácat. Hua̱mpi̱ lapi̱ ni̱ xtama̱chá̱ ca̱tiyatna, chu̱ ni̱ xni̱lh c-xnacú̱, niucxnicú̱ catimá̱sta̱lh lhu̱hua xtahuácat.

²⁵Yamá̱ hua̱nti̱ luhua xli̱ca̱na̱ lakcatzán, chu̱ ni̱ makatzanka̱putún xlatáma̱t, huata xlá̱ namakatzanka̱y hua̱ntu̱ lakcatzán; hua̱mpi̱ hua̱nti̱ ni̱ nalakcatzán xlatáma̱t pala namakatzanka̱y u̱nú̱ ca̱tuxá̱huat, huata xlá̱ namakamaklhti̱nán yama̱ xaxli̱ca̱na̱ latáma̱t hua̱ntu̱ niucxni̱ laksputa.

²⁶Lapi̱ huí̱ hua̱nti̱ luhua xli̱ca̱na̱ quiscujnaniputún, chu̱ aktum catzi̱y naquili̱pa̱huán, pus aksti̱tum caquista̱lánilh c-xlatáma̱t, laqui̱mpi̱ yama̱ tiji̱ tu̱ quit clactla̱huama̱, na̱ antá̱ xlá̱ nalactla̱huán; chu̱ hua̱nti̱ chuná̱ naquiscujnaniy c-xlatáma̱t, Quintla̱t na̱ luhua napa̱xqui̱y.

²⁷“Hua̱ chú̱ luhua xli̱ca̱na̱ aklituanani̱t quinacú̱. ¿Pi̱ tla̱n cahuá̱ pi̱ xacuánilh chuná̱ Dios: ‘Tla̱ti Dios, xtlahua̱ tlanca li̱tlá̱n, xquilakma̱xtu̱ laqui̱mpi̱ ni̱ xacpá̱ti̱lh hua̱ntu̱ la̱nchú̱ naquiakspulay’? ¡Hua̱mpi̱ ni̱ lay chuná̱ nacuán sa̱mpi̱ luhua huá̱ quili̱macamini̱t u̱nú̱ ca̱tuxá̱huat!

²⁸Hua̱mpi̱ hua̱ntu̱ xma̱n huá̱ clacasquín pi̱ ma̱squi catu̱hua̱ xquiakspúlalh hua̱mpi̱ huá̱ cali̱tatlánqui̱lh mintucuhuiní.” Acxnitiyá̱ yama̱ takáxmatli̱ aktum tachihuí̱n hua̱ntu̱ minchá̱ c-akapú̱n, chu̱ chuná̱ huá̱: “Quit cma̱siyuni̱t pi̱ caj mimpa̱lacata aya li̱tatlanqui̱ní̱t, chu̱ na̱ caj xpa̱lacata tu̱ natiakspulayá̱n nali̱tatlanqui̱palay.”

²⁹Cha̱nchu̱ hua̱ li̱lhu̱hua̱ ti̱ kaxmatko̱lh yuma̱ tachihuí̱n, tzucuko̱lh huanko̱y pi̱ mat caj jílilh, chu̱ makapitzí̱n xuanko̱y pi̱ cha̱tum xángel Dios xta̱chihui̱nani̱t.

³⁰Hua̱mpi̱ Jesús chuná̱ huaniko̱lh: —Huixín ca̱macatanicántit yama̱ tachihuí̱n laqui̱mpi̱ nakaxpatá̱tit, sa̱mpi̱ ni̱ huá̱ li̱takáxmatli̱ quimpa̱lacata.

³¹Sa̱mpi̱ hua̱ chú̱ aya lakcha̱ni̱t quilhtamacú̱ acxni̱ xli̱pacs tachixcuhuí̱tat xala u̱nú̱ ca̱tuxá̱huat nama̱xoko̱ni̱cán xpa̱lacata xtala̱kalhi̱ncán, chu̱ yama̱ akskahuiní̱ hua̱nti̱ luhua ma̱paksi̱ko̱y hua̱nti̱ xalaktzanká̱n latama̱ko̱y ca̱tuxá̱huat chú̱ luhua aya lakcha̱ni̱t hora acxni̱ xlá̱ maktum tu̱ namaklhti̱cán xli̱ma̱paksí̱n.

³²Na̱ aya lakcha̱ma̱ quilhtamacú̱ acxni̱ quit naquixtokohuacacán ta̱lhmá̱n c-cruz, hua̱mpi̱ caj huá̱ xpa̱lacata yuma̱ cruz luhua lhu̱hua̱ ti̱ naquili̱lakminko̱y, chu̱ naquili̱pa̱huanko̱y.

³³Caj la̱ntla̱ hua̱ntu̱ xlá̱ xli̱chihui̱nama̱, antá̱ xli̱ma̱akata̱ksni̱nán la̱ntla̱ namakni̱cán.

³⁴Hua̱mpi̱ yama̱ chixcuhuí̱n chuná̱ kalhti̱ko̱lh: —Lapi̱ huix xli̱ca̱na̱ Cristo ti̱ naquinca̱lakma̱xtuyá̱n, ¿lá̱ntla̱ huix quinca̱huaniya pi̱ namakni̱cana̱ c-cruz? Sa̱mpi̱ quin ccatzi̱ya̱hu pi̱ c-xtachihui̱n Dios hua̱ntu̱ tatzoktahuilani̱t c-Li̱kalhtahuaka, antá̱ huan pi̱ yama̱ Cristo hua̱nti̱ namín quinca̱lakma̱xtuyá̱n xli̱ankalhí̱n nalatama̱y. Hua̱mpi̱ huana̱ pi̱ huix Xatalacsacni Chixcú̱ namakni̱cana, usuchí̱ ¿xatí̱ ya̱ chixcú̱ yama̱ hua̱nti̱ huix li̱chihui̱námpa̱t?

³⁵Huaniko̱lh Jesús: —Quit nactica̱li̱ma̱lacahua̱ni̱ya̱ncú̱ yuma̱ quixkakánat, hua̱mpi̱ nia̱lh luhua maka̱s quilhtamacú̱; pus huá̱ xpa̱lacata cca̱li̱huaniyá̱n, xli̱makua̱ huí̱ xkakánat, luhua cali̱pa̱huántit, chu̱ li̱huana̱ catla̱huántit, laqui̱mpi̱ ni̱tú̱ napuhuaná̱tit sa̱mpi̱ acxni̱ namín hora la̱ naca̱poklhuán, xli̱pacs hua̱nti̱ tla̱huanko̱y acxni̱ ca̱pucsua, xlacán ni̱ lay ta̱ksko̱y tiji.

³⁶Xli̱makua kalhi̱yá̱tit xkakánat, luhua xli̱ca̱na̱ cali̱pa̱huántit laqui̱mpi̱ huixín tla̱n namakskoniko̱yá̱tit a̱makapitzí̱n minta̱chixcucán. Acxni̱ chuná̱ tihuaniko̱lh Jesús akxtakya̱huako̱lh, chu̱ tatze̱kniko̱lh.

³⁷Ma̱squi luhua lhu̱hua̱ lactlanca li̱ca̱cni tascújut hua̱ntu̱ xli̱ma̱lacahua̱ni̱ko̱ni̱t Jesús hua̱ntu̱ xlá̱ tla̱n xtlahuako̱y, yama̱ xanapuxcun judíos ni̱ luhua xca̱najlaniko̱y.

³⁸Pus fuerza̱ xli̱kantáxtut xuani̱t hua̱ntu̱ tili̱chihuí̱nalh profeta Isaías xpa̱lacatacán hua̱nti̱ chuná̱ kalhi̱ko̱y xta̱yatcán, sa̱mpi̱ xlá̱ chuná̱ titzóknu̱lh c-Li̱kalhtahuaka: “Quimpu̱chinacán, ¿tí̱ chú̱ luhua ca̱najlay hua̱ntu̱ quin cli̱chihui̱nana̱hu? Lhu̱hua̱ lactlanca tascújut hua̱ntu̱ huix li̱ma̱lacahua̱ni̱ko̱ni̱ta, hua̱mpi̱ ni̱ ca̱najlaniko̱yá̱n.”

³⁹Alacatanu̱ c-Li̱kalhtahuaka̱ profeta Isaías lacatancs tihua̱ xatú̱ xpa̱lacata ni̱ lay li̱pa̱huanko̱y acxni̱ na̱má̱ tichihuí̱nalh xpa̱lacatacán:

⁴⁰“Dios li̱ma̱xtuko̱lh xta̱chuná̱ caj la̱ lakatzí̱n calatama̱ko̱chá, na̱ li̱makaxtakko̱lh laqui̱mpi̱ catzaca̱tlako̱lh c-xnacu̱cán, chu̱ laqui̱mpi̱ ma̱squi luhua kalhi̱ko̱y xlakastapucán, ni̱ catili̱lacahua̱nanko̱lh, na̱ ni̱mpala catili̱akata̱ksko̱lh c-xnacu̱cán, chu̱ na̱ ni̱ caquintilakminko̱lh laqui̱mpi̱ quit nacma̱pacsako̱y xli̱stacnacán.”