Juan 12:15-40

¹⁵Mixiꞌij iwibꞌ ri ix aj Sion. Chiwilapeꞌ, ri Rey iweꞌix kakꞌunik, ukojom lo jun qꞌapoj buru kachaꞌ.

¹⁶Echiriꞌ xuꞌan taq waꞌ, rutijoꞌn na xkimaj ta usukꞌ; kꞌa e xkimaj usukꞌ echiriꞌ lik xyak uqꞌij ri Jesús chikiwach ruma rukꞌastajibꞌal. Kꞌa ekꞌuchiriꞌ xkꞌun chikikꞌuꞌx, e janipa ri xꞌaniꞌ che, ronoje waꞌ tzꞌibꞌital kan pa Ruchꞌaꞌtem ri Dios.

¹⁷E taq ri e kꞌo rukꞌ ri Jesús echiriꞌ Rire xusikꞌij pan ri Lázaro chupa ri muqubꞌal y xukꞌastajisaj lo chikixoꞌl ri ekaminaq, ketajin che utzijoxik ri xkilo.

¹⁸Ruma waꞌ, ukꞌiyal winaq xebꞌel lo che ukꞌulik ri Jesús, ma xkita ri katzijox puwi wa kꞌutubꞌal re ruchuqꞌabꞌ.

¹⁹Ekꞌuchiriꞌ, ri fariseos xkibꞌiꞌij chikiwach: «Kiwil kꞌu laꞌ, lik na jinta kutiqoj saꞌ ri qaꞌanom chirij ri Jesús, ma ¡chiwilapeꞌ! konoje ri winaq eteran chirij» xechaꞌ.

²⁰E kꞌo jujun na e ta aj Israel chikixoꞌl ri winaq ebꞌoponinaq Jerusalem re keꞌkiloqꞌnimaj uqꞌij ri Dios pa ri nimaqꞌij Pascua.

²¹Waꞌ xeqibꞌ rukꞌ ri Felipe, ri aj Betsaida, jun luwar re Galilea. Lik kꞌut xebꞌelaj che, jewaꞌ xkibꞌiꞌij: —Maꞌan ko la riꞌ, chojtoꞌo la, ma riꞌoj kaqaj kaqil uwach ri Jesús —xechaꞌ.

²²Ri Felipe xeꞌek y xutzijoj waꞌ che ri Andrés. Tekꞌuchiriꞌ xebꞌek junam, xeꞌkitzijoj che ri Jesús.

²³Ekꞌu ri Jesús xubꞌiꞌij chike: —Xopon kꞌu ruqꞌijol ri yakbꞌal uqꞌij Ralaxel Chikixoꞌl Tikawex.

²⁴Paqatzij wi kambꞌiꞌij chiwe: E juna ijaꞌ re trigo echiriꞌ katzaq pulew, kamuqik y kakamik. Yey we na jelaꞌ ta kuꞌano, kakanaj kan utukel xew ijaꞌ. Noꞌj we rijaꞌ katzaq pulew, riꞌ lik kawachinik y jekꞌuriꞌlaꞌ kakꞌiyar uwach.

²⁵Jekꞌuriꞌlaꞌ, china ri lik kok il che rukꞌaslem che ruwachulew, riꞌ e kujam ri kꞌaslemal chilaꞌ chikaj; noꞌj china ri na kok ta il che rukꞌaslem wara che ruwachulew, riꞌ na kujam ta kꞌu ri chomilaj ukꞌaslemal na jinta utaqexik chilaꞌ chikaj.

²⁶»China ri karaj kachakun pa ri nuchak, chirajawaxik riꞌ katerej lo chwij. Jekꞌulaꞌ tobꞌ pa kinkꞌojiꞌ wi riꞌin, chiriꞌ kakꞌojiꞌ wi ri waj chak. China kꞌu ri kaꞌanaw ri nuchak, riꞌ kayak uqꞌij ruma ri Nuqaw.

²⁷»Woꞌora lik paxinaq nukꞌuꞌx. ¿Saꞌ nawi ri kambꞌiꞌij? ¿Utz nawi jewaꞌ kambꞌiꞌij: “Nuqaw, chinkolobꞌej la che wa kankꞌulumaj woꞌora”? ¡Na utz taj! Ma ruma ne waꞌ in petinaq.

²⁸Xew kambꞌiꞌij: “Nuqaw, nimarisaj uqꞌij ri bꞌiꞌ la” —xchaꞌ. Ekꞌuchiriꞌ, xchꞌaw lo Jun chilaꞌ chikaj, jewaꞌ xubꞌiꞌij: —Nunimarisam chik, y e waꞌ kannimarisaj tanchik —xchaꞌ.

²⁹Ri winaq e kꞌo chiriꞌ xkita waꞌ y xkibꞌiꞌij: «Laꞌ uchꞌawibꞌal jabꞌ.» Yey jujun chik xkibꞌiꞌij: «Jun ángel xchꞌaw lo che» xechaꞌ.

³⁰Ekꞌu ri Jesús xubꞌiꞌij chike: —Na wuma ta riꞌin xtataj wa jun qulaj, ma e uma ralaq.

³¹Yey woꞌora kaqꞌat tzij pakiwi ri winaq re ruwachulew y kesax na kꞌu bꞌi ritzel winaq, ri jun kataqan che ruwachulew.

³²Echiriꞌ kinyakiꞌ na lo chikaj, kanꞌan chike ri tikawex che ronoje ruwachulew chaꞌ lik kacha kikꞌuꞌx che kepe wukꞌ —xchaꞌ.

³³Rukꞌ waꞌ e xuqꞌalajisaj saꞌ rukamik.

³⁴Ri winaq xkikꞌul uwach: —Ruma Rutzij Upixabꞌ ri Dios riꞌoj qetaꞌam: Ruchaꞌoꞌn lo ri Dios na jinta utaqexik rukꞌaslemal. ¿Chaꞌta kꞌu riꞌ kabꞌiꞌij la Ralaxel Chikixoꞌl Tikawex kayakiꞌ che ruwachulew? ¿China kꞌu riꞌ “Ralaxel Chikixoꞌl Tikawex” kabꞌiꞌij la? —xechaꞌ.

³⁵Xubꞌiꞌij kꞌu ri Jesús chike: —Na naj ta chi kꞌo ri Qꞌijsaq chixoꞌl alaq. Bꞌina kꞌu alaq pa ri Qꞌijsaq xaloqꞌ kꞌa kꞌo ukꞌ alaq, chaꞌ ri qꞌequꞌm na kumaj ta alaq xaqikꞌateꞌt. Ma china ri kabꞌin pa qꞌequꞌm, na retaꞌam taj pa keꞌek wi.

³⁶Kojo alaq ri Qꞌijsaq xaloqꞌ kꞌa kꞌo ukꞌ alaq, chaꞌ jelaꞌ kuꞌan alaq re ri Qꞌijsaq —xchaꞌ. Echiriꞌ xukꞌis ubꞌiꞌxik waꞌ ri Jesús, xel bꞌi chikixoꞌl y xeꞌek pa jun luwar pa na kariqitaj ta wi kuma rike.

³⁷E kꞌo ri na xkubꞌiꞌ ta kikꞌuꞌx rukꞌ ri Jesús, tobꞌ Rire xuꞌan ukꞌiyal kꞌutubꞌal re ruchuqꞌabꞌ ri Dios chikiwach.

³⁸Jekꞌulaꞌ e xuꞌana pachaꞌ rutzꞌibꞌam kan ri qꞌalajisanel Isaías echiriꞌ xubꞌiꞌij: Qajawal, ¿china ekojoyom re ri qatzijom chik? yey ¿China taq chikiwach kꞌutum wi ri chuqꞌabꞌ la, Lal Dios Qajawxel? xchaꞌ.

³⁹E uwariꞌche na xkubꞌiꞌ ta kikꞌuꞌx rukꞌ ri Jesús ma e xuꞌana pachaꞌ rutzꞌibꞌam kan ri Isaías puwi ri xuqꞌalajisaj ri Dios che, echiriꞌ xubꞌiꞌij:

⁴⁰Wa tinamit uꞌanom pachaꞌ potzꞌ ri kiwach y uꞌanom ko ri kanimaꞌ; jekꞌulaꞌ na jinta kꞌo kakilo, na jinta kꞌo kakimaj usukꞌ y na kakitzelej tane kitzij chinuwach chaꞌ jelaꞌ kebꞌenukunaj