San Juan 12:15-40

¹⁵“Ama manchacuychischu, Sión llajtayojcuna. Khawariychis, Reyniyquichis jamun uj malta asnito sillapi.”

¹⁶Discipuloncunaka manaraj caycunata entenderkancuchu. Jesús janaj pachaman purejtinraj, yuyarerkancu tucuy cay pasaskanta paymanta escribiska caskanta.

¹⁷Lazarota wañuskamanta causarichiskanta ricojcuna willachcarkancu ricuskancuta.

¹⁸Chayraycu runacunaka llojsimorkancu Jesusta taripaj, milagro ruwaskanmanta yachaspa.

¹⁹Fariseocunaka ninacorkancu: —Jina cajtenka, ni imatapas ruwayta atisunchischu. ¡Khawariychis, tucuy runacuna paywan puripuchcan!

²⁰Jerusalenpi Pascua fiestapi Diosta adorajcuna uqhupi waquin griegocuna cachcarkancu.

²¹Caycuna chimpaycuspa, Galileapi caj Betsaida llajtayoj Felipeta rogarkancu: —Señor, Jesusta ricuyta munaycu —nispa.

²²Felipetaj purispa, Andresman willamorkan, iscaynincutaj purispa Jesusman willamorkancu.

²³Jesús nerkan: —Tataj Churin wañunan hora chayamunña.

²⁴Segurayquichis, uj trigo muju jallp'api tarpojtin mana wañunchu chayka, sapallan quedan. Wañun chayri, achqha ajthapicun.

²⁵Causaynillanta munacojka chincachenka; cay pachapi causayninta mana casurajka wiñay causaypaj wakaychanka.

²⁶Pipas sirviway munajka nokawan purichun. Maypichus noka casaj, chayllapitaj sirvejneyka canka. Maykenpas sirviwajtaka Tatay honranka.

²⁷“¡Cay rato sinchi llaquiska cani chaywanpas! ¿Imanisajtaj? ¿Nisajchu: ‘Tatáy, cay llaquicuymanta libraway’? ¡Manachu, chaypajpuni jamuni!

²⁸Tatáy, sutiyquita honray. Janaj pachamantataj uj voz uyaricamorkan nispa: “Honraniña, ujtawan honrallasajtaj.”

²⁹Chaypi uyarejcunataj nerkancu: —Rayo suenan —nispa. Waquincunataj nerkancu: —Uj ángel parlamun —nispa.

³⁰Jesús nerkan: —Mana nokaraycuchu cay voz uyaricamun, manachayri kancunaraycu.

³¹Cunan rato mana creejcuna juchachaska cankacu; cay pachapi mandacoj supaypas katerkoska canka.

³²Tataj Churin chacataska caspa, tucuy runata pay quiquinman apamonka.

³³Jesús cayta nispa entendicherkan imaynatachus wañunanmanta.

³⁴Runacunataj contestarkancu: —Nokaycu leymanta yachaycu Cristoka wiñaypaj causananta. ¿Imaynatataj kan ninqui, Tataj Churin chacataska cananta? ¿Pitaj chay Tataj Churinri?

³⁵Jesús nerkan: —Kancuna uqhupiraj c'anchay canka pisi p'unchaycunallataña. Puriychis, ari, c'anchay cachcajtinraj, ama tutayay jap'inasunquichispaj. Tutayajpi purejcunaka mana yachancuchu mayta puriskancuta.

³⁶C'anchayraj cachcajtenka, c'anchaypi creeychis, c'anchaypi causanayquichispaj. Cayta niytawan, Jesús puripuspa paycunamanta pacaycucorkan.

³⁷Jesús athun milagrocunata ñaupakencupi ruwaska chaywanpas, judiocunaka mana paypi creerkancuchu,

³⁸profeta Isaiaspaj escribiskan junt'acunan caskanraycu: “Señor, ¿pitaj willaskaycuta creen? ¿Pimantaj Señorpaj atiynin ricuchiska carkan?”

³⁹Ajinaka mana creeyta aterkancuchu, Isaías escribillarkantaj:

⁴⁰“Dios ñawincuta ñausayacherkan, sonkoncutataj rumiyacherkan, mana ricunancupaj, ni entendinancupaj, mana nokaman cutirimunancupaj, nokataj mana alliyachinaypaj.”