Juan 12:15-40

¹⁵Ira ixbꞌacta, ajchinamox tuaꞌ e chinam Sión xeꞌ jax e Jerusalem. Chꞌujcunic iwira que watar Iwajcꞌotorer war aturuan tama upat inteꞌ chuchu chij, xeꞌ che tama uyojroner e Dios.

¹⁶Pues conda numuy tunor era uyajcanuarobꞌ e Jesús machi unatobꞌ tucꞌa war che tunor era. Pero conda tꞌabꞌay ixin e Jesús tut e qꞌuin cꞌotoy unatobꞌ. Pues cꞌajpa umenerobꞌ que tunor lo que numuy tama e Jesús chꞌar tzꞌijbꞌabꞌir tama uyojroner e Dios. Y bꞌan cocha chꞌar tzꞌijbꞌabꞌir y bꞌan numuy.

¹⁷Pues tunor tin e turobꞌ taca e Jesús conda upejca e Lázaro tama umujr tuaꞌ usuti ubꞌixqꞌues tujam e chamenobꞌ cay uchecsu tunor lo que uwirobꞌ tic taca tiaꞌ ixiobꞌ.

¹⁸Y tamar era locꞌoyobꞌ meyra gente tama e chinam era tuaꞌ axin utajwiobꞌ e Jesús tama e bꞌir porque cay uyubꞌiobꞌ que sujta bꞌixqꞌuesna e Lázaro tujam e chamenobꞌ umener.

¹⁹Y e fariseobꞌ cay ojronobꞌ jaxobꞌ taca y chenobꞌ: —Chꞌujcunic iwira que non mix tucꞌa tuaꞌ cache taca e sian gente era porque tunorobꞌ war uyactonobꞌ tuaꞌ axiobꞌ tupat e winic era, che e fariseobꞌ era jaxobꞌ taca.

²⁰Pues tujam e sian gente xeꞌ cꞌotoyobꞌ tama e chinam Jerusalem tama e nojqꞌuin era ayan cora gente xeꞌ tariobꞌ tama inteꞌ lugar griego ubꞌan.

²¹Y cꞌotoyobꞌ tut e Felipe xeꞌ jax inteꞌ ajcanuar tuaꞌ e Jesús xeꞌ tari tama e chinam Betsaida tama e departamento Galilea. Pues jaxirobꞌ ojronobꞌ tacar y chenobꞌ: —Cꞌani ani cawira ut e Jesús, che e winicobꞌ griego era.

²²Entonces ixin e Felipe tuaꞌ uyare e Andrés, y ixiobꞌ chatertiobꞌ tuaꞌ uyareobꞌ e Jesús.

²³Y che e Jesús: —War acꞌotoy e hora conda nen xeꞌ Uyunenen e winic cꞌani insutpa inxin tut e qꞌuin.

²⁴Cꞌani inwareox era que jay machi apajcꞌa ingojr ut e trigo tama e rum tuaꞌ oꞌcꞌoy upat y acuxpa ut, aquetpa ingojr taca ut. Pero jay apajcꞌa y oꞌcꞌoy upat y acuxpa ut, meyra sian ut tuaꞌ uyajcꞌu tama ingojr ut trigo era.

²⁵Pues tin e uyajta ut ucuxtar tara tor e rum axin usati ucuxtar era. Pero tin e machi uyajta ut ucuxtar tara tor e rum machi tuaꞌ usati e cuxtar xeꞌ machi tuaꞌ acꞌapa.

²⁶Y tin e cꞌani uche nipatnar ucꞌani tuaꞌ acꞌupseyan tut niwojroner, y tiaꞌ turen nen yajaꞌ tuaꞌ aturuan tin e war uche nipatnar ubꞌan. Y Nitata cꞌani utattzꞌi tunor tin e war uche nipatnar, che e Jesús.

²⁷Entonces ojron e Jesús y che: —War intzꞌintzꞌa tama niwalma. ¿Y tucꞌa tuaꞌ inware era? ¿Cꞌani ca inware que: “Nitatet, corpesen tamar lo que aquetpa tuaꞌ innumse nibꞌa era?” Machi, porque tamar era tarien tor e rum.

²⁸Nitatet, chectes atawarer tut e gente era, che e Jesús. Y de allí cay uyubꞌiobꞌ inteꞌ nuxi nuc xeꞌ tari tut e qꞌuin xeꞌ che: —Inchectesix nitawarer tut e gente, y cꞌani inchectes otronyajr era, che e nuc xeꞌ tari tut e qꞌuin.

²⁹Entonces cay ojronobꞌ e sian gente xeꞌ turobꞌ era y chenobꞌ: —Bꞌajcꞌat quiricna ut e qꞌuin era, chenobꞌ. Pero ojronobꞌ e inmojr gente y chenobꞌ: —Jax inteꞌ ángel xeꞌ cay ojron taca e Jesús, chenobꞌ e inmojr era.

³⁰Entonces che e Jesús: —E nuc xeꞌ tari tut e qꞌuin machi tuaꞌ utacren innata chien nen, sino tari tuaꞌ utacriox ixcꞌotoy inata chien nen.

³¹Cꞌotix e hora tuaꞌ aꞌrobꞌnobꞌ e gente tara tor e rum que ucꞌani tuaꞌ ajajtzꞌobꞌ, y cꞌotix e hora conda cꞌani aloqꞌuesna e diablo xeꞌ war ani acꞌotori tara tor e rum.

³²Y conda nen inxin inchꞌubꞌna tut e cruz cꞌani axin apejcna uyalmobꞌ tunor e gente tara tor e rum tuaꞌ acꞌotoy acꞌupseyanobꞌ tamaren, che e Jesús.

³³Y tamar era cꞌotoy unatobꞌ cocha tuaꞌ achamay jaxir.

³⁴Pero ojronobꞌ e sian gente era taca e Jesús y chenobꞌ: —Coybꞌix tama uley e Moisés que e Cristo ma tiaꞌ tuaꞌ axin achamay, y que cꞌani aturuan iraj iraj. ¿Y tucꞌa tuaꞌ war awareon que Uyunen e winic axin achꞌubꞌna tut inteꞌ cruz tuaꞌ achamesna? ¿Y chi Uyunen e winic xeꞌ war awareon tamar? che e gente era.

³⁵Entonces che e Jesús: —Coner ayanto e janchꞌaquenar tijam nox, pero mix jax tama meyra tiempo tuaꞌ inturuan tacarox. Y tamar era war inwareox que xanenic conda ayanto e janchꞌaquenar tiut bꞌajxan que e incsibꞌaner axin umaquiox. Porque tin e axana tama e incsibꞌaner machi war unata tiaꞌ war acꞌotoy.

³⁶Turbꞌanic ibꞌa tuaꞌ ixcꞌupseyan tama e janchꞌaquenar conda turuto tacarox tuaꞌ uyubꞌi aquetpa e janchꞌaquenar era tama iwalma, che e Jesús. Conda cꞌapa ojron cocha era locꞌoy e Jesús tujamobꞌ y ixin mucwan cora tutobꞌ, porque cꞌani aquetpa ubꞌajner.

³⁷Pues entonces e Jesús cay uche meyra milagro tut e gente tuaꞌ e Israel pero machi ixto cꞌani acꞌupseyanobꞌ tamar.

³⁸Pero ucꞌani tuaꞌ acꞌapa achempa lo que chꞌar tzꞌijbꞌabꞌir umen e profeta Isaías tiaꞌ che que: Niwinquiraret, mamajchi cꞌani acꞌupseyan tama e ojroner ticabꞌa, y nien machi cꞌotoy unatobꞌ tucꞌa era conda uwirobꞌ acꞌotorer, che tama e Isaías.

³⁹Y cocha bꞌan chꞌar tzꞌijbꞌabꞌir tama uyojroner e Dios y bꞌan numuy que e gente machi cꞌotoy cꞌupseyanobꞌ tama e Jesús tama e hora era. Pero ayanto lo que chꞌar tzꞌijbꞌabꞌir umen e Isaías tiaꞌ che:

⁴⁰E Dios ixin umaqui unacꞌutobꞌ tuaꞌ machi eꞌronobꞌ, y uche aquetpa sispanen uyalmobꞌ tuaꞌ machi acꞌotoy unatobꞌ lo que war achecsuna tutobꞌ, y tuaꞌ machi asutpobꞌ tut e Dios tuaꞌ atzꞌacnobꞌ umener, xeꞌ che tama e Isaías.