SAN JUAN 12:15-40

¹⁵Cadi idxibi tu, binni Sion ca'. Laguuya', zeeda Rey stitu deche ti burru huiini'.

¹⁶Qué ñene gá ca discípulu cani cayaca que. Dede dxi ru ma nuu be ibá', dxi que ru bietenala'dxi cabe maca cá irá ni lu gui'chi', ne casi cá ni que zaqué bi'ni binni laabe.

¹⁷Nuu ca binni bi'ya ra bisibani be Lázaro raqué, cayuí' ca ni.

¹⁸Ne ngue runi stale binni yechagalú laabe, purti bina diaga ca de milagru bi'ni be que.

¹⁹Oraque na ca fariseu: ―Biaa guuyu', ma qué zanda guni nu gasti'. Ma irá xixé binni guidxilayú zinanda laabe.

²⁰Laca uyé caadxi ni cadi judíu lade cani yeusisaca Dios ndaani saa que.

²¹Ne uyé ca ra nuu Felipe de Betsaida, ti guidxi sti Galilea, ne rabi ca laa: ―Señor, racala'dxi du idu'ya du Jesús.

²²Para uyé Felipe, yetidxi ni Andrés. Oraque iropa ca yetidxi ca ni Jesús.

²³Para na Jesús rabi laaca': ―Naa nga Hombre Biseenda Dios ne ma bidxiña hora usisaca be naa.

²⁴Peru gabe ca' laatu, pa qué gati ti guie xuba ora guiaba ndaani yu la? qué zache ndu, peru pa gati ni la? zandani ni ne zacá lú ni.

²⁵Tu ganaxhii xpida zuniti ni, peru tu qué izaala'dxi xpida ndaani guidxilayú ri la? cayapa ni para enda nabani ni qué zaluxe.

²⁶Ni racala'dxi gaca xpinne la? sa nanda naa, ne ra chaa la? laca zie ca xpinne' ne zusisaca Bixhoze laaca'.

²⁷Ma nuu yuuba ladxiduá'. Yanna xi inié'. Ñee zabe Bixhoze ulá naa de ni chi tide ri la? Co', purti para tide ni nga runi bidxiña dede rarí'.

²⁸Oraque na be: ―Bixhoze', bisisaca lá lu jma. Oraque ucuá ti ridxi de ibá', na: ―Ma bisisaca ni, ne zusisaca rua' ni sti tiru.

²⁹Bina diaga ca binni ni nuu raqué ridxi que, ne caadxi de laaca na rayu ni. Peru xcaadxi na ti ángel uní' né laabe.

³⁰Para rabi be laaca': ―Cadi ucuá di ridxi ri para naa sínuque para laatu.

³¹Yanna nga ma chi guiaba ná binni guidxilayú ne ma chi ilá ni runi mandar ndaani ni ti ladu.

³²Ne ora ma undisa cabe naa la? zabidxe binni gueeda ra nuaa'.

³³Ra uní' be zacá bisiá be diidxa xi enda guti chi caa be.

³⁴Oraque na ca binni que rabi laabe: ―Laadu huayuna diaga du xi na Xqui'chi Dios. Na ni qué ziuu dxi gati Cristu. Xi modo nga nou' lii, naquiiñe indisa cabe Hombre Biseenda Dios lu cruz. Tuu nga Hombre Biseenda Dios ca ya'.

³⁵Para rabi be laaca': ―Ma nagaba si dxi nuu biaani lade tu. Yanna lasá laga napa tu biaani ti cadi inaaze guelacahui laatu. Purti cani rizá ra nacahui la? qué ganna ca paraa che ca'.

³⁶Naa nga biaani ni ruzaani laatu ne laga nuaa nia laatu laguni cre naa ti chu' tu ra naya'ni'. Biluxe si uní' be ngue, biree be de ra nuu ca', yeucachi lú be.

³⁷Neca bi'ni be stale milagru nezalú ca' peru qué ñuni cre ca laabe.

³⁸Ne uca ni zacá para iree ni casi pe uní' profeta Isaías chiqué ra na: Señor iruti cayuni cre ni cayuí du ne iruti cayuuya pabiá' nandxó' Dios.

³⁹Qué ñanda ñuni cre cabe, ne laca uní' Isaías xiñee qué ñanda ñuni cre cabe, ra na:

⁴⁰Bisicheepa Dios lú cabe, ne biquidxi ladxidó' cabe, ti cadi gu'ya cabe ne qué guiene cabe, uyubi cabe laa para ulá laacabe.