San Juan 12:15-40

¹⁵Jerusalenbi chuminla, nula jele tilatitunaque chuteca joe. Quiralaquede! Nulachi Miya buro nabi chudito jachunaeque chuteca joe. Matu mate Diosichi Pilabi tsanque chuteca josa, Jesús jun tsannan inaminue buro nabi chudito jaca.

¹⁶Aman Jesube penenaminlari casale jun órate jun tsannan inaeque tuilaitiyoe. Wanbile mantimini aman junca jera tuilaiyoe. Jesús puyato mansonhito, jera mantá tan inunbi, mantenhilaiyoe yaca tsanque chuteca jonan, jun tsannan patinueque.

¹⁷Junni aman Jesús Lázaro puyacaca mansonhisa carinasa, duque israelítalari quiranaminlanue. Menaranun forochi nechi manlade! tinamincanan yala meránaminlanue. Junni yalanan fiestaca jato, duque weyanla jun fiestabi pejaca jominlabe jun cuentaca jera quilaquinue Lázaroca mansoncaricaeque.

¹⁸Junni Jesús tsanque wepanato quirantsancari quinunca meráto, ya fiesta quirabi jaca jominlanan Jesuca tulaibi jalaie pueblobi winaminca.

¹⁹Junni junlaca quirato, fariséola tala itsanque cuenta quilaquinue: —Quiralaquede! latinue. Niyanantiya quino podeitulajoyoe latinue. Jeralela yabe penenachi latinae latinue.

²⁰Junni griego tsachila israelítalachi fiestaca jalainue Diosibe rocaibi.

²¹Aman Jesube penenamin tsachi manca, ya Felipe tinun, junbi peraminue. Ya Betsaida pueblobi nechi jominue Galilea tobi. Junni ya griégola Felípechica jato, duque respetaito pato, itsanlatie: —Chiquila Jesuca quirano munaralarayoe latie.

²²Junni griégola Felípebe tsantinunsile, Felíperi Andrebe cuenta quee. Junsi yala paluito Jesúbenan cuenta quilaquee griégola nuca quirachi latinaeque.

²³Junni Jesuri Felípela tsanque cuenta quinunca meráto, itsanque micarie: —La tsachi ica jun jonan, Diosi lachi tsara uraran mantá cuwano óra fachinae tie.

²⁴Junni nulabe tsarasica pachinayoe tie. Trico ni tobi arajica cuwenta joanae tie. Ya ni jopoto sutori, quido petechunae tie. Tsanhinari duque ni seque serachunae tie. Jun tsanquenan la puyanari, lachi tsachi bolonla duque seralaichunae tie. Juntonan trico niri pucale puraitori, man ni nacári puraito jera petechunae tie.

²⁵Jun tsanquenan tenca munate pansi nenachi timinla jun trico ni peteca cuwenta epe jolajochunae tie. Lachi tenchi puyanocatiya jeleratuminlari numatotiya sonnato polelaichunae tie.

²⁶Labe mantaiminla la cuwentanan jonola joe. Labe mantaiminla la chununbinan pechularachunae tie. Labe mantaiminlaca Apa Diosi sen jolajoe tichunae tie.

²⁷Junni Jesús tsachilabe cuenta caquinato, itsantie: —Tsainanan lachi tenca wepananae tie. ¿Junto niyan tino joinhin? Apa, nu laca padeseisa caritude! tituntsan jochunae tie. Padeseibinan jacayoe.

²⁸Junni Apa, tsara wepanato quirantsancari seque quede! tie yape tsachila nuca duque sen joe tilatisa. Jesús tsanque panunsi, Diosichibi nechi fiqui mera jominhe. Itsantie: —Tsanquica joyoe tie. Junsi manaman tsanqueyanae tie.

²⁹Junni junte duque israelítala pewiruraminla ya fiquica yucaleri meráto, cunta jonhoe latie. Weyanlari pato, anjeli Jesube cuenta quin quinae latie.

³⁰Junto Jesuri yalabe beco manpato, itsantie: —Ya fiquiri lachi tenchi itominue tie; nulachi tenchiri jominue tie yape Diosica tenca calaquisa.

³¹Junni meralaquede! Nanni inale jera miintsan jochunae jerale tobi chuminla seiton jolajoeque. Inale lari yucanca fe lochinayoe tie. Yucan Diosica tennatuminlaca mantaminca fe lochinayoe tie.

³²Junni lari corosibi totaito, lachi piyanle tsachilaca labe jera cayailaisa cariyanae tie.

³³Yape Jesús corosibi puyano joeque tenhilaisa tsantinaminhe.

³⁴Junni ya fiquica meráminlari itsanlatie: —Diosichi Pilabi Cristo tinunca pato, ya numatotiya sonnato polechunaeque chuteca joe latie. Nu Jesús mantimini tsachi ica jun joyoe tito, corosibi totaino joyoe tie latie. ¿Junni tsachi ica jun, yanan Cristo jotun? latie.

³⁵Junni Jesunan yalabe beconan itsantie: —Nulaca nasi fecáriri catsenano joyoe tie. Junni catse josanan, seque nenalarana! tie nemente nenatuchun. Nemente nenaminla niyaque nenano jonunca miitolajoe tie.

³⁶Junni catse josanan, tseminbe cayailaide! tie Diosichi tsente nenaminla jochun. Jesús tsantisi manjito poleto, tsaito chuminhe.

³⁷Junni Jesús israelítalachi cale duque wepanato quirantsancari seque quica jominue yape miilaisa. Tsanquinasanan, yabe cayaituchi latinaminhe.

³⁸Matu mate tsachi manca Diosichi mantate pamin jominue ya Isaías mumun. Yari Jesube cayaituchi timinlaca pilabi itsanque chuteca jominue: Miya Diosi, chiquila meracaricaca tsachila tennatuchi latieque chuteca joe. Nu duque wepanato quirantsancari seque quinaminca quiratonan, tennatuchi latieque chuteca joe. Isaías tsanque pila chuteca jominue.

³⁹Junni tsachila jun tsanla jonun tenchi Jesuca merátonan, yabe cayaino podeiton ilainue. Junni Isaías jun tsanla jonunca manpato, itsanque pila chuteca jominue:

⁴⁰Diosi miituchi timinlaca miino podeiton suwamin joe yape miilaitusa. Merátuchi timinlaca meráno podeiton suwamin joe yape meralaquitusa. Tsanque podeiton suwamin joe yape yala Diosibe cayaituto manseilaitusa.