SAN JUAN 12:15-40

¹⁵Vá yùhú nchòhó cue ñáyiu ndècu ñuú Sìón, chi iha véxi tée yɨ̀ndaha ñaha xii‑ndo yodo‑dé ɨɨⁿ bǔrru. Duha càchí‑xi núú tùtú‑gá.

¹⁶Dico cue tée xìca cuu ndɨhɨ Jesús ñá ní ndàcu iní‑güedé nàcuáa càháⁿ‑xi núú tùtú Yǎ Ndiǒxí nàcuáa cada Jèsús. Dico sátá cuǎndaa‑gá andɨu càda cahnu ñaha Tátá‑gǎ xii‑gá, te ní ndacu iní‑güedé sá dúcáⁿ yòdo tnuní nàcuáa cada‑gá, te ducaⁿ nǐ cuu.

¹⁷Nchaa ñáyiu ní xíndecu ndɨhɨ Jèsús òré ní dándótó‑gǎ té Lǎzarú, ya yàcáⁿ ní caní‑yu cuèndú núú ñǎyiu nàcuáa ní quide ñaha‑gǎ xii‑dé.

¹⁸Te vàí‑yu ní sáháⁿ‑yu núú ndécú Jèsús cuèndá sá nǐ níhǐ‑yu tnúhu ní quide‑gá sá vǎ yǒo tnàhí ndàcu cada.

¹⁹Te cue tée cùu fariséú ní xítnàha‑güedé: —Ní xito‑ndo nǎ ñá túú nàndɨhɨ sá quídé‑ó‑vá, chi nchaa ñáyiu ní chinchícúⁿ ñáhǎ‑yu xii‑dé —càchí‑güedé xǐtnàha‑güedé.

²⁰Te tnàhá ñáyiu ñá túú cùu ñáyiu isràél ní sáháⁿ‑yu vico ñuú Jerusàlén ní quide càhnú‑yu Yá Ndiǒxí.

²¹Te ñáyiu‑áⁿ nǐ sáháⁿ‑yu núú tě Lìpé tée ñuú Bètsaidá, te ñuú‑áⁿ yɨ́ndèhu‑xi distritú Galìleá. Te ní xáhǎⁿ‑yu xii‑dé: —Tǎtá, vá cúndèe iní‑n càchí tnúhu‑n nǔu ndèé ndécú Jèsús, chi cuìní‑ndɨ́ cáháⁿ ndɨhɨ‑ndɨ́‑gá —càchí‑yu xǎhǎⁿ‑yu xii‑dé.

²²Te té Lìpé ní naníhí‑dě té Ndrǐxí te ní xáhaⁿ‑dě nàcuáa càháⁿ‑yu, te ndɨ ndùú‑güedé ní sáháⁿ‑güedé ní xáhaⁿ‑güedě xii Jèsús nàcuáa càháⁿ‑yu.

²³Te ní xáhaⁿ Jèsús xii‑güedé: —Vitna ní cuyatni òré cada càhnu ñaha Tátà‑í xii‑í, te quiní‑yu sá ǐo càhnu cuu yúhú Tée cùu ñaní tnáhǎ‑yu nchaá‑yu.

²⁴Te na càchí tnúhu ndáá‑í xii‑ndo sǎ nǔu ɨɨⁿ tatá vá ngává‑xí nǔú ñúhú těhyú‑xi ña, te dɨu‑ni ducaⁿ cùnduu‑xi cundecu‑xi. Dico ɨɨⁿ tatá ná ngává nǔú ñúhú xǐnu déhe‑xi, te xíǎⁿ nádàcayá tnáhá‑xí, te mee‑xi tèhyú‑xi.

²⁵Te nchaa ñáyiu ío ñùhu iní‑xi cundecu ñuyíú‑a ñá túú ñùhu iní‑yu Yá Ndiǒxí, te ñáyiu‑áⁿ cuǐta nihnú‑yu. Te nchaa ñáyiu ío ñùhu iní ñáhá xìi Yá Ndiǒxí, ñáyiu‑áⁿ cundecú‑yu ndɨhɨ‑gá nɨ caa nɨ quɨ́hɨ́ⁿ.

²⁶Te nchaa ñáyiu cuìní cunu cuechi nǔù‑í xìni ñuhu‑xi natuha ñahá‑yu xii‑í, te nduu táhǔ‑yu cundecú‑yu núú nùhú‑í cundecu‑í. Te nchaa ñáyiu na cùnu cuechi núù‑í, te cada càhnu ñaha Tátà‑í xií‑yu —càchí‑gá xáhaⁿ‑gǎ xii‑güedé.

²⁷Te ní xáhaⁿ tùcu‑gá: —Ío ndɨ̀hú iní‑í. Te cúñaha‑ǐ xii Tǎtà‑í taunihnu ñaha‑gǎ nǔu dìcó sá cúú, dico vá cúú chi cuèndá tnàhí‑a véxi‑í —càchí‑gá xáhaⁿ‑gǎ xii‑güedé.

²⁸Te ní xáhaⁿ‑gǎ xii Tǎtá‑gǎ Dútú Ndiǒxí: —Táu, cada nàcuáa ní sani iní‑n cùnduu cuendá sá ná cádá càhnu ñaha ñáyiu xii‑n —càchí‑gá xáhaⁿ‑gǎ. Te ducaⁿ te ní tecú ní cáháⁿ Yǎ Ndiǒxí ndéé andɨu, te càchí‑gá: —Sa ní quide‑í nàcuáa cachí ñáyiu sá ǐo càhnu cuu‑í. Te cada tucu‑í cuèndá cada càhnu ñaha‑gá‑yu xii‑í —càchí Yǎ Ndiǒxí xáhaⁿ‑gǎ xii Déhe‑gá.

²⁹Te nchaa ñáyiu xǐndecu ní tecú dóho‑yu ní cáháⁿ‑gá, dico ñá túú ní sàni iní‑yu sá méé‑gǎ ní cáháⁿ, chi davá‑yu ní xítnàhá‑yu sá ñǔhu ní cáháⁿ, te davá‑yu ní xítnàhá‑yu sá ɨ̀ɨⁿ espíritú xínú cuèchi núú Yǎ Ndiǒxí ní cáháⁿ.

³⁰Te ní xáhaⁿ Jèsús xií‑yu: —Ñá dɨ́ú cuèndá yúhú ní cǎháⁿ Yǎ Ndiǒxí, chi ní cáháⁿ‑gá cuèndá sá nchòhó cundedóho‑ndo.

³¹Te vitna ní sáá nduu càda ndáá Yǎ Ndiǒxí cuéchi nchaa ñáyiu ñuyíú‑a, te ducaⁿ te vá cúnùu‑gá yucu ñǎvǎha.

³²Te na càta caa ñaha‑güedé xii‑í núú cùrúxí, te xíáⁿ cuú‑í te níhǐ‑yu tnúhu nɨ càa xico ñuyíú, te quɨndáá iní‑yu tnúhu‑í —càchí‑gá xáhaⁿ‑gǎ xií‑yu.

³³Duha ní cáháⁿ‑gá cuèndá cutnùní iní‑yu nàcuáa ndoho‑gá òré cuú‑gá.

³⁴Te ní xáhǎⁿ‑yu xii‑gá: —Nìhí‑ndɨ́ tnúhu sá nǔú tùtú yódó tnùní tnúhu Yá Ndiǒxí càháⁿ‑xi sá Crìstú Yaá tendaha‑gǎ quixi ñuyíú‑a cundecu‑gá nɨ caa nɨ quɨ́hɨ́ⁿ. ¿Te yòhó nása càháⁿ‑tu‑n sǎ ɨ̀ɨⁿ tée cùu ñaní tnáhá nchàa ñáyiu ñuyíú‑a cahni ñaha‑güedě núú cùrúxí? Te cachí tnúhu‑n nǎ cúú těe‑áⁿ —càchí‑yu xǎhǎⁿ‑yu xii‑gá.

³⁵Te ní xáhaⁿ Jèsús: —Yúhú cúù‑í dàtná ɨɨⁿ ñuhú dáyèhé ñuyíú‑a, dico sacú‑ni nduu ndècu ndɨhɨ ñaha‑í xii‑ndo. Te caca‑ndo ìchi ndáá vitna dàyehé‑gá‑í núú‑ndó chi na cùnee te vá cútnùní‑gá núú‑ndó ndèé ichi quɨ́hɨ́ⁿ‑ndó.

³⁶Quɨndáá iní ñáhá‑ndó xìi‑í vitna ndècu ndɨhɨ ñaha‑gá‑í xii‑ndo dàndixi túu‑í iní‑ndó, cuèndá cutnùní iní‑ndó nàcuáa ndùu cuendá Yǎ Ndiǒxí, te cuu‑ndo děhe‑í —càchí‑gá xáhaⁿ‑gǎ xií‑yu. Te sátá dúcáⁿ nǐ cáháⁿ Jèsús, te ní quee‑gá cuáháⁿ‑gá ɨɨⁿ núú vǎ ná nìhí ñáhǎ‑yu xii‑gá.

³⁷Te cuěi ío vài sá vǎ yǒo tnàhí ndàcu cada ní quide Jèsús ní xiní‑yu, dico ni dùcaⁿ ñá túú ní sàndáá iní‑yu‑gá.

³⁸Te ducaⁿ nǐ quidé‑yu chi dacuɨtɨ́í nǐ quee ndáá‑xi nàcuáa ní chídó tnùní ndíi Chàiá ndíi ní cáháⁿ tnúhu Yá Ndiǒxí ndéé sanaha nǔú tùtú‑gá núú càchí‑xi: Yòhó Yaá cúú Xǐtohó‑í, vá yǒo ɨɨⁿ sàndáá iní tnúhu càháⁿ‑ndɨ́. Te vá yǒo ɨɨⁿ cùtnuní iní‑xi sá ǐo càhnu cuu‑n. Duha ní chídó tnùní ndíi Chàiá núú tùtú‑gá.

³⁹Te ñá ní sàndáá iní‑yu chi ní quee ndáá‑xi nàcuáa ní chídó tnùní tucu ndíi Chàiá núú tùtú Yǎ Ndiǒxí nàcuáa cáháⁿ Jèsús:

⁴⁰Mee Yǎ Ndiǒxí ní quide‑gá sá vǎ tècú tnùní‑yu, chi ní dádǎhu ndodo iní ñáhá‑gǎ xií‑yu, chi ío sàá iní‑yu núu ñá ní cuìní‑gá‑yu quɨndáá iní ñáhǎ‑yu xii‑gá. Te ni vǎ túhá ñàhá‑yu xii yúhú cuèndá dacǎcu nihnu‑í‑yu.