San Juan 12:15-40

¹⁵Amo xonmomohtican, aquihqueh namonpouih itich in altipetl Sión. ¡Ixconitacan, namoueyitiquiuahcau ualahtoc, ualtolohtiu ipan se axnohtzin!

¹⁶Achtoh nitlasalohcauan amo ocahsicamatqueh tleca ohcon omochiu. Pero satepan, ihcuac Jesús oyancuicayol uan oyah iluicac, ihcuacon nitlasalohcauan oquilnamiqueh nic nochi nin yoihcuiliutoya de yeh uan omochiu itich.

¹⁷Naquin ocatcah iuan Jesús ihcuac yeh oquinotz in Lázaro den ticochtli uan ocyancuicayolitih itich miquilistli, yehuan octematiltihtinimiah tlen omochiu.

¹⁸Ica non miqueh ocnamiquitoh in Jesús, nic ocmatqueh oquichiu non iluicacnescayotl.

¹⁹Pero in fariseos ocmosepaniluayah: —Yonanconitaqueh, amotlen uili itchiutoqueh. ¡Ixconitacan, san simi nochtin yaueh inauac Jesús!

²⁰Ocatcah siquin griegos tlen noiuqui oualahqueh Jerusalén octlacachiuacoh Dios itich in iluitl.

²¹Yehuan oyahqueh inauac in Felipe tlen opouia Betsaida, se altipetl tlen poui Galilea, uan oquiluihqueh: —Tocnitzin, itniquih itquitasqueh in Jesús.

²²Felipe oyah oquiluito in Andrés, uan non omen sansican oyahqueh oquiluitoh Jesús.

²³Jesús oquinnanquilih: —Yoehcoc in hora monextis niuehcapantlalilis niConeu in Tlacatl.

²⁴Tlamilauca yec innamechoniluia: Tla nisemilla in trigo amo uitzi itich tlali uan miqui, tlamilauca non semilla mocaua isel. Pero tla miqui, ictemaca mic tlatiyotl.

²⁵Naquin ictlaocolita niyolilis, icpolos. Pero naquin amo ictlaocolita niyolilis itich nin tlalticpactli, icpias yolilistli tlen ica in sintitl nochipa.

²⁶Naquin icniqui nechtiquitilis, mauiqui nouan. Uan campa neh nisqui, naquin nechtiquitilia noiuqui ompa isqui. Uan naquin nechtiquitilis, noTahtzin icuehcapantlalis.

²⁷’¡Itich nin hora tlailiuis mic tlaocol inpia itich noyolo! ¿Tlenoh inquihtos? ¿Inquihtos: “NoTahtzin, amo ixnechoncaua manpano nin tlahyouil”? ¡Uan yeh ica non onualah!

²⁸NoTahtzin, ixconuehcapantlali motoocaatzin. Ihcuacon omocac se tlahtol itich in iluicac tlen oquihtoh: —Yonuehcapantlalih, uan ocsipa inuehcapantlalis.

²⁹Uan in tlen miqueh ic ompa ocatcah uan occaqueh non tlahtol, octouayah otlaticuin. Ocsiquin octouayah: —Se iluicactlatitlantli ocnohnotz.

³⁰Ihcuacon Jesús oquimiluih: —Nin tlahtol amo oualah mancaqui neh, tla yeh nin tlahtol omocac para ixconcaquican namehuantzitzin.

³¹Axan yoehcoc in tonal ihcuac Dios ictlalis in tlalticpactli imac in tlatzacuiltilis, Yehuatzin axan icquihquixtis in amocuali, tlen poui iueyitlayacancau nin tlalticpactli.

³²Uan neh, ihcuac nechahcocuisqueh itich nin tlalticpactli, inquinyoltilanas nochtin nonauac.

³³Ihcuac ohcon oquihtoh, oquimahsicamachitih quenih omiquisquia.

³⁴In tocniuan oquiluihqueh: —In Teotlahtolamatl techiluia nic in Cristo Temaquixtani yeh ica in sintitl nochipa mocauas. ¿Quenih touatzin itcontoua niConeu in Tlacatl icpia tlen cahcocuisqueh? ¿Aquih non, iConeu in Tlacatl?

³⁵Jesús oquimiluih: —In tlanestli oc isqui namouantzin sa tipitzin. Xonninimican axan que oc nanconpiah tlanestli, amo yeh namopan ehcotiuitziquiu in tlayouilotl. Naquin ninimi itich in tlayouilotl amo icmati canic yaui.

³⁶Axan quen oc nanconpiah in tlanestli, ixconniltocacan non tlanestli, uan ohcon namonpouisqueh iconeuan in tlanestli. Satepan ihcuac ohcon oquihtoh, Jesús oyah, acmo oquinmonextilih.

³⁷Masqui miqueh nescayomeh oquinchiu Jesús imixpan in judíos, yehuan amo ocniltocayah,

³⁸ohcon omochiu tlen yoquihtohca in teotlanauatani Isaías: NoTecotzin, ¿aquih ocniltocac tlen itquinmatiltiah? Masqui octaqueh momouisticchiualitzin, ¿aquih yocahsicamat?

³⁹Ica non amo ouilic otlaniltocaqueh, pues Isaías noiuqui oquihtoh:

⁴⁰Oquinpopoyotilih uan occhicau ninyolo, ica non acmo tlachiah ica nimixtololouan, uan acmo tlaahsicamatih ica ninyolo, uan amo icniquih mocuipasqueh nonauac manquinpahti.