Yon 12:15-40

¹⁵“Ang lipuadi awa Xaxagana Sayon ba, labu amaxuwau tai. Bagu xaitamoxima ma ranguang, rung etua mana donki tela garanoa.”

¹⁶Mana bungina baguba lipuxindi dinaxu mana daxabia axadi ba rangrang te. Ne kimuya mana Yesu luxu ralania, hatumingading daxaxa ding. Baing ina naga, daxabia ba axadi ba Urana Xuanoa harua manadi, xaung dilibu axadi ba mana.

¹⁷Baing buranga duwa rangua bungina wagi Lasaras sok ma sangua guha gobagoba ba, ding dibaxanga mauli mana iti mesa mana matiyua.

¹⁸Binabu buranga disok mala ba disok mana, namua na dilungu ba libu axamang haringina ba.

¹⁹Baing ina naga, Parisidi daharua nading ba, “Abagu, hatuminga tahau ba aningon te. Si, lipu titiam longgalo disu mana!”

²⁰Tauna, Grik teladi duwa rangua adi dahaing mala long sabangga Yerusalem ba disabu mana Urana Taungia.

²¹Dima rangua Pilip, yabanoa Betsaida wa titia Galili, saing duxusunga ba, “Lipu sabanga, am gabo ba am gabagu Yesu.”

²²Baing Pilip ila bala Andru, saing tang dila dibala Yesu.

²³Baing Yesu haxuya nadi ba, “Xaidaba mana Lipua Ma Rangua Urana luxu ralania hatata baing.

²⁴Maxung sibuna ngabalang ba, wit xuyana bing ri titia saing mati. Nabu tegu, bing wit xuyang taininau ing ganina saing aningon te. Ne nabu ri maluxu titia saing mati, bing aningong xumana.

²⁵Lipu gaxarea muruna buk mana walinganoa bagula hanggalang. Ne lipu gaxarea yunga walinganoa mana titia li, bagula xap walinga subingang teguama.

²⁶Lipu gaxarea tuxu oxatagua bing su manga, saing longga ngawa mana, lipuxigu oxatama bagula wa la ba xauna. Tibugu bagula iti lipua tuxu oxatagua yanoa.

²⁷“Hatata gamogua mauxana, ne bagula ngaharua baru? ‘Tibugu, oxop nga muli sangua xaidap salakkamga li’? Tegu. Namua na mana namua naga ngama mana xaidapka li.

²⁸Tibugu, uiti yama!” Saking waxutu tela sok long xaiya ma, harua ba, “Ngaiti ba, saing bagula ngaiti muli.”

²⁹Buranga duwa la ba dilungu ba, daharua ba kaxaba taha. Ne teladi daharua ba Urana uleginam tela harua na.

³⁰Yesu harua ba, “Waxutua ba harua ba hauli nga te, harua ba hauliang.

³¹Hatata Urana xaidabinoa bu suxuya lipu titiamdi. Hatata bagula suka titia li yanaminoa mala.

³²Ning nga ba, bungina diti nga mahaing titia, bagula ngaxai lipu longgalo hatumingadingdi dima rangua nga.”

³³Harua bila ba bu hatanga bagula mati baru.

³⁴Binabu buranga dahaxuya ba, “Am gaxabia hanaunaungua harua ba Urana Lipuxing Mogunganama bagula wa bungingbunginalo. Binabu uria baru, uharua ba ‘Bing diti Lipua Ma Rangua Urana mahaing’? ‘Lipua Ma Rangua Urana’ gaxarea?”

³⁵Baing Yesu baladi ba, “Bagula lulianoa wa ranguang bunging mongaita ing ganina. Ahaxa hatata bungina luliana wa, nam labianoa daliang. Lipu gaxarea haxa labiania xabia longga haxa mana te.

³⁶Hatata lulianoa wa ranguang. Bing ahatum haringina mana lulianoa, bu asok luliang garandi.” Yesu harua laing sup, baing sauyadi saing hisa manadi.

³⁷Maxuna, Yesu libu axamang haringing xumana maxadingia, ne dahatum haringina mana te.

³⁸Axa ba sok bu libu Urana lipuxing suxunguxunguama Aisaya haruanganoa aningona, haruangua bung ba: “Toxoratamona, gaxarea dahatum haringina mana ulegimama? Gaxarea dibagu daxabia Toxoratamona rimang haringinganoa uhatanga masok?”

³⁹Sanga ba dahatum haringin te. Namua bing Aisaya bung haruanga tela harua mana ba:

⁴⁰“Urana libu maxadingdi dahaxatu xaung libu hatumingadingdi diriba ding, nam dibagu maxadingia nam daxabia xai hatumingadingia, nam duxugia mala rangua nga ba ngalibudi disok xai muli.”