SAN JUAN 12:15-40

¹⁵ẍaonha jaha, ciudad de Sión; tsjenxin que joí tti Rey de jaha jitaha ná colocho.

¹⁶Ngain momento jihi cain chojni que vacao Jesús coinxinha na cosa jihi, pero después, are Jesús ndavenhe co xechon, cottimeja ẍaxaon na que cain jihi jitaxin de ixin Jesús, co jañá conhe.

¹⁷Cain chojni que vintte ngain Jesús are jehe vayé Lázaro de ngain tti veẍavá co joinchexechon are ndavenhe, cain chojni mé coequin na tti jehe na vicon na.

¹⁸Mexinxin tsje chojni vac̈hje na para joiguetanxin na Jesús ngatja nttiha ixin venohe na tti joinchehe Jesús ngain Lázaro.

¹⁹Cottimeja xifariseo ndache chó xa: ―Tsjenxin ra, chojni ditticaonha na na ján na: cainxin na sattji na ngain jehe.

²⁰De ngayehe cainxin chojni que cjoi Jerusalén para joinchesayehe na quiai nttiha, vintte canxion chojni griego que cai vitticaon inchin chojni judío.

²¹Chojni griego jihi conchienhe na ngain Felipe, tti rajné Betsaida ngain Galilea, co joinchetsenhe na ñao ndac̈ho na: ―Rinaho na que soixin tsjagohna ra Jesús ixin rinaho na rronichjá na.

²²Felipe joindache Andrés, co cayoi na joindache na Jesús.

²³Cottimeja Jesús ndac̈ho: ―Ojoí tiempo que janha, tti Xí que joixin de ngajni, tsosayana.

²⁴Janha rrindattjo ra ndoa que si ná noanchjan de trigo detsingaha ngataha jinche co ndadenha, jehe noanchjan mé ẍajeho nacoa noanchjan, pero si noanchjan mé ndasenhe, cjan soan anto tsje noanchjan iná.

²⁵Tti chojni que anto rinao vidé, chojni mé ndasinchetján vida mé, pero tti chojni que rinaoha vidé ngain mundo jihi, chojni mé tsenchjinha vidé para ngain vida naroaxin que ẍonhi tiempo tsjexin.

²⁶Si c̈honja chojni rinao sinchehe ẍana janha, pero jehe chonda que sitticaon palabrana; co tti janha sarihi, nttiha sehe jehe cai. Tti chojni que sinchehe ẍana janha, Ndodana sinchesayehe Ndo chojni mé.

²⁷’Janha jai atto soji joachjaon tonohe ansenna; ¿quehe rrondac̈hjan janha? Janha rrondac̈hjanha: “Padre, tanc̈hjandaha na janha ngain tti tsonna jai.” Ixin para mé joixin janha.

²⁸Mexinxin janha rrondac̈hjan: “Padre, nttatsanha ñao, nchehe de que cain chojni sinttasayaha.” Cottimeja coinhi na tté Dios de ngajni que ndac̈ho: ―Janha ojointtaha jamé, co ẍa sinttaha iná.

²⁹Co canxion chojni que coinhi nttiha ndac̈ho na que joatte, co icanxin na ndac̈ho na: ―Ná ángel nichjé.

³⁰Cottimeja Jesús ndac̈ho ngain na: ―Tti jaha ra coinhi ra, yá para ixin jaha ra co nahi para ixin janha.

³¹Jai joí nchanho que Dios sinchejuzgá mundo jihi, co jai Dios senguixin de ngain mundo jihi tti ttetonha ngain mundo jai.

³²Co are chojni rrotsín na na janha noi nganito cruz, chojni de cain nación sinao na sitticaon na na janha.

³³Jesús ndac̈ho jihi para que coinxin jehe na queẍén senxin jehe.

³⁴Co chojni ndac̈ho na ngain Jesús: ―Janha na coian tti jitaxin ley que Cristo, tti Dios rrorroanha, chonda que sechon para cainxin tiempo. ¿Queẍén ndac̈hoxin jaha que tti Xí que joixin de ngajni chonda que rrotsín na noi nganito cruz? ¿Quensen yá tti Xí que joixin de ngajni?

³⁵Cottimeja Jesús ndac̈ho ngain na: ―Jai que janha ẍa rrihi ngayaha jaha ra rroc̈ho que ẍa chonda ra joadingasán jihi, pero jeho para nchion tiempo. Dacji ra jaxon que ẍa chonda ra joadingasán jihi para que sinttaẍaonha ra tti naxin xehe ixin tti chojni que c̈hji ngain tti naxin xehe noeha na ttinó rridintte na.

³⁶Ditticaon ni ra janha que janha inchin tti joadingasán jaxon que janha rrihi nganji ra, para que sintte ra chojní joadingasán. Co are joexin ndac̈ho Jesús cosa jihi, jehe sacjoi co tavemehe na.

³⁷Masqui Jesús joinchehe anto tsje milagro, co masqui joinchehe milagro mé ngattoxon con jehe na, jehe na vaguitticaonha na jehe

³⁸ixin chonda que joiconhe jamé ixin profeta Isaías dicjin janhi: ¿Quensen vitticaon joajnana na? ¿Quensen vicon tti joachaxin jie que chonda Dios?

³⁹Jañá mexinxin c̈hoha vitticaon na, co cai dicjin Isaías janhi:

⁴⁰Dios joinchechjian jehe na de chejo na ngain joarrixaoen na co de cha ansén na, para que siconxinha na conixin joarrixaoen na, ni tsinxinha na jian de ixin cosa jihi, ni tsiha na nganji na para que janha sinttaxingamá na.