San Juan 12:15-40

¹⁵¡Xicarcuun ngayun xuta Jerusalén; chutsujun ni, me xi matitjun tsujun ne, nduva me quisun me ngu burru chihndë!

¹⁶Hya xi cuatjin camá ne, xuta ladu rë Jesús ne, cajnii rcu me. Peru hya xi Jesús cama jyë cama hnga me cojo Hasen rë me ne, hya xi cavuya cjuahñu rë me hya catsinguitsjen xuta xi cuacun jan xi cuatjin camahindu tsëhë Jesús hane cuatjin jain cavatju me camá.

¹⁷Xuta xi siu cojo Jesús hya xi cajindaya me cha Lázaro xi cuetju cha tsëhë tsjun hacuaha catsicuya me cha cjuahñu ne, casua me camachaya rë jingu sa xuta hacutjin camá.

¹⁸Vëhë xi xutacjín jan ne, cavetju me quijitjengui me Jesús, tsëhë xi camachaya rë me xi casahmi Jesús cjuarcun vëhë.

¹⁹Vëhë xi cha fariseo ne, cachja cha ngajñi rë cha cojo xicjin cha cuitjin: ―‍Cahyun ni ne, tsajin mé xi cuma nihña. Chutsujun ta yëjë ni xuta ne, tjengui rë cha. ―‍Cuatjin cachja cha.

²⁰Quihndë ne, ngajñi rë xuta xi quiji me suhi xi cjuaharcun me Nina ne, hinchajñi ngujo xutaxín.

²¹Hane me xi cuacun vëhë ne, quijitjengui me Felipe, xuta Betsaida, ngu nandya tsëhë distritu Galilea, hane cuitjin cachja me: ―‍Tatá, ngayin ne, meje cuisiajmí cojo Jesús. ―‍Cuatjin cachja me.

²²Ngajan xi Felipe ne, quiji cachja me cojo Andrés, sehe catsijo ni me quiji casua me camachaya rë Jesús.

²³Ngajan xi Jesús ne, cuitjin cachja me cojo rë me: ―‍Cavechú hora xi ngahan xi Quihndi rë Xuta Jain ngahan ne, cuma jyë cuma hnga ngahan cojo hasen naha.

²⁴Cuichjá cojo nuju cjuaquixi ta ngu tú rë trigu xi cjuinengui nangui ne, sa xi cueyaain ne, ha ngu tu tu ni má yëjë nu yëjë nixtin. Peru sa xi cueya ne, jemu cjín tjë sua.

²⁵Xuta xi vangui me suvá ni xi ndaja cjuahñu rë me nguehe ngasunhndë ne, titsichajá me cjuandaja xi sua Nina me cjuahñu xatsë. Peru xuta xi marcuaain rë me tsëhë suvá ni xi ndaja cjuahñu rë me nguehe ngasunhndë ne, hatuxa sacú rë me cjuandaja xi sua Nina me cjuahñu xatsë.

²⁶Xuta xi meje cuisehen me ladu naha ne, catinduva tjengui ná me. Hane hiscan xi cuitejña ngahan ne, hacuaha ngajan cuejña me xi má ladu naha. Xuta xi má me ladu naha ne, sahmi jyë sahmi hnga Nina Nahmi naja me. ―‍Cuatjin cachja Jesús.

²⁷Cachja sa Jesús cuitjin: ―‍Quihndë ne, jemu macjín cácun. Peru ¿mé cuichjá ni? ¿Há cuichjá cuitjin: “Ngayun Nahmi naha, naxuntjun ná tsëhë xcusun xi cuátju cuma quihndë?” Peru cuichjaan cuatjin ta, tsëhë xi hatuxa canduvá xi cuatjin cuátju cuma.

²⁸Ngayun Nahmi naha, tuhun cumachaya rë xuta hacutjin jyë hnga ngayun cojo Hasen nuju. ―‍Cuatjin cachja Jesús. Ngajan xi canuhya rë ngu xta xi canduva ngajan ngahnga xi cachja cuitjin: ―‍Ha casuá camachaya rë me, hacuaha cúya suá nga cumachaya rë me. ―‍Cuatjin cachja xta jan.

²⁹Hane ngujo xuta xi hinchacun jan xi cahndë me xta jan ne, cachja me ta chuhun xi catsingá. Hane ngujo nga me ne, cachja me xi ngu ángel cachja cojo Jesús.

³⁰Ngajan xi Jesús ne, cuitjin cachja me cojo xuta jan: ―‍Hacuiin xi cuíhndë ngahan xi cachja xta vëhë ta xi cuinuhyun ngayun.

³¹Cavechú nixtin xi cuma chuva xuta cojo cjuatacun rë me. Cavechú nixtin xi cjuahatahá Nina gubiernu xi tisahmi Satanás.

³²Hane ngahan ne, hya xi tjunihnga ná tsëhë nangui ne, sahme xi xuta ne, cuisehen me ladu naha. ―‍Cuatjin cachja Jesús.

³³Xi cuatjin cachja Jesús ne, casua me camachaya rë xuta mé chuva rë cueya me.

³⁴Ngajan xi xuta jan ne, cuitjin cafayangui me tsëhë Jesús: ―‍Ngayin ne, hyin xi chja ley ta me xi Nina tsingatju rë ne, tsajin nixtin xi cueya me. ¿Hacutjin má xi nújun ngayun xi me xi Quihndi rë Xuta Jain ne, tjunihnga rë me? ¿Yo me xi Quihndi rë Xuta Jain vë ni? ―‍Cuatjin cafayangui xuta jan.

³⁵Ngajan xi Jesús ne, cuitjin cachja me cojo xuta jan: ―‍Ha tu chúva sa nixtin xi ngahan xi sacuaha hasen ngahan ne, tejña ngajñi nuju. Tángun xcun sa cojo ndiya xi ha tivangun jinguyëjë rë xi tacun sa hasen ngajñi nuju, sa tu cuechútáha nuju jñú. Xuta xi cjui me ngajñi jñú ne, hvíin me jani cjui me.

³⁶Vëhë xi jinguyëjë rë xi tejña ngajñi nuju ne, catamangu tacún cojo ná, cojo sa xi tsë rë xahasen nuju cojo cjuahasen naha. ―‍Cuatjin cachja Jesús. Hane xi cavatju cachja Jesús cjua vëhë ne, cavetju me quijihma me tsëhë xuta jan.

³⁷Handasa cavëë xuta xi jemu cjín cjuarcun casahmi Jesús ne, peru camanguaain cacun me cojo rë me.

³⁸Cuatjin camá xi cavetjucaa cjua rë profeta Isaías xi camahindu xcun xujun rë Nina hiscan xi chja cuitjin: Ngayun Nina niji, tsajin yo camacjain rë cjua xi canújin; Tsajin yo cajne rcu hacutjin xi hñu ngahñu rë Nina. Cuatjin cachja profeta Isaías.

³⁹Vëhë xi xuta jan ne, camaji camangu cacun me cojo Jesús ta, tsëhë xi hacuaha cachja nga profeta Isaías cuitjin:

⁴⁰Sacuaha ngu xuta xi tsihñu me xcun ngu nga xuta cojo sa xi cumatsijin rë me ne, cuatjin casahmi jñu Nina tsëhë cjuatacun rë xuta, cojo sa xi cuijnii rcu me hacuaha cuyaain me ladu rë Nina xi sahmi Nina xi cumandaja me.