Jon 12:15-40

¹⁵“Aha lau badu Sayon, aha sanoh. ‘Aha kanyolom, kabin taha eme ai. Iy eme, iy manyah udu bwele-e donki ari ndramak bamanyah ba-en bwele-en bwena bwe.’”

¹⁶Ma bwena handru oro lau tan bala tanan ta saba lakou handru, nane iy amekes, bwe. Udu hamon ja ta Jises iu ili hamon ili kandrah, eme oro barabudon iri sahou marakon nane udu bolo buk ndrabun asehek ili badan, ma iri lakou rayah doh oro ndramekes ndrala tan ale.

¹⁷Iri lau marakon ado hawe Jises ndranyolom iy mene aloh Lasarus udu bolo lek tan eme len, ma mete-ei iy nane imek, amak ja. Iri ame, tiyani sahou ili bolo kon mara-ei.

¹⁸Eme ma lau solo-an labai ala ta anyolom iy, tasah iri ndranuhun iy mene amekes kalem.

¹⁹Eme iri Parasi asehek sahou ndrokowa iri, “Taha kanyolom, budon tataha nane basahan bamwenen bwai. Tasah, lau marakon badu kon munyak ndra-en hamon tan!”

²⁰Oro Grik rayah ado bolo iri nane ala ta salom ta nyamon tinan doh ale.

²¹Oro ala hawe Pilip, iy badu kon Betsaida udu loboho Galili, oro ame tiye iy, “Ndramak tinan, aso anya katou Jises.”

²²Pilip eme tiye Enduru, oro adek ala. Eme uru ala tiye Jises.

²³Jises eme tiye toro, “Len dah ndrasahan ta Nadu Ndramak Awas kameh akohok lomadan.

²⁴Jo tiye tado handru, i buku badu kalom ari bataku bala bwele-e munyak bwe, ma iy bamak bwe, badun ari le udu. Arile, i buku iy imek, idah kameh iy asahan ma iy ato-ou salin solo-an labai.

²⁵Iy are lau iy atehei budon ma kohan amwenen in ta munyak dah tinan labai, kohan kameh ano laleyah. Arile, buku are lau iy batehei budon ma kohan amwenen ba-en ta munyak dah bwe, kohan kameh winiyan bano bwe, kameh udu le buku doh.

²⁶Are lau iy anya kamekes gok tek, iy badeh, ki-in le hamon tek, eme ma kon heh jo udu aliy, iy kameh udu hawek ale. Buku are lau iy amekes lahou tek, tama kameh atehei lomadan tinan ili tan.”

²⁷Jises asehek sahou ja i buku doh, “Len dah jo tikisiy handru labai, ya jo kasehek saba lakou? Jo katiye anya, tama, ou winiyan sebenei jo na bolo len dah deh? Ndri-iy ai, tasah jo eme dah ta ili bolo iri sisi-in.

²⁸Tama, ou bwidi nyara lomadam kili tinan.” Jises asehek sahou ano le badeh, boho ndramak ari asehek sahou udu bolo kandrah eme andri i buku doh, “Jo ndrabwidi nyara lomadak ndra tinan ndrano. Idah kameh jo kamekes ja.”

²⁹Iri lau solo-an nane ales ale ado mirihik, anuhun boho ndramak doh. Eme iri lau rayah anya, “Idoh kuruh.” Iri lau rayah ja anya, “Idoh angelo asehek sahou i tan.”

³⁰Arile Jises eme tiye i tiri, “Sahou nane ta aseben jo bwe, sahou ta aseben aha amwenen.

³¹Na len idah kameh Kindrei atehei lau marakon badu kon munyak a ta sahou; na idah kameh iy tikahei kabin badu kon munyak dah iu.

³²Na idah jo udu kon munyak, arile hamon kameh iri tutuni jo ere loken, ma jo kameh aruwi iri lau marakon ame le hawek.” (

³³Iy asehek sahou doh ta leheya san, ta iy kameh imek i buku sah handru.)

³⁴Iri lau marakon tiye, “Ahi ndranuhun udu ndra bada kandriyen malen ta Moses mene edeu, ‘Mesaya kameh winiyan bamak bwe, iy kameh udu le buku doh.’ I buku sah handru ou asehek anya, ‘Nadu Ndramak Awas kameh iri tutuni iy ili loken bada kei tondreh’? Nadu Ndramak Awas–Iy are lau handru?”

³⁵Ano Jises tiye i toro, “Aha kameh lomada sun udu hawe aha luluwen sese. Aha kadek ma sun, tasah iy udu ndra hawe aha kahis. Kora-on lulik katubuluhi aha. Are lau iy edek bolo lulik, iy bala tanan ta iy ilih heh handru.

³⁶Aha katehei budon taha marakon kili le ta lomada sun, buku iy udu ndra hawe aha, ma aha kameh asahan nadu lomada sun.” Jises asehek iri sahou doh ano le, iy ruwani iri ado, iy iu aton ta mada iri lau.

³⁷Iri lau marakon nane doh anyolom Jises amekes iri kalem solo-an labai, arile iri ari batehei se budon tiri bala tan bwai.

³⁸Eme ma sahou ta propet Aisaya mene asehek, eme asahan handru: “Laban, are lau handru atehei budon tan in ta sahou tam aso ndrasehek? Ya are lau handru ndranyolom ou amekes iri lahou tinan?”

³⁹Iri winiyan batehei budon tiri bala ta Jises bwe, tasah propet Aisaya ndrasehek:

⁴⁰“Kindrei ndrabwidi mada iri ndralik, ma iy ndrawahei budon tiri, eme ma iri winiyan banyolom, ma winiyan bala tanan ta kati iri lakou mwasin Kindrei amekes bwe. Kindrei anya, ‘Iri kameh winiyan bame hawek ja bwai, ta bwidi iri kamwenen ja.’”