Johanningundru 12:15-40

¹⁵“Wata japali nganau Zionani ngatamurajai, mai, Kapara jinkani wokarala wapaia donki kuparani dukaterina!”

¹⁶Jenia milieli nunkanali ngopera wata ngujamana wonti, a-ai, jendranguta Jesujeli pirnaia nunkani matja manina, ngadani tanali ngundrana wonti, tananapini nunkangundru dakana wonti, ja tanali nunkangu jenia ngankanala.

¹⁷Kana wolarali tana nunkangunto nganana, Nulu Lazarus narikutundru karkana paraia ja nina narindru jiritjibana paraia, jenia tinkari ngankana wonti.

¹⁸Jendrangundruja bakana kana wolara nunkangu mandurina wonti, ngangau tanali ngarana warai, Nulu ninapini malka ngankana paraia.

¹⁹Pharisaiali ngankamalina wonti: “Jura najiai, jenia jurangu baku nganai; mai, kana warupoto nunkangu wapantina warai.”

²⁰Naka Grieka kana palpa nganana wonti tanangundru, tana milingeru tarana wonti ditji pirnani ngatjila.

²¹Tanapini Philippungu wokarana wonti, nau Bethsaida Galilaiandru nganana wonti ja nunkangu ngatjina wonti ja jatana wonti: “Kaparajai, ngaiani ngantjai Jesus najila.”

²²Philippus wokarai ja Andreangu jenia jatai; ja Andreas ja Philippus jenia nakaldra Jesungu jatai.

²³Jesujeli kalabana wonti ja tanangu jatana wonti: “Ditji matja wokarana warai, Kanaia Ngatamura pirna pantjinanto.

²⁴Morlalu, morlalu, ngani jurangu jatai: Buka tandra matja mitani purina wata palinani, nau kulnulu parai; nau matja palinani, nulu tandra marapu punkibai.

²⁵Warle tepi nunkani ngantjai, nulu nina tintala nganai; ja worana nunkani tepini kalakalariai nunkangupini mitani, nulu nina tepi nguralia ngamalkala nganai.

²⁶Worana mili ngakani nganai, nau ngakangu karipateriatimai, ja woderi ngani nganai, jerra bakana mili ngakani nganala nganai; ja worana mili ngakani nganala nganai, nina Ngaperali ngakanali pirna ngundrala nganai.

²⁷Ngani mungara karari ngaratutututungai. Ja mina ngani jatananto? Ngaperiai, nunkangupini ditjindru ngana kulkamai! Windri jendrangundruja ngani nunkangupini ditjni wokarana warai.

²⁸Ngaperiai, tala jinkani pirna ngankamai!” Ngaiala kulno pariwilpandru wokarana wonti: “Ngato ninaia pirna ngankana warai, ja ninaia nakaldra pirna ngankala nganai,”

²⁹Kana wolara tana jerra terkana ja ngarana, jatana wonti: Talara piltripiltri nganana warai; palpa jatana wonti: “Angela kulno nunkangunto ngankamalina warai.”

³⁰Jesujeli kalabana wonti ja jatana wonti: “Naupini ngaiala wata ngakangundru, a-ai, jurangundru pantjina warai.

³¹Karari nunkangupini mitani puntibani nganai; karari Nulia nunkanipini mitaia kapara narrala nganai.

³²Ja ngani mitandru matja miri ngananani, ngato warupotopratjana ngakangu parumala nganai.”

³³Jenia Nau jatana wonti wondrala, mina nari Nau palinanto.

³⁴Kana wolarali nunkangu kalabana wonti: “Ngaiani jirijiribani jaurandru ngarana warai, Christus ngurali ngamala nganai; ja worderu jidni jatai: Kanaia Ngatamura miri pantjinanto? Worana Naupini Kanaia Ngatamura nganai?”

³⁵Jesus tanangu jatana wonti: “Windri miljaru wordu morla praitji jurangunto nganai. Wirarianau jeruntjaia jura praitji ngamalkai, ngangau ngalpurali jurana pataiati. Ja worana ngalpurani wirariai, nau wata milkila wodajeri nau wapai.

³⁶Jeruntjaia jura praitji ngamalkai, praitjani morlalu ngundranau, ngangau jura praitjaia kupa pantjinanto.” Jenia Jesujeli kaukaubana wonti ja wapana wonti ja tanangundru kurukurumalkaterina wonti.

³⁷Nulu jeruntja malka tanangu milkini ngankana wonti, ja tanali nunkangu wata morlalu ngundrana wonti,

³⁸Ngangau Jesaiani Prophetaia jaura morlalu pantjinanto, nina nau jatana wonti: “Kaparajai, warle ngaianinani ngujangujarani morlalu ngundrana warai? Ja worangu Kaparaia nguna tinkari pantjina warai?”

³⁹Jendrangundruja tana ngandandarina wonti morlalu ngundrala, ngangau Jesaias nakaldra jatai:

⁴⁰“Nulia tanani milki butju ngankana wonti ja tanani ngara ngurunguru ngankana wonti, ngangau tanali milkieli wata najinanto ja ngarali wata ngujamananto ja madlentjandru karitjinanto, ngato tanana tepi ngankananto.”