YOHANA. 12:15-40

¹⁵“Sambiudumbe, gweye kiwambo cha Sayuni! Mndewa wako kokwiza, yapapigwe mumgongo wa mhunda mdodo.”

¹⁶Wanahina zake hawagatangile gano kipigiti kija, ila Yesu viyayenzigwe, wakumbukila kamba Nyandiko Zing'alile zilonga gano na avo gatendigwa gano sama yake.

¹⁷Wanhu wakalile na Yesu kipigiti viyamkemile Lazalo kulawa mdipanga na kumzusa kulawa mkudanganhika wagendelela kugapeta gaja galawilile.

¹⁸Wanhu bwando wachola kum'bokela, kwavija wakala wahulike kamba katenda mzonza uno.

¹⁹Abaho, Mafalisayo wakiilongela, “M'vona, tuhumwa! Lola, ulumwengu wose womkweleleza heyo!”

²⁰Mmwanza wa wanhu waja wacholile Yelusalemu kutambika kipigiti cha Ulusona lwa Pasaka wakala Wagiliki.

²¹Wachola ha Filipo, yakalile mwenekae wa Betisaida ako Galilaya, wamulongela, “Mndewa, tolonda kumona Yesu.”

²²Filipo kachola kumulongela Endelea, na awo wabili wachola kumulongela Yesu.

²³Yesu kawalongela, “Kipigiti cha nie, Mwana wa Munhu, kuyenzigwa kivika.

²⁴Nowalongela ikweli, kamba nzele ya ngano hailagale hasi na kudanganhika, yosigala kuwa imwe. Ila ihadanganhika, yolela nzele bwando.

²⁵Awo wounogela ugima wao wowagiza, na awo wowihila ugima wao muulumwengu uno wowika kuugima wa digunge.

²⁶Munhu yoyose yolonda kunisang'hanila kolondigwa yang'holeleze nie, kuja kunili na mtumigwa wangu vivija kowa hiko. Tataangu komuhishimila munhu yoyose yonisang'hanila nie.

²⁷“Moyo wangu una giogio, nongeze? Nilonge, ‘Tata, sambiuleke mbuli zino zinivikile?’ Bule, kwavija niza sama ya mbuli zino.

²⁸Tata, udiyenzi twaga jako!” Abaho, dihulikwa dizwi kulawa kuulanga, “Nidiyenzi, na nodiyenzi kabili.”

²⁹Wanhu bwando wakalile haja wadihulika dizwi dija, na wanhu wayagwe walonga ukala mdumo. Wayagwe walonga, “Msenga wa Mulungu wa kuulanga kalonga nayo!”

³⁰Ila Yesu kawalongela, “Dizwi dino dihulikwe si sama yangu nie, ila sama yenu mweye.

³¹Kino hicho kipigiti cha kutaguswa kwa ulumwengu, na kipigiti kino mtawala wa ulumwengu uno kowingigwa.

³²Nihenuligwa uchana kulawa muisi, nomkwega kila munhu kumwangu.”

³³Mkulonga gano kalagusa ifa ilihi yondayadanganhikile.

³⁴Adija ididale da wanhu dimulongela, “Malagizo getu gotulongela kamba Kilisto kokala milongo yose. Avo gweye kolongaze kamba Mwana wa Munhu kolondigwa yenuligwe uchana? Mwana ino wa Munhu iyo yalihi?”

³⁵Yesu kawalongela, “Mulangaza wowa namwe mkipigiti kidodo. Gendeleleni kutembela mnzila imulinayo kipigiti mulangaza ung'hali namwe, giladi ziza sambidiwavike. Kwavija Munhu yotembela mziza hakutanga koyochola.

³⁶Utogoleni mulangaza kipigiti u hamoja namwe, giladi muwe wana wa mulangaza.” Yesu viyeshile kulonga gano, kasegela kachola kuifisa.

³⁷Hamoja na kutenda mizonza ino yose hameso gao, hawamtogole,

³⁸avo gaja gayalongile Muhokozi Isaya galawilila kweli, yolonga, “Mndewa, yalihi yautogole usenga wetu? Mhiko ya Mndewa igubuligwa ha munhu yalihi?”

³⁹Hawatogole, kwavija vivija Isaya kalonga,

⁴⁰“Mulungu kagagubika meso gao, na kuzibumbuwaza nzewele zao, avo meso gao sambigalole, na sambiwavitange mnzewele zao, giladi sambiwanihindukile, niwahonye.”