Yohani 12:15-40

¹⁵“Ukotoo kutila mbwani ya Sayuni! Loli mutwa waku akwisa, Kayipaka ngwada wa chihongu!”

¹⁶Chipindi chila vandundami vaki vamanyili ha chilongu chila, lakini Yesu pajumiwili kala, vakumbukili chila chiyandikilwi kwa mweni na vandu vamgolela wuwula.

¹⁷Lipinga lya vandu lyaveli pamu na Yesu pala pamkemeyi Lasalu kufuma musembi na kamshukusha kufuma munjifwa, vawombili milandu ya Yesu.

¹⁸Lipinga lila lya vandu lyayisili, nongwa vosi vapikanishili kucha Yesu agolili chilangushilu chila.

¹⁹Mafwalisayu vayiwombela, “Mkulola! Datuweshi kugola chindu ha! Mloli mlima wosi ukumkovekela.”

²⁰Kwaveli Vagiliki vamu wa vala vafikili Yelusalemu kumluva Chapanga mulijuva lila.

²¹Vala vamyendela Filipu, mwenikaya wa Betisayida kula Galilaya, vawomba, “Bambu, tukudayila kumlola Yesu.”

²²Filipu kayenda, kamuwombela Andeleya, pambeli vosi vavili vayenda kumuwombela Yesu.

²³Yesu kavawombela, “Saa ya kujumiwa Mwana wa Mundu yifika kala!

²⁴Nakaka nguvawombela, ngokwa ya mupunga yikusighala ngokwa hela hata payiponeka pasi pauganga pambeli yikusova. Mani payisova, yikulela fivelekwa fitangalili.

²⁵Vala yivautama unofu wawu davawuyaghamishi na vala yivatila ngalilu yau mumlima awu davayangi unofu wa jola.

²⁶Yadayila kungimbanikila, angovekeli ili pala pandiva nenga na vandumindumi vangu vavi. Tati wangu damtundamili mundu ayu.”

²⁷“Ndima yangu yikalala ponopa ng'ombi liki? Wuli ng'ombi, ‘Tati ukotoo kujumisha chipindi achi mikiwa nenga’? Lakini ayi ndi nongwa yinyisilili ili mbiti muchipindi achi kuteshiwa.

²⁸Tati, lijumi litawa lyaku.” Topi, lishu kufuma kumbindi kwa Chapanga lideta, “Nilijuma kala na danilijumi kandi.”

²⁹Lipinga lya vandu liwolukili pala lipikanila lishu lila, vamu vawomba, “Kudilima.” Vamu vawomba, “Makungu kaywanga na mweni!”

³⁰Lakini Yesu kavawombela, “Lishu ali lipikanika kwanongwa ya nenga ha, lishu ali lipikana kwanongwa ya yumwi.

³¹Hinapawu chipindi cha mlima awu kuhighiwa, mnakulongosha mlima awu dawushiwi.

³²Na nenga pabikuliwa kumbindi kwa Chapanga mumlima, dandivakweyi vandu vosi kwa nenga.”

³³Adetili nawula kulangusha kucha dasovi kwa njifwa liki.

³⁴Topi, lipinga lila limuyangula, “Yufwi tupikanila kufuma mumalawu vetu kucha Kilistu dayikali jola. Dauweshi wuli kuwomba nakaka Mwana wa mundu akudayila kunyasuliwa? Na mwana wa mundoyu ghani?”

³⁵Yesu kavawombela, “Lwengi luva pamu na yumwi kwa chipindi chitali ha. Muyendi yendi kukali na ngesha, ili lwisa lukotoo kuvagubika, kwanongwa yayendayenda mulwisa kamanya ng'odu kwayenda.

³⁶Pamuveyi na ngesha mujumili ili muva kala vana va lwengi.” Pamalilili kudeta filongu fila, Yesu kawuka kayifisa kutali na lipinga lila.

³⁷Yesu agolili mihilu yosi pavalola, lakini veni vamjumilili ha,

³⁸ili filongu fya detili mbuyi wa Chapanga Isaya ndafiwoneka, “Bambu, ghani yajumilili chilongu chetu? Uwesu wa Bambu uwoneka kwa ghani?”

³⁹Vawesha ha kujumila, kwanongwa Isaya kawomba kandi,

⁴⁰“Chapanga kawomba, dandivapofoli mesu vawu, kavapugha luhala lwawu vakotoo kulola kwa mesu vawu, na mahala vawu vakotoo kumanya vakotoo kung'alambukila nenga, kawomba Bambu, ng'weshi kuvagola vanani.”