Dion 12:15-40

¹⁵Tap ya anune, ae waenapan nega Ierusalem nagirewa, yawan, Ayop ega, man donki otua gagap wanden oniwan.

¹⁶Mame venaseniwa Iesu wadiamot mega da ya di anu awane. Go evi amba Iesu kiman dot ae oya oya wareni gapan mame venaseni gueguewa ok namua wataget sean wane omewa gapan venaseni ame mu anu awan.

¹⁷Iesu, apan Lasiros wat inakameni, ap wamewa gapan waenapan aru ame Iesu Lasiros wat inakameni ase yawane, mu Lasiros oisewa ise wa asewa amon.

¹⁸Menan waenapan arugataet Iesu tautanapen amone, iwa me yo paua mame tan oisewa anune menan Ierusalem negine amuiwanumune.

¹⁹Ap menan pirisi nagirewa gare gare ase ma wawa mutan anega wane, “Yawan, nu taintoniwa tavewa da uon. Endi uon, endi ase yawat mega waenapan ma gaset iragi Iesu ewap amone.”

²⁰Endi Ian Gurik nagirewa upi nimakamup ap mepe Ierusalem gapan wanumuine den barip ame gagewa wa taragasepen dot amon.

²¹Amone apan Pilip, inewa tauan, (Pilip pa Betsaida, at Galili apanewa) mup muga inap anega wane, “Ae apan nugawa, nu Iesu yawat anuivin.”

²²Pilip mup ame tauen anuni boge ae Anduru wadien amba Pilip ge Anduru sia entanen Iesu wadiane.

²³Iesu gare wan, “Mamana God Kimani Vitana apanewa oya oya nega ao wara wara wamewa gaset tauen.

²⁴Endi ne nop tavewa di wadiaivin, tamudu makewa daiton megenat, go me pia geare boepiwa, me naewa wabawaramep aruga tata.

²⁵Apan da inak mega menan imu pose warep anu gure taiwandapinawa me inak wakaumeta, go apan da inak mega piup ma gapana tandayasiwandapinawa me inak mega yaibobot inagewa wat nat wandeta.

²⁶Orup da nenan ayamat tat anupi, me yon wande evinap onep, ne amba waingina arewa, nao nega ayamase tainiwa me ap mepe den wandeta. Orup ame nenan ayamat tainiwa Mamana menan anu gure viriwa tata.”

²⁷Iesu sia anega wan, “Endi menan ne bumagana vege waia, ap menan ne anen wain? ‘Maman wam koni mame gapan iana warupai,’ anega wain? Uon, ne endi wam koni mame miniwa menan tauan.” Iesu anega wan.

²⁸“Maman yauga oya oyae den ao wat!” Boge nop da kimani anega tauen, “Ne yauna oya oyae den gaset ao waran, amba yauna oya oyae den sia ao warain.”

²⁹Waenapan ame iam wanumone nop kimaniwa ame anun anega wane, “Ma ait da kimani waia,” amba upine anega wane, “Anea nop Iesu diwan.”

³⁰Menan Iesu anega wan, “Nop endi kimani taueni mame e inak ega menan, ne nenan uon.

³¹Wam ma endi ganawan piup koewa muga wanene tapen wamewa, endiwa piup ma namu yoyo taini ayopewa, Seitan, to oirenep taue garip aeta.

³²Go ne, piup ma gapan ne paina to endawanegepiwa waenapan iravi wa upamopen nek nenan onamoin.”

³³Iesu nop mame waniwa me bop mega gapan anenen ta ewamo boepi noa waiwandin.

³⁴Waenapan ame iam wanumone ao waiwanumun, “Nu God nop mega namua gapan anutoni ame Keriso tunano di wande aiwandata. Endi ge ame anenen waingi? Kimani Viseni apanewa paina to endavep boeta? Kimani Viseni apanewa ame da?”

³⁵Boge Iesu anega wadiamon, “E dun ganat mame inayap nononga ya wandeta, dun mame wandini gapan wat aisiwanian iwa sisip taue anap antapen imaepi tawa. Apan da sisipu ainiwa me aini neginewa me oare.

³⁶Menan anu tumat ega dun ame gapan ap mepe wandep, ame menan e dun ganat ame otu waiwa entan imaep.” Iesu nop ame waiwandini uon taniwa, me boge waenapan inamup karau ta at ame ae ve aen.

³⁷Iesu yo ge paua ugup ugup mame yamamup di taiwandin. Go Diu nagirewa aruga Iesu inap da ya di anu tumasene.

³⁸Mame taiwanumunewa apan Aisaia God nop mega wataget waiwandini ame tavewa tauapen menan venasiwandin. Ame Aisaia manega sen, Ayop negawa. Oit nuga mu ya anu tumasen. Aro amun gega ewamoan yawan, go usenagaet ya anu tumat gimak wanum.

³⁹Iesu nop mega mu anu tumat ya di tane tavewa mega ame apan Aisaia nop mame wataget den se wan,

⁴⁰God yamamu toboboren ge imu pose to musen, ap tani yamamu gapan da God yavep, ge imu pose gapan da anu avepi, amba entan God menan onamop, amba wat inakam mumepi menan tawa iragi toboboren.