SAN JUAN 12:15-40

¹⁵Nde mermbolan cambaj Israel; ijawan, aliüc Minatang Nenajiüt icueajiün, alchetem wüx opech nop quicheech bur.

¹⁶Wǘxan tenguial ajlüy aag ayaj minipilan nej ngo majawüw neol. Ndoj, wüx Teat Jesús landilil andüy tiül cielo, quiaj leaad omeajtsüw naleaing meáwan leaw tajlüy quiaj; aag ayaj landoj lamarangüch wüx nawiig nde tanomb.

¹⁷Ajcüwa nipilan leaw tajlüyiw niüng ajlüy Teat Jesús wüx tapacüüch teat Lázaro, lamandeacüw manguiayaran leaw tajawüw arang Teat Jesús.

¹⁸Pares meáwan nipilan tambüw mangochiw nej cos lamanguiayiw nguineay arang.

¹⁹Condom ajcüwa fariseos tandeacüw nejeyéjan quiaj, tapiüngüw: ―Nganüy lamajawaats ngondom marangaats nicuajind cos meáwan nipilan almandüjpiw nej ―awüw.

²⁰Tiül ajcüwa monjaw nangos nüt quiaj, ajlüyiw tiül acas nipilan griego.

²¹Tambüw majawüw teat Felipe, aaga naw cambaj Betsaida tiül Galilea. Tasajüw: ―Teat, xicona xiünan cos sandiüman najawan aaga Jesús ―ajüw.

²²Quiaj tamb teat Felipe masaj teat Andrés, ndoj tambüw nóiquian masajüw Teat Jesús.

²³Condom quiaj Teat Jesús tasaj nejiw: ―Lamatüch a nüt wüx Teat Naxey netam mandilil andüy tiül cielo, niüng apmajlüy najneajay.

²⁴Naleaing naleaing sasaj icon, sitiül noic osaab trigo ngo majmiüc tiül iüt ndrom ombas, ngome apmajntsop, apmajlǘyan noic nej. Nganüy sitiül apmapiürüch, apndrom ombas, mbich apmajntsop, ndoj apmayac altegüy.

²⁵Jane xeyay andiüm leaw alndom maxom wüx iüt cam, ngome apmaxom leaw andiüm. Pero jane apmayamb Teat Dios, ngo mayac omeaats wüx leaw alndom maxom wüx iüt cam, nej teamacül mapac meáwan nüt maquiiüb Teat Dios.

²⁶Sitiül aljane andiüm marang xenajiüt, ich mandüüb xic. Niüng xique sanajlüy, nej apmajlüy aton. Jane arang xenajiüt, Xeteat Dios apmapiüng nej najneaj arang.

²⁷’Nganüy xeyay ngo majneaj ximeaats. ¿Cuane sanapiüng? ¿Quia napiüng: “Teat, iwün xic wüx, nde namongoch aaga xeyay ngo majneaj leaw aliüc”, nawa? Ngwüy, cos xiün namongoch aag ayaj.

²⁸Teat, ijüiquich mimonajneaj majaraw ―aw. Condom tanguiayaran noic nanderac imiün tiül cielo, tapiüng: ―Lanajüiquich, pero nganüy sanajüiquich alinomb ―aw.

²⁹Meáwan nipilan leaw aliw quiaj teamanguiayiw, tapiüngüw monteoc teaterriür; altiül tapiüngüw: ―Ngwüy, nop ángel ocueaj Teat Dios tendeac ―awüw.

³⁰Condom quiaj tasaj nejiw Teat Jesús: ―Teat Dios tandeac aag ayaj ngome cos netam nanguiay xique; tandeac para menguiayiün icona.

³¹Lamatüch a nüt majaraw wüx asoetiw monlüy wüx iüt cam; nganüy minatang nimeech leaw ajlüy teowix nej aaga iüt cam apmajwan teowix nej.

³²Wüx xique saxaijnguian nayacüch cawüx, ndoj sanüjchiw miünüw niüng sajlüy meáwan nipilan ―aj nejiw.

³³Aag ayaj tandeac manguiayaran nguineay apmandeow.

³⁴Quiaj tasajüw nej nipilan: ―Teat, xicona lananguiayiün nguineay apiüng tiül Mipoch Teat Dios, cos apiüng aaga Cristo leaw netam miün apmapac meáwan nüt. Jow nganüy, ¿neol tepiüng Teat Naxey netam xaijnguiam mayacüch cawüxe? ¿Jane aaga Teat Naxey ipiüng quiaja? ―ajüw nej.

³⁵Condom quiaj Teat Jesús tapiüng: ―Nganüy acásan nüt sajlüy ningüy naquiiüb icon. Netam mendüjpiün xic wǘxan nganüy, cos xique sajlüy atnej ran. Sanambeol icon ngana mejlüyiün tiül aaga ngo majneaj atnej pojniün; cos jane ajüy tiül pojniün ngo majaw cuane teamarang, ngo majaw nguiane apmandüy.

³⁶Wǘxan alningüy aaga ran quiaj, netam meyariün andeac nej para mejlüyiün tiül micual aaga ran ―aw. Ndoj mapiüng aag ayaj Teat Jesús, texotüy taw quiaj.

³⁷Masey Teat Jesús lamarang xeyay cuajantanej majawüw, aliün majlüy xeyay nipilan leaw ngo mayariw andeac nej;

³⁸cos netam majlüy atnej nomb tarang tiül minawiig nej Isaías, aaga nendeac andeac Teat Dios, cos apiüng: Teat, ¿jane lamayar leaw teaach xic nandeaca? ¿Jane lamayac wüx omeaats meáwan leaw iwix tarang majawüwa? aw.

³⁹Pares ngo mayariw, cos aaga Isaías aton lamapiüng:

⁴⁰Teat Dios tüüch majlüyiw at nejiw somb. Aton tüüch madam omeajtsüw. Atquiaj ngondom majawüw. Ngondom leaam omeajtsüw wüx xic, miünüw niüng sajlüy nawüniw wüx asoetiw nejiw, aw.