San Juan 12:15-40

¹⁵Cutu gádxiliꞌ, lbiꞌiliꞌ, zoaliꞌ yödz Sión. Gul‑yutscaꞌ, zëꞌë Bönniꞌ gna béꞌinëꞌ lbiꞌiliꞌ. Dxiëꞌ‑baꞌ tubaꞌ búrrodauꞌ.

¹⁶Catiꞌ niꞌ ziꞌa guc lë ni, cutu gulayéjniꞌnëꞌ bönniꞌ usë́d queëꞌ Jesús, san gdöd niꞌ, catiꞌ bubanëꞌ Jesús lu yöl‑laꞌ gut, buëpëꞌ yehuaꞌ yubá queëꞌ, niꞌr yajneycnëꞌ lë ni nayúj lu guich laꞌy ca ral‑laꞌ gac queëꞌ, atiꞌ guc cni queëꞌ lë ni.

¹⁷Lëzcaꞌ glunëꞌ lnaꞌ lau queëꞌ Jesús bönniꞌ naꞌ gulacuáꞌlenëꞌ Lëꞌ catiꞌ niꞌ bulidzëꞌ Lázaro, yuꞌë yeru ba, len buspanëꞌ lëꞌ lu yöl‑laꞌ gut.

¹⁸Qui lë ni naꞌ caꞌ gularujëꞌ bönniꞌ yajxíꞌgal‑laꞌquëꞌ Jesús, le gulayönnëꞌ ca nac yöl‑laꞌ huac ni benëꞌ Lëꞌ.

¹⁹Niꞌr gulanë́ꞌ laꞌ légaczëꞌ bönniꞌ gdauꞌ fariseo, taꞌnë́ꞌ: ―Chnac bëꞌ cutu bi sáquiꞌruꞌ gunruꞌ. Gul‑yú ca daꞌgac Lëꞌ yúguꞌtë bunách.

²⁰Dzagquëꞌ nup naꞌ guladxín Jerusalén dza Lni Pascua naꞌ laꞌquëꞌ bönniꞌ gzaꞌa quië laꞌyíj ládxiꞌquëꞌ Dios.

²¹Yajtsagquëꞌ Felipe, bönniꞌ Betsaida qui luyú Galilea, yuguꞌ bönniꞌ gzaꞌa naꞌ, atiꞌ glátaꞌyuëꞌ lahuëꞌ, taꞌnë́ꞌ: ―Bönniꞌ, rë́ꞌnituꞌ gléꞌituꞌ‑nëꞌ Jesús.

²²Gyijëꞌ Felipe naꞌ, yjödxëꞌ caꞌ Andrés. Niꞌr Andrés len Felipe naꞌ glëꞌ caꞌ Jesús.

²³Bubiꞌë didzaꞌ Jesús, rëꞌ lequëꞌ: ―Chzoa gdxin dza gatiaꞌ nedaꞌ, Bönniꞌ Nuhuöaquëꞌ Gdu Bunách, huöjaꞌ xlatjaꞌ yehuaꞌ yubá.

²⁴Le nactë rëpaꞌ lbiꞌiliꞌ: Ugáꞌn leyz tu xseydauꞌ chquiꞌ cutu ggachiꞌ luyú len udx qui. Chquiꞌ udx qui xseydauꞌ naꞌ, atiꞌ glen, szxö́nitër unö́dzj.

²⁵Nu bönniꞌ ruiꞌ ládxiꞌtsquëꞌ yöl‑laꞌ naꞌbán queëꞌ, unitiëꞌ lei, le gatiëꞌ tsaz bönniꞌ naꞌ. Nu bönniꞌ cutu ruiꞌ ladxëꞌë yöl‑laꞌ naꞌbán dë queëꞌ yödzlyú ni gun chiꞌë lei ga gdxinr dza gataꞌ yöl‑laꞌ naꞌbán gdu queëꞌ.

²⁶Chquiꞌ rëꞌnnëꞌ bönniꞌ gunëꞌ xchinaꞌ, ral‑laꞌ tëꞌë nedaꞌ bönniꞌ naꞌ, atiꞌ ga niꞌ tsajsóaꞌ nedaꞌ, niꞌ tsajsóëꞌ caꞌ bönniꞌ naꞌ runëꞌ xchinaꞌ. Chquiꞌ runëꞌ xchinaꞌ bönniꞌ, gunëꞌ ba laꞌn bönniꞌ naꞌ Xuzaꞌ Dios.

²⁷Gnëꞌ caꞌ Jesús: ―Naꞌa röꞌtscaꞌ baguíꞌi nedaꞌ. ¿Nacx gnatsaꞌ? ¿Naruꞌ gniaꞌ: Xuzaꞌ, buslá nedaꞌ lu le ral‑laꞌ gac quiaꞌ naꞌa? Qui lë ni naꞌ bidaꞌ, quië guaꞌ glenaꞌ le ral‑laꞌ gac quiaꞌ naꞌa.

²⁸Xuzaꞌ, ben ga glaꞌ lahui yöl‑laꞌ yeníꞌ quiuꞌ. Niꞌr byön chiꞌi Nu ruiꞌ didzaꞌ yehuaꞌ yubá, rna: ―Chbenaꞌ ga naláꞌ lahui yöl‑laꞌ yeníꞌ quiaꞌ, atiꞌ leyúbl gunaꞌ ga glaꞌ lahui yöl‑laꞌ yeníꞌ quiaꞌ naꞌ.

²⁹Gulayöni chiꞌi ni bunách zian nacuáꞌ niꞌ, atiꞌ taꞌná: ―Gziuꞌ naꞌ gnë. Yelaꞌgac bunách naꞌ taꞌná: ―Bë́ꞌlenëꞌ Lëꞌ didzaꞌ gbaz laꞌy queëꞌ Dios.

³⁰Niꞌr bubiꞌë didzaꞌ Jesús, rëꞌ lequëꞌ: ―Byön chiꞌi ni, clëg quië uziꞌa xbey nedaꞌ, san quië uziꞌliꞌ xbey lbiꞌiliꞌ.

³¹Chbdxin dza cuequi xbeynëꞌ bunách yödzlyú ni Dios. Naꞌa chuꞌnëꞌ Dios niꞌl tuꞌ xöhuiꞌ rna beꞌi bunách yödzlyú ni.

³²Naꞌa, chquiꞌ luchisëꞌ nedaꞌ xtsaꞌ bönniꞌ ludöddëꞌ nedaꞌ, gunaꞌ ga ludúb quiaꞌ yúguꞌtë bunách.

³³Didzaꞌ ni bëꞌë Jesús nac bëꞌ nac gatiëꞌ.

³⁴Të Jesús bunách zian naꞌ, taꞌná: ―Netuꞌ byö́nituꞌ nup gululáb le rna bëꞌ zxba queëꞌ Dios, lë naꞌ rna: “Sóateczëꞌ Cristo.” ¿Nacxcz nac, rnauꞌ Liꞌ: “Run bayúdx Bönniꞌ Nuhuöaquëꞌ Gdu Bunách, luchisëꞌ Lëꞌ xtsaꞌ”? ¿Nuzxa naꞌ Bönniꞌ Nuhuöaquëꞌ Gdu Bunách?

³⁵Niꞌr Jesús rëꞌ lequëꞌ: ―Yetú chiꞌidauꞌz sóalenaꞌ lbiꞌiliꞌ nedaꞌ, nacaꞌ yeníꞌ queëliꞌ. Gul‑tá tsal ni zóalenaꞌ lbiꞌiliꞌ len dë queëliꞌ yeníꞌ, cui gchul nitliꞌ. Nu bönniꞌ rdëꞌ ga chul xöhuiꞌ cutu nöznëꞌ gazx zijëꞌ.

³⁶Tsal ni zóalenaꞌ lbiꞌiliꞌ nedaꞌ, nacaꞌ yeníꞌ queëliꞌ. Gul‑tsejlëꞌ nedaꞌ nacaꞌ yeníꞌ queëliꞌ quië gléꞌiliꞌ yeníꞌ naꞌ nac gdu. Catiꞌ budx bëꞌë didzaꞌ ni Jesús, yhuöjëꞌ yajcachiꞌ lahuëꞌ lauquëꞌ.

³⁷Zal‑laꞌ benëꞌ Jesús zian yöl‑laꞌ huac lauquëꞌ, cutu gulayejlëꞌë Lëꞌ.

³⁸Cni guc quië butság lë naꞌ buzujëꞌ lu guich Isaías, bönniꞌ bëꞌë didzaꞌ uláz queëꞌ Dios, gnëꞌ: Xan, ¿nuzxa caz gyejlëꞌ didzaꞌ bëꞌtuꞌ? ¿Nuzxa caz buluiꞌinëꞌ lei Xanruꞌ yöl‑laꞌ huac queëꞌ?

³⁹Cni guc, cutu guc laꞌyejlëꞌë Jesús. Guc ca naꞌ gnëꞌ caꞌ Isaías:

⁴⁰Dios benëꞌ ga gulachúl gulanitiëꞌ, Atiꞌ guc zid ládxiꞌdauꞌquëꞌ Cui laꞌléꞌinëꞌ len yöj lauquëꞌ, Len cui laꞌyéjniꞌnëꞌ lu icj ládxiꞌdauꞌquëꞌ. Cutu luhuöaquëꞌ quiaꞌ quië úngacaꞌ‑nëꞌ.