San Juan 12:15-40

¹⁵Jerusalẽ wame tiri maca cjãna, cueracãhña mʉsa. Ihñaña. Mʉsa pʉhtoro burrogã bui pesa cãhtare, ni yahuahye Cohãcjʉ̃ yere tiquina ojoari pũpʉ.

¹⁶“Tiquina sa ni ojoari Jesure nino niaga”, ni, ʉsã tiquiro buhena quehnoano masiedarĩi. Sa masiedapenata ʉhmʉsepʉ Jesu mʉjari bato ʉsã ti ojoarire wacũ boca tʉho masii. Ohõ saha ni tʉhotuu: “Cohãcjʉ̃ yere tiquina ojoari pũ pehe Jesure yahuro nimeya. Sa ye Cohãcjʉ̃ yere tiquina ojoari pũ nidiro sahata yeri masa Jesure”, ni tʉhotu, masii ʉsã.

¹⁷Lázarore masa copepʉ ijiriquirore Jesu pisu masogʉ̃ ihñariquina pehe yahuri masare.

¹⁸Sa ye Lázarore Jesu masorire tʉhori bato masa peyequina Jesure ihñañe ahtari.

¹⁹Tiquina sa ahtagʉ̃ ihñañe fariseo masa tiquina basi ohõ saha niahye: —‍Ijipihtiyequina Jesu yequina dihita wahaye nine yojopʉre. Sa yena mari dʉhse ye masiedaga tiquinare, niahye fariseo masa tiquina basi.

²⁰Sa ye bose deco Cohãcjʉ̃re ño peoye ahtayequina mehna cjẽna meheñequinagã griego masa ijiri.

²¹Sa ye tiquina Felipe cahapʉ wihiahye. Felipe pehe Betsaida wame tiri maca Galilea yehpapʉ ijiri maca cjʉ̃no ijiri. Sa ye tiquiro cahapʉ wihiriquina ohõ saha niahye tiquirore: —‍Jesure ihña duaga ʉsã, niahye tiquina.

²²Tiquina sa nigʉ̃ tʉhoro Felipe Andrepʉre tire yahuro wahahye. Sa ye tiquina pʉaro Jesure yahuri.

²³Tiquina sa ni yahuri bato Jesu tiquinare yahuri: —‍Yʉhʉ masʉ Cohãcjʉ̃ ohorigʉ ijiaja. Yʉhʉre ijipihtiyequina tiquina ño peoati pje yojopʉre ijirota nine. Yojopʉre yʉhʉ yariati pje ijirota nine.

²⁴Potota mʉsare yahugʉ niaja. Oteri pjere yehpapʉ mari yaeragʉ̃, ti pjere mari oteragʉ̃ ihcã pjeta tojoarota. Sa yero ti pjere mari yari bato pihni, dʉca tirota. (Sata yʉhʉ yariari bato yʉhʉre tiquina yari bato peyequina masare Cohãcjʉ̃ mehna sa ijiducuatiquina ijigʉ̃ yeitja yʉhʉ.)

²⁵Ahri yehpapʉ mʉsa ijiyere pajiro tʉhotuboaga mʉsa. Sa tʉhotuna Cohãcjʉ̃re wacũedana, pecapʉ wahanata mʉsa. Ahri yehpapʉ mʉsa ijiyere sa tʉhotu cãna, Cohãcjʉ̃ mehna sa ijiducunata.

²⁶Yeere ye duana yʉhʉ buheyere quehnoano tʉhoya mʉsa. Mʉsa sa yena mʉsa gʉ̃hʉ yʉhʉ ijiropʉ ijinata. Yeere yeriquirore yʉhʉ Pacʉ pehe ño peorota, nidi Jesu.

²⁷Sa ni tuhasa ohõ saha ni nemori: —‍Yojopʉre yʉhʉ ñano jeripohna tiaja. ¿Yʉhʉ Pacʉre dʉhse nigʉtari yʉhʉ? ¿“Mai, yʉhʉ ñano yʉhdʉatire yeracãhña yʉhʉre”, niboagari yʉhʉ? Tire niedaja yʉhʉ. Ñano yʉhdʉacjʉta ahri yehpapʉ ahtaʉ. Sa yero yʉhʉ ñano yʉhdʉati pje yojopʉre ijirota nine, ni yahuri ʉsãre tiquiro buhenare.

²⁸Sa yero ohõ saha nidi tiquiro Pacʉrore: —‍Mai, mʉhʉ tutuagʉ ijiyere yojopʉre ihñoña masare, nidi Jesu tiquiro Pacʉrore. Tiquiro sa nigʉ̃ ʉhmʉsepʉ yahuducuro ca tari: —‍Tutuagʉ yʉhʉ ijiyere masare ihño tuhasaʉ. Yojopʉre sa yegʉ pari turi ihñoutja masare, nino ca tari.

²⁹Tiquiro sa nigʉ̃ tʉhoye topʉ ducuyequina masa peyequina ohõ saha nidi: —‍Ʉpo ijiaga sa bisiro, nidi masa. —‍Angel Jesure yahuro nidi, nidi apequina masa.

³⁰Ohõ saha nidi Jesu pehe: —‍Ʉhmʉsepʉ sa bisiro yʉhʉre tʉho dutiro niedari. Mʉsa pehere tʉho dutiro sa bisiro ca tari.

³¹Yojopʉre ahri yehpa cjẽna tiquina ñañe yeri buhirire buhiri dahrerota tiquinare. Ahri yehpa cjẽna pʉhtoro watĩnore cohãnota Cohãcjʉ̃.

³²Sa yegʉ yʉhʉre curusapʉ tiquina wahcõ docogʉ̃ peyequina masare yeequina ijiatiquinare yeitja yʉhʉ, nidi Jesu.

³³Sa nino curusapʉ tiquiro yariatire yahuro nidi Jesu masare.

³⁴Tiquiro sa nigʉ̃ tʉhoye masa pehe tiquirore ohõ saha nidi: —‍Cohãcjʉ̃ yere tiquina ojoari pũpʉ ohõ saha nine: “Cristo ijipihtiye decori ijirota”, ni ojoahye. ¿Tiquiro sa ni ojoagʉ̃ mʉhʉre masʉre Cohãcjʉ̃ ohorigʉre dʉhse yeye curusapʉ wahcõ docoetari masa mʉhʉre? ¿Masʉno Cohãcjʉ̃ ohoriquiro noa ijiajari tiquiro? ni sinituri tiquina.

³⁵Tiquina sa nigʉ̃ ohõ saha ni yʉhtiri Jesu: —‍Buhrioro mehna mari ihña masigʉ̃ yero saha masare Cohãcjʉ̃ yere quehnoano masigʉ̃ yeaja yʉhʉ. Came cjũnogã mʉsa mehna ijisi yʉhʉ. Mʉsare yʉhʉ buhegʉ̃ yojopʉre tʉhoya mʉsa “Ñañe yeari”, nina, Cohãcjʉ̃ mehna mʉsa sa ijiducuatire. Yʉhʉ buheyere tʉhoeyequina nahitiano tiniñequina yero saha tiquina wahatore masiedare.

³⁶Sa yegʉ buhrioro yero saha ijigʉ ijiaja yʉhʉ. Sa yegʉ mʉsare buhegʉ Cohãcjʉ̃ yere quehnoano masigʉ̃ yeaja mʉsare. Yojopʉre yʉhʉ wahato pano yʉhʉre wacũ tutuaya. Sa wacũ tutuana yeequina ijinata mʉsa, nidi Jesu. Sa ni yahu tuhasa duhti cãa wahari.

³⁷Peye tahari Cohãcjʉ̃ tutuaye mehna tiquinare Jesu tiquiro ye ihñoepegʉ̃ta peyequina judio masa tiquirore ne tʉho duerari.

³⁸Cohãcjʉ̃ yere tiquina ojoari pũpʉ Isaia mʉnano tiquiro ojoariro sahata yeye nidi tiquina. Ohõ saha ni ojoahye Isaia mʉnano: Cohãcjʉ̃, mʉhʉ buheyere ʉsã yahugʉ̃ masa ne tʉho duerare. Mʉhʉ tutuayere tiquinare mʉhʉ ye ihñoepegʉ̃ta, tire “Poto ijierare”, nidi tiquina, ni ojoahye Isaia mʉnano.

³⁹Tiquina sa tʉho dueragʉ̃ ihñano Cohãcjʉ̃ tiquinare masiedagʉ̃ yeri. Ti gʉ̃hʉre Isaia mʉnano ohõ saha ni ojoahye:

⁴⁰Caperi bajueyequina yero saha ijigʉ̃ yee tiahye Cohãcjʉ̃ tiquinare. Sa yero tiquiro yere masiedagʉ̃ yee tiahye tiquinare. Sa ye tiquiro tutuayere ihñaepeta tiquina ihñarire masiedare. Sa ye tiquiro buheyere tʉhoepeta tire masiedare tiquina. Cohãcjʉ̃ ye buheyere masiñe tiquina ñañe yerire cohã dutiboaya. Sa yero tiquinare yʉhdʉoboaya tiquiro, ni ojoahye Isaia mʉnano Cohãcjʉ̃ yere tiquina ojoari pũpʉ.