Yowan 12:15-40

¹⁵“Ang di tooltool ke malala mai Yerusalem yo iken ye kawal Saion i, kin katattadai be! Kakamata, tool kuto mai kiang yo be matan kala tana mai kiang le imot i, in ya la iwur ye donki kase paunu atu in pono, a ise i.” 

¹⁶Ngan kulkulunu yege nga, ngan di galiunu lodi galanga ye betanga tina ngan punu tiap. Bong ye kene yo Yesu imadit mulu a Maro iyeie ene le ilo ete ke be di tooltool tipayiti nga, motong la lodi tut betanga yo muku ngan tiwodo a ilo ye Rau ke Maro ye nga, ngan iwete ye Yesu. Inbe ye kene tani in lodi tut ye so le imot yo di tooltool tiyei panga ngan lapau.

¹⁷Ngan ye kene yo Yesu koonoo pang Lasarus a imadit mulu ye ni ke matenge nga, ngan di tooltool malala mai la tiye Yesu tiyepe. Ngan la le di tooltool tina ngan timadit a tikaua bingi ye so tani yo Yesu iyeii i, in pang di tooltool.

¹⁸Ngan nen le di tooltool alunu la tilongo betanga ke mos tani yo Yesu iyeii a be iyei ben tarkilanga panga i, le nga timadit a tipakala a tidu pang diki le du titauaraii dada.

¹⁹Di Paresi tikamata di tooltool tina yo tiyei nen nga, le nga di tapdi tiwetewete nen, “Kakamata nga, nookoot nga idi nga o tayeie so siap, yesoo di tooltool le imot la titoo nga.”

²⁰Di tooltool malala mai tina yo tilo pang Yerusalem be lo tisung ye lal maiyoko ke sungunu tani nga, ngan di tooltool kapala ngan di Girik.

²¹Le nga di Girik tina ngan tila pang ye Pilip, tool ke malala Betsaida yo iken ye tana mai Galili i. Tila ye, motong la tiwete panga nen, “Tool mai, am nga lomam be amkamata Yesu pa.”

²²Le nga Pilip la iwete pang Antares, motong la yaru timadit a tila la tiwete pang Yesu nga.

²³Motong la Yesu iraua betanga kidi yaru nen, “Lal yo Maro be iyeie Tool Moolmool ke Maro ene le ilo ete ke be di tooltool tipayiti ye i, in nookoot nga la pombe nga.

²⁴Awete pang moolmool nen, kumata be tool atu ipe dingding patunu du tana lono tiap nga, ngan ole isup tiap le kanono tani yo ataleu in la be iken i. Bong kumata be ipe du tana lono le kulini iwi nga, ngan ole isup a ipu le itar kanono alunu welewele.

²⁵Ngan nen le kumata tool atu be lono pang yepongo ki ke tana i mai san nga, ngan ole ilene. Bong kumata tool atu be iwala murini pang yepongo ki ke tana i nga, ngan ole ikaua yepongo dook mata yo taukan motingi i.

²⁶Le kumata sei tool be ilonau a iyei urata dawa ben kapraingi kiau nga, ngan ole itoo au. Ngan nen le ni nangai yo be ayepe ye i, in ole ya iyepe ye lapau. Inbe Tamak ole iyitmaka tool tani yo be iyei urata kiau i, in ene.”

²⁷Motong la Yesu iwete mulu nen, “Nookoot nga au i lok gurrungu san, le nga ole awete belei? Ole be ayei ne, ‘Tamak, kulonau a kugutaka so yo be pombe pang yau nookoot i’? Tiap! Au i ke be awete nen tiap, yesoo ye punu in la le asi tana i ye i, a be lal ke so moonoo nen nga, ngan pombe pang yau.

²⁸Le Tamak, ong taum kuyeie em le ilo ete ke be di tooltool tipayitong ye!” Yesu iwete nen, motong la tool atu kalngana iwetewete ke malala ke Maro a isi nen, “Au i ayeie ek le ilo ete ke be di tooltool tipayitau ye oo, inbe ole ayei nen mulu.”

²⁹Ngan di tooltool malala mai tina yo tikododo potai ye Yesu nga, ngan tilongo, le nga tiyei ne, “Ai, looloo la itara i.” Bong ngan di tooltool kapala tiyei ne, “Tiap! Bangabangana ke Maro atu la iwetewete panga i.”

³⁰Tiwete nen, motong la Yesu iyei ne, “Betanga yo nookoot si kalongo nga, ngan isi be si ilonau tiap, bong be ilonang.

³¹Nookoot nga i lal yo Maro be ikarata betanga kidi tooltool ke tana i ye dada dook tiap kidi yo tiyei nga. Inbe ya in ole inganga tool yo iyei kuto mai a be matan kala tana mai i le imot i, in a ikoo.

³²Ngan au i nookoot nga ayepe ye tana i, bong pang dama ni be tiyitmakau le lo atuku kai palasingi kaini nga, ngan ole agaua di tooltool le imot a timan pang yau.”

³³Yesu iwete nen ngan be nen a ya taunu ipaposi ye dada yo be imata ye i.

³⁴Le nga di tooltool malala mai tina ngan tilongo, le tiyei ne, “Am nga lomam galanga be ger ke Maro iwete nen, be Kirisi in ole iyepe nen a tala. E nga yelei a kuwete be ole tiyitmaka Tool Moolmool ke Maro nga? Ngan Tool Moolmool ke Maro in sei?”

³⁵Motong la Yesu iwete nen, “Awete pang nen, lal mooloo tiap la be sul iken kataunu yang nga. Le sul be ikenen yang nen go nga, ngan kapa ye nunngana, a be nen ngan todo idukang be. Yesoo, kumata le tool be ipa todo lono nga, ngan ole lon galanga ye ni nangai yo be ipa pang ye i, in tiap.

³⁶Le nookoot nga ye kene yo sul tani in ikenen yang go nga, ngan katara lomim medana pang sul tani a be nen ngan kayei ben sul di natunu.” Yesu iwetewete pang di tooltool tina nen a imot, motong la iyege di sila tiyepe, inbe itarkoolene ye di a ipa a ila.

³⁷Yesu iyei kaiye mos alunu a iyei ben tarkilanga panga be di tooltool tikamata, bong titara lodi medana panga pitiap yege.

³⁸Ngan iyei nen nga, ngan le lo iyei betanga ke Maro koonoo yo Esai in iwodo nga, le itar kanono moolmool. Ngan Esai tani in iwete nen, “Tool Mai, sei be itara lono medana ye betanga kiam i, inbe sei be ikamata gurana kiong yo kupapos ye urata yo kuyei nga? Tool siap yege.” 

³⁹Ngan ye punu yo titara lodi medana pang Yesu ye tiap in nen, yesoo Esai iwodo betanga san mulu in iwete nen,

⁴⁰“Maro iyei matadi le tikamata ni tiap, inbe ipammata lodi le lodi galanga ye so siap. Ole nen ngan matadi nga tikamata so ye, inbe lodi galanga ye betanga punu, ngan ole tiportak lodi a timulu pang yau a be nen ngan akarata di le dook mata.”