Yon 12:15-40

¹⁵“Deŋ Saion taunde niŋ mar, kafura ma henayiŋ. Doyaŋ Al Kuruŋtiŋ kuruŋ doŋki foŋeŋ hende waŋ hi go kennaŋ,” yitiŋ hi.

¹⁶Goyenbe haŋkapyabe mata goyen goke komatmiŋ yagobe bebak ma tiyamiŋ. Goyenbe kame Yesu go Al Kuruŋ hitte mulgaŋ heŋ hurkuŋ deŋe turŋuŋ yaŋ tiriŋ kamere gab Yesu mata tiyyiŋ goke Al Kuruŋyen asaŋde katiŋ hi goyen bebak tiyamiŋ. Irde al buda kuruŋ gore yeŋ ge mata tiyamiŋ go wor gwahade po katiŋ hi goyen go bebak tiyamiŋ.

¹⁷Be, al buda Yesuya hikeya Lasarus kamyiŋ goyen yeŋ beleŋ yeke horabok metere mat huwaryiŋ go kenamiŋ mar gore gote mere momoŋ tagalde tukamiŋ.

¹⁸Irkeb al budam wor po mata tiŋeŋ turŋuŋ yaŋ forok iryiŋ goyen nuramiŋ geb, kuŋ tupi tiniŋ yeŋ kwamiŋ.

¹⁹Niŋgeb go yeneŋbe Farisi mar go yiŋgeŋ uliŋ mere teŋbe, “Ga kennaŋ! Al buda kuruŋ gabe dubul teŋ yeŋ po gama irde pasi hiniŋ tahaŋ geb!” yamiŋ.

²⁰Be, Pasoba gabu nalure Al Kuruŋ doloŋ irniŋ yeŋ Yerusalem hurkamiŋ mar bana goŋbe Grik mar manaŋ hinhan.

²¹Mel gore Galili naŋa bana niŋ taun kura Betsaida niŋ al Filip hitte wayamiŋ. Waŋbe, “Neŋbe Yesu kinniŋ wor po yeŋ nurde hite,” inamiŋ.

²²Irkeb Filip beleŋ Andru hitte kuŋ momoŋ iryiŋ. Irkeb Andruya Filipya tumŋaŋde kuŋ Yesu momoŋ iraryum.

²³Irkeb Yesu beleŋ wol heŋbe, “Ne Al Urmiŋ gayen deŋe turŋuŋ yaŋ tetek nalube gago forok yihi.

²⁴Fudinde wor po dineŋ hime, wit bilmiŋbe megeŋ bana kurkuŋ gabe kawaŋ heŋ igineŋ paya hiyyeŋ. Munaŋ gwaha ma tiyyeŋbe paya ma hiyyeŋ.

²⁵Al kura yiŋgeŋ ge po nurde hi al gobe Al Kuruŋya ma hiriryeŋ. Munaŋ al kura megen gar heŋya yiŋgeŋ ge ma nurde Al Kuruŋ niŋ po nurde hi al gobe yeŋya hugiŋeŋ hiriryeŋ.

²⁶Al kura ne niŋ meteŋ teŋ hime yeŋ nurde hi albe merene po gama irde hiyeŋ. Irdeb ne heŋde gorbe meteŋ alne wor gor hiyeŋ. Adonebe ne niŋ meteŋ teŋ hiyeŋ al goyen turuŋ iryeŋ.

²⁷“Be, bener kandukŋeŋ wor po nurhem geb, daha yeweŋ? ‘Ado, ulner kanduk forok yeweŋ tiya go faraŋ nurke ma keneŋ,’ ineŋ? Moŋ, nebe kanduk goyen go po teweŋ yeŋ wamiriŋ geb.

²⁸Ado, deŋgebe turŋuŋ yaŋ hewoŋ yeŋ nurde hime,” yiriŋ. Irkeb naŋkiŋde mat al melak kura, “Deŋnebe bikkeŋ turŋuŋ yaŋ irmiŋ, irde sopte gwaha ireŋ,” gwahade forok yiriŋ.

²⁹Irkeb al buda gor hinhan go mere goyen nurdeb, “Daga mere tiya,” yamiŋ. Munaŋ kurabe, “Al Kuruŋyen miyoŋ beleŋ mere ira,” yamiŋ.

³⁰Irkeb Yesu beleŋ, “Mere forok yihi gabe deŋ ge teŋ forok yihi. Ne niŋ moŋ geb.

³¹Be, Al Kuruŋ beleŋ megen niŋ alya bereya merem yaŋ yirtek nalube haŋka gago. Irdeb megen gar niŋ doyaŋ al Satanbe takira timeke tareŋ miŋmoŋ heweŋ tiya.

³²Goyenbe ne kuruse hende nade nisaŋ heke gab alya bereya megen haŋ kuruŋ gayen nigeŋ hitte yawayeŋ,” yinyiŋ.

³³Gwaha yinyiŋ gobe kame mata dahade mat kamyeŋ goyen yikala yire yeŋbe gogo yinyiŋ.

³⁴Irkeb al buda gore, “Neŋbe Moseyen sabarebe Mesaiabe hugiŋeŋ hiyeŋ yeke nurde hityen. Goyenbe dahade niŋgeb, ‘Al Urmiŋbe he hende kamyeŋ,’ yeŋ ha? Al Urmiŋ gobe ganuŋ?” yeŋ hitem po gusuŋaŋ iramiŋ.

³⁵Irkeb Yesube mel goya sobamde ma hiyeŋ goke maya mere mat wol heŋbe, “Hulsibe deŋya ulyaŋde ma hiyeŋ. Niŋgeb hulsi hiya gayenter po kuŋ hinayiŋ. Heŋ ga moŋ kidoma aw dureŋ tiya geb. Al kura kidoma bana kuŋ hiyeŋ al gobe gor kuŋ hime yeŋ ma po nurdeya kuŋ hiyeŋ.

³⁶Hulsi goyen deŋya hikeyabe yeŋ ge dufaytiŋ tareŋ irnayiŋ. Gogab deŋbe hulsi bana heŋ mata igiŋ teŋ teŋ mar henayiŋ,” yinyiŋ. Be, Yesu go meremiŋ pasi irdeb al buda go yubul teŋ kuŋbe nennak yeŋ bana kuriŋ.

³⁷Be, Yesube mata tiŋeŋ turŋuŋ yaŋ goyen Yuda mar diliŋyaŋ wor po forok yirde hinhin gega, yeŋ ge dufaymiŋ saŋiŋ ma irde hinhan.

³⁸Go teŋ hinhan gobe Al Kuruŋyen mere basaŋ al Aisaia beleŋ kame gwahade forok yiyyeŋ yeŋ kayyiŋ goyen po forok yeŋ hinhan. Merebe gahade: “Doyaŋ Al Kuruŋ, mere tagaltekeb ganuŋ beleŋ fudinde yeŋ nurde haŋ? Hubu wor po! Irdeb ganuŋ mar hitte Doyaŋ Al Kuruŋ beleŋ tareŋmiŋ goyen yikala yiryeŋ? Hubu wor po!” yitiŋ.

³⁹Niŋgeb Aisaia beleŋ yitiŋ gwahade goyen po, mel gobe dufaymiŋ yeŋ ge tareŋ ma po iramiŋ. Mel gote matamiŋ goke Aisaia beleŋ mere hoyaŋ kura gahade kayyiŋ:

⁴⁰“Yeŋ beleŋ mel gote diliŋbe titmiŋ yiryiŋ. Irde biŋbe pet tiyyiŋ. Niŋgeb diliŋ gore epte ma naŋkennayiŋ. Irde biŋ go gereŋ ma yeke epte ma bebak tinayiŋ. Irde ne hitte mulgaŋ ma henayiŋ. Moŋ manhan ne hitte mulgaŋ heke sope yirmewoŋ,” yitiŋ.