Ioanes 12:15-40

¹⁵“Mua o huriki a bakovi o Sion naha ni mangenge. Mu masia a hariki ne mua i valai ngane, i rike na tuna donki.”

¹⁶Muga e huriki a murimuri i uka ma ri matakilala a maka maki nga. Pali muri, na tahuna e Isu i mahuri mule na matenga, a Vure i vakabagetua, ri matakilaka vona ngane a ngava ri taki ne Isu, a maki ri ratea ne Isu, ni here puru hosi virihi mai ia.

¹⁷E huriki ri turana na tahuna i gale tala e Lasarus na lovo, i vakamahuri mulea na matenga, i uka ma ri malo ni vakalongo lae e huriki vona a maki ri masia.

¹⁸E huriki ala kupo ri longoa i rata a nivakasiri iea, ri lokovonga ri tagui ia.

¹⁹Lakea e huriki a Pariseo ri vata, ri ta maea, “Mu masia, ngane bara i uka tara maki si gi ratea. I mata manga e huriki lobo ri muri vona ngane!”

²⁰E huriki a bakovi na tanga e Gris ranga ri turana e huriki ri sike na habu ne vona ni kavurikea a Vure.

²¹Ri valai ne Pilip, ra bakovi o Betsaida na tabeke ne Galili, ri takia, “Bakovi dagi, mi ngaru ni matai e Isu.”

²²Lakea e Pilip i vano i takia e Andreas. Muri ru vano ru vakalongoa e Isu.

²³E Isu i koli, i ta maea, “Ngane i tabukoi a Vure ge vakabagetu iau, a Tuna Bakovi.

²⁴A taki muholi mua, na tahuna a bakovi i varo a vutuna vit, i mate a vutuna vit, i gaga, i koru rike, i vakabele a kanena i kupo. Pali a vutuna vit i uka ma ni gi varo, i uka ma ge vakabele tabu a kanena.

²⁵E rei a viri i ngaru hateka a nimadena, bara i mate. Pali e rei a viri i marikoi a nimadena koea na malala, bara i mahuri vakaroro muri ma.

²⁶E huriki ri ngaru ge ria a vora nau, ri gi muri nau. Lakea bara ri made turagu na hini ga made vona. E Tata bara i kavurike e huriki ri rata a leho nau.”

²⁷E Isu i ta rike tabu, i ta maea, “Ngane i mava a hategu, pali ga ta navai? Ga ta maea, ‘O Tata, o korimule iau na nimadihi iea?’ Pali i uka ma ga ta mavonga a vuhuna iau a valai ga bolea a nimadihi iea.

²⁸O Tata, ge bagetu a ramu.” Muri a lohona viri tara i ta valai na hunu i ta maea, “Iau, a ragu ni vakabagetu pali. Pali ga ratea ge bagetu tabu.”

²⁹E huriki vonga ri longoa ri taki ta a hini i kururu. Pali i ranga e huriki ri taki ta a agelo i ta turana.

³⁰Lakea e Isu i taki ria, i ta maea, “Ra lohona viri mu longoa, i uka ma ne vona ni tuhori iau. A ngava nga ne vona ni tuhori mua.

³¹Ngane a Vure ge pelekado e huriki, ge lili talea a matakari na malala.

³²Pali iau, na tahuna ni gi bole rike iau, ga tuli valai nau e huriki lobo.”

³³I taki a ngava nga, ta ge vakalongo a naro ge mate vona.

³⁴Lakea ri ta rike, ri ta maea, “Mi gia na vinara, e Kristo bara i valai ge made vakaroro. Pali i navai o ta maea ke, ‘A Tuna Bakovi ni gi bole rike?’ E rei ra Tuna Bakovi iea?”

³⁵Muri e Isu i taki ria, i ta maea, “Mua bara mu tahoka a nipara na parava popote kunana. Mu laho na tahuna mu tahoka a nipara, ma ge puru a uvo. A bakovi i laho na uvo i uka ma i lohoka vona a hini ge lakea vona.

³⁶Ngane mu tahoka a nipara. Mu luhoi tora a nipara na tahuna i tabuli, ge mua e huriki a tuna nipara.” Na tahuna i vakaloboa a nitana, i pe ria i kapiloho ne ria.

³⁷E huriki a Iuda ri matai a maka nivakasiri e Isu i rata, pali i uka ma ri luhoi torea,

³⁸ge bele muholi a nitana propet e Isaia i here puru hosi, i ta maea, “Bakovi Dagi e rei i longo mai a ngava mi taki ria vona? E Bakovi Dagi i vakasiri ne rei a nitora vona?”

³⁹Lakea ri keri ni luhoi torea, a vuhuna e Isaia a propet i here tabu, i ta maea,

⁴⁰“I vakakepa a matane ria, I vakamalupa a hatene ria, i uka ma ri gi matakilaka na maki, i uka ma ge palala a gine ria, i uka ma ri gi pulo a vilone ria, lakea i uka ma ga vakamahuri ria.”