Yohana 12:15-40

¹⁵“Sekeudumbe, isi ya Sayuni! Hano kokwiza Mndewa wako, yakwelile mumgongo wa mwana mhunda.”

¹⁶Kipindi acho wanahina zake hawaijuwile mbuli ino. Lakini Yesu viyenuligwe muukulu, wakumbuka kamba Maandiko Gang'alile galonga mbuli ino na wamtendela kamba vivo.

¹⁷Wanhu wakalile na Yesu kipindi viyamkemile Lazalo kulawa mdipanga na kumzilibula kulawa kwa wafile, wakala wogabwililisa gaja galawilile.

¹⁸Lekaavo lunhu lwa wanhu luchola kumbokela, kwavija luhulika unzonza uno uyatendile.

¹⁹Abaho Mafalisayo wailongela, “Mona, hatudaha kutenda chochose! Loleni wanhu wose wa mwiisi womkweleleza!”

²⁰Wagiliki wayagwe wakala mumo mna iwanhu wacholile Yelusalemu kutambika mna ikipindi cha nyimwili nyimwili ya Pasaka.

²¹Wachola kwa Filipo mwenekae wa Betisaida mwiisi ya Galilaya walonga, “Go mkulu, tolonda tumone Yesu.”

²²Filipo kachola na kumulongela Andeleya, abaho wose wabili wachola kumulongela Yesu.

²³Yesu kawedika, “Sambi kipindi kivika cha Mwana wa Munhu kubokela ukulu.

²⁴Nowalongeleni ukweli, mhule ya uhemba yosigala imoja siku zose mbaka ilagale hasi ife. Ila yahafa baho yolela na kuwa mhule nyingi.

²⁵Munhu yoyose younogela ugima wake kowagiza, lakini munhu yoyose yowihila ugima wake mwiisi ino kowika kwa ugima wa mazuwa gose.

²⁶Munhu yoyose yolonda kuwa msang'hanaji wangu kolondeka yanikweleleze, avo msang'hanaji wangu kokuwa na niye aho honda niwe. Tatangu komgwaa nhogolwa munhu yoyose yonisang'hanila.

²⁷“Sambi loho yangu yoluma, vino nongeze? Nonge, ‘Tata, sambiutende kipindi kino kivike kumwangu’? Lakini lekaavo niza ili nibite kipindi kino cha madununzo.

²⁸Tata, uditogole twaga jako!” Abaho sauti ihulikigwa kulawa kuulanga, “Niditogola, na notenda vivo kabili.”

²⁹Lunhu lwimile aho luihulika sauti ayo, na wanhu wayagwe walonga, “Mulungu kaduma.” Kuno wayagwe walonga, “Msenga wa kuulanga kalonga nayo!”

³⁰Lakini Yesu kawalongela, “Sauti ino haihulikigwe mbuli ya niye, lakini mbuli yenu.

³¹Sambi acho kipindi cha wanhu wa mwiisi ino kutagusigwa, na Mwenembago mkulu wa mwiisi ino kokwasigwa.

³²Kipindi nahenuligwa uchanha kulawa hasi, nomkwega kila munhu kumwangu.”

³³Kwa ulonzi uno Yesu kalagusa ifa yonda yafe.

³⁴Lunhu lwa wanhu lumwidika, “Malagizo getu gotulongela kamba Kilisito Mkombola kokuwa mgima siku zose. Habali kabili gweye kolonga Mwana wa Munhu kolondeka yenuligwe uchanha? Vino ino Mwana wa Munhu ayo nani?”

³⁵Yesu kawedika, “Mulenge wokala na mweye kwa kipindi kidodo. Gendeleleni na mwanza kung'hali na mulenge muladi ziza sekediwezile, kwavija munhu yotembela mdiziza hajuwa kuja kuyochola.

³⁶Utogoleni mulenge baho mulinao muladi muwe wanhu wa mulenge.” Yesu viyamambukize kulonga avo, kasegela, wanhu hawamonile.

³⁷Hamoja Yesu kasang'hana unzonza mgameso gao, lakini hawamtogole bule.

³⁸Avo kiyalongile mtula ndagu wa Mulungu Isaya kilawilile. “Mndewa, nani yatogole usenga wetu utulongile? Vino Mulungu kalagusa udahi wake kwa nani?”

³⁹Avo hawadahile kutogola, kwavija Isaya vivija kalonga,

⁴⁰“Mulungu kagafumba meso gao kazifunga nzewele zao, muladi meso gao sekegadahe kulola, na nzewele zao sekezidahe kujuwa. Sekewanibwelele niye, Mulungu kolonga, na niye nidahe kuwahonya.”