Jon 12:15-40

¹⁵“Saion akama kwo opoche akiitanakech. Na he! Kwi aka tabo yima rii diita yato. Rii donki magiirek yo yi yato.”

¹⁶Eeta nediik disaipel ye diita majin hikikasakech. Wowak, komas Jisas rii riiti hadabas boboy kepin yar nediik ye eeka hikir diita jek keyir majin. Ye hikibar eeta ma yecha riina otiir boboyen.

¹⁷Eeta nediik Jisas rii Lasaras riita harek tiiriimo supuk tarin uwa yesokwa yichiri ma mima ye eena hechi otiir boboyen ba ye itar.

¹⁸Eeta ma mima ye eeta mirakel otiirin meejichi ye eena i riina nobok jawor.

¹⁹Worek, eena Perisi ye yechaba awasen awasen batar: “Na he! Nota keena kata boboyen otiiniga dagiir poyekasakech. Eyey ma mima ye iri riitaban sumowutu!”

²⁰Ma mima ye Jerusalem akamak irek, Grik ma kaw ye God riiti hin yesokwataken ibabar.

²¹Irek, ye Pilip riitaka yar. Pilip ri akama Betsaida Galili nosapek tar ma. Riitaka yari, ye riina eecha wor: “Miinawa, nota Jisas riina heken gegiyato.”

²²Worek, Pilip rii i Endru riitaka Pilip riitaka piir eecha i Jisas riina wor.

²³Worek, Jisas rii awasen eecha wor: “Eeta nedii ya hamawa. Apa Ma Yikapwa rii hadabas boboy kepin yak otiito.

²⁴Ada kwona maji siikenen wocho: wit siikii nosapek sakachi sokwa siichi hanan siiney, riipa saniga takiita. Wowak, siita sakachi haney, iipa sii sokwachi harapa siiken wakiita.

²⁵Ma rii riiti mesek mayama rukusii tawey, riipa sii siiken siikiita. Wowak, ma rii riiti maban diita nosapek tanak yuyaney, iipa ri maban neekichi eechaba eechaba takiita.

²⁶Ma por riita eeji yon neekitaney, rii sapa ana sumowu ta. Eecha otiitaney, eeji yo otii wakasa ma riipa ya ada tawa akamabak adaka tabatakiita. Ma por rii eeji yon otiitaney, eeji Apoko riipa riiti hin howuk heechikiita.

²⁷“Apa eeeji bii negiirabotawak, an nubunubutu. Anapa shecha wokiita? Anapa kapo eecha wok, ‘Apoko, mii kapo adak yak otiiawa boboyen na yeechi rabo? Yaho. Anapa saka eecha wokiitawak. Eeta yikadey nomu yatawa boboyen kiyaken yar.

²⁸Apoko! Miita miiti hin ma yechi misomak otiisa kepi wey sii!” Worek, howuk ya sakar aya eecha wor: “Ada eeji hin otii harapa siir. Apa ada kawka otiiniga harapa mayaka siikiita.”

²⁹Ma mima ye bana bana siitiitarek, meejirin ye eecha wor: “Nerek kurutu.” Kaw ye eecha wor: “Ejel por riita riina maji bato.”

³⁰Jisas rii awasen eecha wor: “Diita maji sokwari, sii an kiyatayekasakech. Yaho. Sii sokwari kwona kiyatayechiken eena sokwar.

³¹Apa diita nosapek tawa ma mima yenya anasaken otiit. Apa diita nosapek aka tabo yichawa man dagiir poyeken otiito.

³²Ana nosapek tawan yesokwanak, eeta nediik ada ma mima yenya yeechi yayakiita.”

³³Rii eecha wori riita hakiitawa majin eena wor.

³⁴Worek, eeta ma mima ye awasen eecha wor: “Noti lo nona eecha wocho: Kraist riipa eechaba eechaba takiita. Boyewak mii eecha wocho, ‘Ma Yikapwa riina yesokwakiita?’ Diita Ma Yikapwa rii na ma?”

³⁵Worek, Jisas rii yenya eecha wor: “Ameda siinak haba siipa kwotaka eecha takiita. Apa kwo habaka tawa. Eena kwota na habak chishi ta. Iipa niyiki ya kwona gamukiita. Ma niyikiyik chishitaney, rii i eemen hekasakech.

³⁶Kwo habak tawey, eena na hiki siitiichicha. Iipa kwo haba yikapwa siikiita.” Jisas rii yenya diita maji bachi rii yechi misomak heechi i veenyir.

³⁷Yeherek, rii nokwapa nokwapa mirakelen yechi misomak otiiri, ye eena hiki siitiichikasakech.

³⁸Eena piirapet Aisaia riiti maji sii siiken sokwar. Rii eecha wor: “Harapa Ma, nama kapo noti majin hiki siitiichir? Naman kapo Harapa Ma riiti hapaga tawa boboyen mukuchir?”

³⁹Ye kiki siichi hiki siitiichikasakech. Eena Aisaia rii eecha wor: “God rii yechi miyin otii dumur, Worek, yi inyaka sii papaga siir.

⁴⁰Eena yechi miy hekasakech, marenoku hikikasakech. Yechi inyaka wopu dareboyekasakech eena ada yenya otii kepi siichikasakech.”