San Juan 12:15-40

¹⁵Quɨt idxibtɨ de bɨny Sión. Gulguiaa a Rey xtennɨ azéed, beebbɨ tuby burreen.

¹⁶Hórgaqui quɨt gucbeeti de xpɨny Jesús xi zelo ni cayacqui. Per chi bieepy Jesús yabaa, chiyru gucbeedeb dec pur laaniy rnii lo xquiits Dios ningui gudeedny ziy.

¹⁷De bniety ni guzuguané Jesús chi gurɨdxny Lázaro par idiiab láani baa, deni gusbánny laab, de bnietqui beedeb diidx ni gunádeb.

¹⁸Pur ningui bdiia zieny bniety güechalo Jesús pur ni bindiagdeb milagrɨ ni baanny.

¹⁹Chiy de fariseu ax raipdeb saadeb: —Gunáctɨ, xíteete zezati ni cadxannɨ. Gulguiaa caniát, irapac bɨny zanald laab.

²⁰De lo ira de bniety ni güe Jerusalén par btodeb Dios chi laníqui, guu tuby tiop de bniety griego.

²¹Laadeb güebinuudeb Liby, ni zá guɨdx Betsaida ni ná nez Galilea, ax banlasdeb lob raipdeb laab: —Dad, rcaaznɨ ininén Jesús.

²²Chiy Liby gudixteeb lo Andrés, chiyru iroptedeb güetixteedeb lo Jesús.

²³Jesús ax raipy laadeb: —Abdzɨny hor par Bniety ni bxiaald Dios gac zec ni ná par gac.

²⁴Te pur rguixtiia lot, zecquɨ tuby llub belati quɨt cueni zélaa náni tubyzi, per belati cueni ax raczienni.

²⁵Elquɨ ni mazru ruu guelrsaa pur guelnabánytisy ni nuu lo guɨchliuré, zuu chi initbɨni. Per elquɨ ni mazru ruu guelrsaa xa xquel rcaaz Dios gúnbɨ masquɨ ni teedtisbɨ, per ziyza zapbɨ guelnabány par chazy cun laany.

²⁶Belati nuu ni rcaaz gún sirvɨ luaa, ná par zanaldbɨ nare ax rut suguaa, ruy suguaazacbɨ. Ne ni gún sirvɨ luaa, subyaa Xtada Dios laab.

²⁷’Angapacré quesentiand nalas rziienia. Per quɨt xo iniitia: “Xtada, bldábiu nare lo guelziiré”, te pur parpac ziy zelda.

²⁸Ningui rniia: Xtada, bliuubiudeb guelrnabee xtenbiu. Chi gunii Jesús ziy ax bíeny rsee Dios llayabaa, guniiny: —Abliuuadebni, per sbíi iliuuadebni stuby.

²⁹Chiy de bniety ni zuguaa ruy guniideb dec guziuuy gunii. Per stuudxdeb ax gunii: —Tuby ánglɨy guniné laany.

³⁰Chiyru raipy Jesús laadeb: —Gati par naretia bíeny rsee ni guniiqui sino que par laat.

³¹Te pur abdzɨny hor ni yíany xa ná xgab bɨnguɨchliu ne abdzɨny horza ni aquɨtru inabeeti bɨndxab lo guɨchliuré zec ni canabeeb an.

³²Ne chi abcuaadeb naa lo cruzy, chiyru iralozy bɨnguɨchliu azeldilaaz nare.

³³Ziy xquel gudixteeny xa xquel gatyny.

³⁴Chiy cuaby de bniety lony: —Dunnɨ nánnɨ dec lo ley rnii, Crist quɨt chúuti dxi gatyny. Anre, ¿xínii rniibiu dec Bniety ni bxiaald Dios ná par icuaadebny lo cruzy? ¿Túza bnietqui rzeetbiu chi rniibiu Bniety ni bxiaald Dios?

³⁵Chiyru raipy Jesús laadeb: —A stuudxzi zuguané bieenré laat. Ningui gulchanuuny lalzi zuguanény laat, te par quɨt xi sacantɨ. Te pur ni zé nez rut nacay niclɨ quɨt gánbɨ calí nezqui zéb.

³⁶Anre lalzi zuguané bieenré laat, gulchaldilaazny te par chalee gactɨ de xpɨnny. Chi gulull gunii Jesús ziy, chiyru zégacny rut quɨt tu idxial laany.

³⁷Masquɨ zieny milagrɨ ni baany Jesús nez lodeb, per quɨt nialdilaaztidebny

³⁸pur ni ná par gac zec ni bcuaa profet Isaías, te pur laab bcuaab: Dad, quɨt tu reldilaazti ni rniin pur laabiu. Quɨt tu racbeeti dec pur guelrnabee xtenbiu zienzi ni aguc.

³⁹Pur ningui quɨt nialdilaaztidebny. Ne ziyza bcuaa Isaías:

⁴⁰Laadeb nádeb zec tuby ni quɨt rianlo o ni quɨt racbeeza pur ni abcay xquelriendeb par quɨt yaicquideb cun nare par gúna perdóndeb.