Yohane 12:15-40

¹⁵“Mleke kupfuka, iwanu we Sayuni, Imndewa wenu kakutsa, kadina imwana punda.”

¹⁶Mwanduso iwanang'ina wake ng'awamanyile bae mbuli tsino. Lekeni Yesu hayatsilihuke na kutunitsighwa, iwanang'ina wakumbuka Ghamaandiko Mahenzeluka ighalongile mbuli tsake na ka wanu wamtendela pfinu apfo.

¹⁷Iwanu iwakalile na Yesu hayamkemile Lazali kulawa mne likabuli na kumtsilihula, walonga aghala ighalawile.

¹⁸Iwanu wengi waghenda kutingana na Yesu kwaapfila tsawahulika Yesu katenda chihulo.

¹⁹Apfo Mafarisayo welongela, “Mlole, ng'atudaha kutenda chochose. Iwanu wose womuwinza!”

²⁰Kukala na Wagiriki wengi mne iwanu iwatsile Yerusalemu kutamanila mne ichihungo cha Ipasaka.

²¹Wamghendela Filipi, iyalawile Betisaida mne isi ya Galilaya wamlongela, “Mkulu, twobama tumwone Yesu.”

²²Filipi kaghenda, kamlongela Andereya, kuya wose weli waghenda kumlongela Yesu.

²³Yesu kawedika, “Chipindi chipfika che Imwana we Imunu kutunyighwa!

²⁴Nowalongela ghendo, ka mbeghu ye uhemba ng'ailaghale mdongo na ukufa, yokala pfipfo imwe iliyeka. Lekeni ing'afa na ukota, itsokweleka mbeghu bwelele.

²⁵Imunu iyounoghela ughima wake katsowaghitsa, ila imunu iyouhila ughima wake katsokwing'ighwa ughima we ghamatsuwa ghose.

²⁶Imunu wowose iyobama kunitumikila yaniwinze, hohose hanikala imtumwa wangu akale baho. Aba wangu katsomtoghola imunu iyonitumikila.

²⁷“Sambi ghumoyo ghwangu ghwoghanzika, na nene nonge choni? ‘Aba unikombole mne chipindi chino?’ Bae, acho chicho chanitsile, nibite chipindi chino cha maghayo.

²⁸Aba, litunye taghwa lyako!” Kuya litsi kulawa kulanga lilonga, “Nilitunya na nitsolitunya keli.”

²⁹Iwanu wengi iwemile hala wahulika litsi lila, iwanu wangi walonga kukala na mdumo, lekeni iwanu wangi walonga, “Malaika kalonga naye!”

³⁰Bali Yesu kawalongela, “Litsi lino ng'alinitsile nene bae lekeni liwatsilani mwemwe.

³¹Chipindi cha kuhighighwa isi ino chipfika, mkulu we isi ino katsowingighwa.

³²Hanitsokwinulighwa muisi, nitsowakwegha iwanu wose kuna nene.”

³³Yesu kalonga pfino kulangusa pfayatsokufa.

³⁴Mtingano we iwanu wamghutsa, “Ghamalaghitso ghetu tsaghalonga Kiristu katsokala ghamatsuwa ghose. Ule lelo kwolonga ‘Imwana we Imunu kobamighwa yenulighwe?’ Apfi Imwana yuno we Imunu nani?”

³⁵Kuya Yesu kawalongela, “Mtsokala ne ghumwanga kwa chipindi chidodo. Mwange hamng'ali nawo ghumwanga, ng'ana ichisi chiwatsile. Imunu iyokwanga mchisi ng'omanya bae koyoghenda.

³⁶Mtoghole ghumwanga hamng'ali nawo, ili muwe iwana we ghumwanga.” Hayamalitse kulonga apfi, Yesu koka, kepfisa waleke kumwona.

³⁷Hata ka Yesu tsakasang'ana pfihulo hambele hawo, lekeni ng'awamtoghole bae.

³⁸Agha ghose ghalawila ghatimile aghala ghayalongile Nabii Isaya. “Imtwatsa, nani iyautoghole usenga wetu? Na ghumoko ghwa Imtwatsa ughubulighwa kwa nani?”

³⁹Apfo ng'awadahile bae kutoghola, kwaapfila Isaya pfipfila tsakalonga keli.

⁴⁰Imulungu kalonga, “Nitsowabopfula nenge tsawo, nitsotsibumbuwatsa mbutsi tsawo, waleke kwona kwa tsinenge tsawo, waleke kumanya kwa mbutsi tsawo, waleke kunihundukila, na kuwahonetsa.”