SAN JUAN 12:15-40

¹⁵Ná cutsi̱i̱ cuꞌma̱ nguꞌ ca tyi quichi̱ Sión; cua lijya̱ nu Xuꞌna ma̱, ntucua yu chu̱ꞌ sca huru.

¹⁶Tyempo liꞌ ná ngua cuayáꞌ tiꞌ nguꞌ chaꞌ biꞌ. Pana ca tiyaꞌ la, loꞌo cua ngua lcaa chaꞌ tlyu nu ndyanu chaꞌ cuaꞌni Jesús loꞌo ya̱a̱ yu lo yuu, nu loꞌo ngua tlyu Jesús ca su ntucua yu loꞌo ycuiꞌ Ni nde cua̱, liꞌ ndyiꞌu tiꞌ nguꞌ nu ndyaca tsaꞌa̱ jiꞌi̱ yu, ndyiꞌu tiꞌ nguꞌ jiꞌi̱ chaꞌ nu nscua lo quityi biꞌ cua saꞌni la; ndyiꞌu tiꞌ nguꞌ chaꞌ la cuiꞌ juaꞌa̱ ngua jiꞌi̱ Jesús.

¹⁷Juaꞌa̱ ngua liꞌ. Nu ñati̱ nu ngutiꞌi̱ slo Jesús nu loꞌo ngusiꞌya Jesús jiꞌi̱ jyoꞌo Lázaro ca tyuquee su nguatsiꞌ chaꞌ tyuꞌú Lázaro chaca quiyaꞌ, nda nguꞌ chaꞌ loꞌo nguꞌ quichi̱ ñiꞌya̱ nu ngua chaꞌ biꞌ;

¹⁸biꞌ chaꞌ ngutuꞌu ñati̱ quiñaꞌa̱ biꞌ, ndyaa nguꞌ chaꞌ tyacua tyaꞌa nguꞌ loꞌo Jesús tyucui̱i̱, chaꞌ cua ndyuna nguꞌ ñiꞌya̱ nguaꞌni Jesús cña tonu biꞌ loꞌo Lázaro.

¹⁹Liꞌ nchcuiꞌ nguꞌ fariseo loꞌo tyaꞌa nguꞌ: ―Ñaꞌa̱ ma̱ jiꞌi̱ yu biꞌ. ¿Ñiꞌya̱ cuaꞌni na juani? Ná caca jiꞌna tsiyaꞌ ti tacu̱ꞌ na chaꞌ jiꞌi̱ yu biꞌ. Tyucui ñaꞌa̱ chalyuu ngusñi nguꞌ chaꞌ jiꞌi̱ yu juani.

²⁰Loꞌo nguꞌ griego ndyalaa laja ñati̱ nu ndyaꞌa̱ taꞌa biꞌ nde Jerusalén.

²¹Ñaa xi nguꞌ griego biꞌ slo Felipe liꞌ. Quichi̱ Betsaida laca quichi̱ tyi nu Felipe biꞌ; nde loyuu su cuentya Galilea, ca biꞌ ndiꞌi̱ quichi̱ biꞌ. Liꞌ nchcuiꞌ nguꞌ biꞌ loꞌo Felipe: ―Tyuꞌu chaꞌ clyu tiꞌ jinuꞌu̱, cusuꞌ, cua ntiꞌ ya tyacua tyaꞌa ya xi loꞌo Jesús ―nacui̱ nguꞌ.

²²Liꞌ ngutuꞌu Felipe ndyaa slo Andrés tyaꞌa quichi̱ tyi; stuꞌba ti ndyaa nguꞌ, ndyaa cachaꞌ nguꞌ jiꞌi̱ Jesús.

²³Loꞌo liꞌ nda Jesús sca chaꞌ loꞌo nguꞌ: ―Cua ndyalaa hora chaꞌ caca tlyu ycuiꞌ naꞌ loꞌo cajaa naꞌ, naꞌ nu cua lijya̱a̱ chalyuu chaꞌ caca̱ ñati̱ ―nacui̱ Jesús―.

²⁴Liñi tsa chaꞌ nu ta naꞌ loꞌo ma̱ juani, chaꞌ sca siꞌyu nu ndyataa nguꞌ ni, ñiꞌya̱ laca sca siꞌyu trigo, tyanu siꞌyu biꞌ juaꞌa̱ ti si ná cataa nguꞌ jiꞌi̱ lo yuu ―nacui̱―. Loꞌo cua ndyataa nguꞌ siꞌyu biꞌ lo yuu, liꞌ catsuꞌ scuaꞌ siꞌyu biꞌ, ñiꞌya̱ laca si na ngujuii ti. Pana nu loꞌo tyucua siꞌyu biꞌ, quiñaꞌa̱ tsa siꞌyu tyuꞌu lo biꞌ liꞌ.

²⁵Juaꞌa̱ laca loꞌo ñati̱ nu ntiꞌ xñi chaꞌ ꞌna ―nacui̱ Jesús―. Cua ñaꞌa̱ ca ñati̱ nu lye tsa nduꞌni tyacaꞌa jiꞌi̱ ycuiꞌ ca nguꞌ, chcunaꞌ chalyuu jiꞌi̱ nguꞌ; pana ñati̱ nu ná ntsi̱i̱ cajaa nguꞌ xquiꞌya naꞌ, biꞌ laca nu caja chalyuu nu ná ngaꞌa̱ chaꞌ tye jiꞌi̱ nguꞌ.

²⁶Loꞌo ntiꞌ ñati̱ cuaꞌni cña ꞌna ―nacui̱ Jesús liꞌ―, ngaꞌa̱ chaꞌ tsaa nguꞌ mala ntiꞌ naꞌ chaꞌ tsaa, chaꞌ liꞌ taca tyiꞌi̱ msu biꞌ ꞌna ca su ndiꞌi̱ ycuiꞌ naꞌ; loꞌo ycuiꞌ Sti Naꞌ cuaꞌni chi̱ Ni loo nguꞌ nu cuaꞌni cña ꞌna liꞌ.

²⁷Tya nchcuiꞌ la Jesús loꞌo nguꞌ liꞌ: ―Quiñaꞌa̱ tsa chaꞌ nclyacua tiꞌ naꞌ juani. ¿Ha tsoꞌo la si jña naꞌ jiꞌi̱ ycuiꞌ Ndyosi Sti naꞌ chaꞌ cuaꞌni Ni chaꞌ ná tyacua chaꞌ cuxi re ꞌna? Siꞌi, ná chcuiꞌ naꞌ juaꞌa̱. Cua ndyalaa hora ꞌna juani chaꞌ caca lcaa cña nu ngaꞌa̱ chaꞌ caca ꞌna.

²⁸Liꞌ nchcuiꞌ Jesús loꞌo ycuiꞌ Ndyosi Sti yu: ―Sti naꞌ, tsoꞌo la si caca tlyu ycuiꞌ nuꞌu̱. Liꞌ nguañi nchcuiꞌ ycuiꞌ Ndyosi nde cua̱. Ndiꞌya̱ nchcuiꞌ Ni: ―Cua laca nduꞌni tlyu nguꞌ jiꞌi̱ ycuiꞌ ca naꞌ, loꞌo juaꞌa̱ tya caca tlyu la naꞌ chaca quiyaꞌ xquiꞌya nuꞌu̱.

²⁹Liꞌ nacui̱ nu ñati̱ quiñaꞌa̱ nu ndiꞌi̱ cacua ti chaꞌ nguañi nchcuiꞌ tyiꞌyu, ngua tiꞌ nguꞌ. Xaꞌ la ñati̱ nacui̱ chaꞌ nde cua̱ ndyuꞌu chaꞌ nu nda sca xca̱ jiꞌi̱ ycuiꞌ Ndyosi loꞌo Jesús.

³⁰Pana ndiꞌya̱ nacui̱ ycuiꞌ Jesús: ―Xquiꞌya cuꞌma̱ laca chaꞌ nguañi nchcuiꞌ ycuiꞌ Ndyosi nde cua̱, siꞌi xquiꞌya naꞌ ―nacui̱ Jesús―.

³¹Cua ndyalaa hora chaꞌ cuaꞌni cuayáꞌ Ni jiꞌi̱ lcaa ñati̱ chalyuu, nu loꞌo tyiji̱loo naꞌ tsiyaꞌ ti jiꞌi̱ nu xñaꞌa̱ nu laca loo nde chalyuu ―nacui̱ Jesús jiꞌi̱ nguꞌ―.

³²Loꞌo sicua̱ nguꞌ cuxi jnaꞌ ca su ndiꞌi̱ naꞌ lo yuu, cujuiꞌi̱ caꞌa̱ nguꞌ jnaꞌ lo crusi, liꞌ cuane naꞌ jiꞌi̱ lcaa ñati̱ chaꞌ xñi nguꞌ chaꞌ ꞌna.

³³Juaꞌa̱ nacui̱ Jesús chaꞌ caca cuayáꞌ tiꞌ nguꞌ ñiꞌya̱ nu caca loꞌo cujuii nguꞌ jiꞌi̱ yu.

³⁴Liꞌ nguxtyacui nguꞌ chaꞌ loꞌo Jesús: ―Cua ndyuna ya loꞌo nchcuiꞌ nguꞌ lo quityi cusuꞌ jiꞌna, chaꞌ ndiꞌya̱ nscua, chaꞌ ná ngaꞌa̱ chaꞌ tye tsa̱ jiꞌi̱ Cristo, nu ñati̱ tlyu nu ta ycuiꞌ Ndyosi jiꞌi̱ lijya̱ ―nacui̱ nguꞌ―. ¿Ñiꞌya̱ ndyuꞌu chaꞌ nu nchcuiꞌ nuꞌu̱ chaꞌ ntsuꞌu chaꞌ cujuiꞌi̱ caꞌa̱ nguꞌ jiꞌi̱ lo crusi, jiꞌi̱ Cristo nu ya̱a̱ chalyuu chaꞌ caca ñati̱? ¿Ñiꞌya̱ ñaꞌa̱ ñati̱ laca nu Cristo biꞌ?

³⁵Liꞌ nguxtyacui Jesús chaꞌ loꞌo nguꞌ: ―Tya xi ca tsa̱ tya tyiꞌi̱ naꞌ slo cuꞌma̱, naꞌ nu ta̱ xee nu tyuꞌú neꞌ cresiya jiꞌi̱ ñati̱ ―nacui̱ Jesús―. Biꞌ chaꞌ juani yaa ma̱ su ngaꞌa̱ chaꞌ tsaa ma̱ loꞌo tya xee ti, chaꞌ ná cuaꞌni nu cuxi ngana jiꞌi̱ ma̱, nu cuxi nu nda talya chalyuu. Nu loꞌo talya ñaꞌa̱ su ndyaꞌa̱ na, ná jlo tiꞌ na ma nde ndyaꞌa̱ na liꞌ.

³⁶Loꞌo juaꞌa̱ cuꞌma̱ ―nacui̱ Jesús jiꞌi̱ nguꞌ―, tsoꞌo la si xñi ma̱ chaꞌ jnaꞌ laja loꞌo tya ndiꞌi̱ naꞌ chalyuu, naꞌ nu ta̱ xee nu tyuꞌú neꞌ cresiya jiꞌi̱ cuꞌma̱ ñati̱ chalyuu. Liꞌ tyucui tyiquee ma̱ caca ma̱ ñati̱ jiꞌi̱ ycuiꞌ Ndyosi. Ndye nchcuiꞌ Jesús juaꞌa̱ loꞌo nguꞌ, liꞌ ngutuꞌu yu ndyaa yu ca su ná quije yu jiꞌi̱ nguꞌ.

³⁷Masi cua nguaꞌni Jesús quiñaꞌa̱ chaꞌ tlyu slo ñati̱ biꞌ, ná ntajaꞌa̱ nguꞌ xñi nguꞌ chaꞌ nu nchcuiꞌ yu.

³⁸Juaꞌa̱ ngua chaꞌ caca lcaa chaꞌ nu nguscua jyoꞌo Isaías lo quityi jiꞌi̱ ycuiꞌ Ndyosi cua saꞌni la: Ndyosi Xuꞌna naꞌ, nacui̱ lo quityi biꞌ jiꞌi̱, ná ntajaꞌa̱ nguꞌ re xñi nguꞌ chaꞌ jinuꞌu̱, chaꞌ nu nda ya loꞌo nguꞌ. Ná ngua cuayáꞌ tiꞌ nguꞌ tsiyaꞌ ti si nuꞌu̱ nduꞌni chaꞌ tlyu slo nguꞌ. Juaꞌa̱ laca chaꞌ nu nscua lo quityi biꞌ.

³⁹Biꞌ chaꞌ ná ngua jiꞌi̱ nguꞌ judío biꞌ xñi nguꞌ chaꞌ jiꞌi̱ Jesús. Loꞌo juaꞌa̱ ntsuꞌu chaca chaꞌ nu nguscua jyoꞌo Isaías biꞌ:

⁴⁰Cua ndacu̱ꞌ ycuiꞌ Ndyosi hique nguꞌ biꞌ, nguaꞌni Ni chaꞌ cuꞌu̱ ti hique nguꞌ biꞌ. Juaꞌa̱ ngua chaꞌ ná ñaꞌa̱ nguꞌ ni chaꞌ laca biꞌ, chaꞌ ná caca cuayáꞌ tiꞌ nguꞌ chaꞌ biꞌ. Loꞌo juaꞌa̱ ná ntajaꞌa̱ nguꞌ culochu̱ꞌ nguꞌ jiꞌi̱ chaꞌ cuxi nu ntsuꞌu tyiquee nguꞌ, biꞌ chaꞌ ná nchca cuiꞌya naꞌ chaꞌ clyu tiꞌ jiꞌi̱ nguꞌ jiꞌi̱ chaꞌ cuxi biꞌ liꞌ, nacui̱ ycuiꞌ Ni.