Yuhana 12:15-40

¹⁵“Na uwa lanza fiu ba, fe ushonon Sihiyona; yenen Ugo mine din cinu, assosin kitene kajaki kabene.”

¹⁶Na nono katwa me wa yinin ileli imone nin cizune ba; ama na iwa ti Yesu ku gongong, ilizino nworu ina nyertin ileli imone litime inung ani nsughe inin.

¹⁷Nene ligozin nanite na iwa di nin Yesu kube na awa yicila Laazaru ku a fyaghe nanya kissek, inung wa belu among.

¹⁸Bara nanere wati ligozin loli wa nuzu lidi zuro ninghe bara na iwa lanza asu ileli imone.

¹⁹A farisawa woro nati mine, “Yenen, iwasa ita imonmong ba; uyii vat din dortughe.”

²⁰Among a Helenawa wa di nanya na lenge na iwa do nsujada kitin nbuke.

²¹Inughe do kitin Filibus, ulenge na awa nuzu Nbaitanya Ngalili, itiringhe, iworo, “Cikilari tidi ninsu tiyene Yesu ku.”

²²Yesu do adi bellin Andirawus ku, Andirawus nin Filibus do idi belin Yesu ku.

²³Yesu kawa nani, aworo, “Kube nda nworu iti Usaun Nnit gongong.

²⁴Kidegenere ndin bellu minu, se fimus ficikapa ndeo kutyin fiku, andi na nani ba, fiba lawu finin firume; ama andi fiku, fima nin maru imong iyip gbardang.

²⁵Ame ulenge na adi nin su nlai me ama diru unin; ame ulenge na anari ulai me nanya nle uye ma ciu unin ucin du ulai nsa ligan.

²⁶Andi umong din sui katwa, na a dortui; kiti kanga na nduku, kikanere kucin ning ma yitu ku wang, andi umong din sui katwa, Uci ning ma ni unit une tikunang.

²⁷Ayi ning nana nene; Iyaghari mma bellu? 'Ucif sui utucu nanya kubi kone?' Bara ile imonere nda ko kube.

²⁸Ucif, ta lissafe gonggong,” Liwui nuzu kitene kani liworo, “Nna ti lining gongong, nma kur nti lining gongon tutung.”

²⁹Ligozin nanite na iwa yissin kitene wa lanza i woro Kutelle tuto. Among woro, “Gono kadura Kutelleari nlirina ninghe.”

³⁰Yesu kawa a woro, “Na liwui lole nda bara Menghari ba, ama bara anughere.

³¹Nenere idin shara in yii ulele; Nene ima ko unan tigo nyii ulele.

³²A Meng, asa ifyi nanya kutyin, nma wunnu anit vat udak kitining.”

³³Awa bellin nani adurso imus nkul ule na uma seghe.

³⁴Ligozin kawaghe, iworo, “Tina lanza nanya nduka Kristi maso sa ligang. Iyiziari uworo, 'Ima fyu Usaun Nnit kitene gbas? Ghari Usaun Nnit une?”

³⁵Yesu woro nani, “Nkanang du kiti mine nin kubi bat. Sun ucin a nkanang dutu kiti mine, ana nsirti nsa da duru minu ba. Ulenge na adin cinu nanya nsirti na ayiru kiti kanga na adin cinu udue ba.

³⁶Yinnan a idutu nin kananghe, inan so nonon kanang.”

³⁷Vat nin nimon izikiki gbardang na Yesu wa su nbun mine, vat nin nani na iyinna ninghe ba.

³⁸Bara ulirun Ishaya unan liru nin nuu Kutelle nan kulo, ule na awa woro: “Cikilari, ghari nyinna nin liru bite? Ucara Ncikilari ndurso liti kiti ghari?

³⁹Bara ilenge imone na iwa yinnin ba, Ishaya wa kuru a belle.

⁴⁰“Ana ti idu niyizi mine, amini na kuru ata nibinai mine getek; andi na nani ba, ima yenju nin niyizi mine, ikuru iyinnin nin nibinayi mine, inin kpilin, Meng nin shin ninghinu.”