Sion 12:15-40

¹⁵“Saion abiw mutuk fian kasel yu kanelom finganemokoliw te! Yukalem Kamok Fian akati yukalem dim toloke kasike! E ibolow menew so Kamok Fian keko, donki men manmon dim kel teineko, toloke te!”, angse kale.

¹⁶Kanese ding dim bakate, akalem gelewkabiliw kunum i kanele beem mongom e kilele dolon keko, kal kelinba kesiliw kate, Yesus em wiin fian kuluko, katem elo unse ding dim bakate, i kilele dolon keko, kal keliwete: “Fut tem bosiliw weng be Yesus em dulum elo fut tem boko, em elo kanesiliw beem dulum elo angsiliw kai!”, angeko, kal kesiliw kale.

¹⁷Kaem ding dim bakate, Alasalus em kuaneko, iti fomkamin dim dawkalfolse eisneng be atemsiliw kawtiw banban i Yesus em kanese eisneng be bakayem yak yak unsiliw kale.

¹⁸Bakayem yak yak unsiliw kasike, kawtiw banban mak Yesus em kitil so auk so aluwse eisneng beem sang kilisomi, elo atebam unsiliw kale.

¹⁹Unesomeliwi, Falisi kunum ikalem akate bokolew bokolew kelomeliw: “Ebo! Num ‘Kaneluma!’, anguw deiw be banime kate! Aneng aneng angom im kasel alik alik i elo anggelewiw kasike!”, ange ange kesiliw kale.

²⁰Abanggayemse Ding ibolow fukunkabiliw ding dim bakate, kalo talsiliw kawtiw biim mutuk e mali Suda kawtiw im ibik biliw kawtiw ikati iso makuw Selusalem abiw mutuk fian kawtem elo uneko, Sunbin-Got em wiin fian daolewomin ibolow keko, kalo unsiliw kale.

²¹Keko beli, mali talsiliw kawtiw i Yesus em gelewkabe kunum Filiw em mit mewso uneko, elo weng mak bokolewsiliw kale. Filiw e Galili aneng fian em abiw fong gel Betsaida em kayak ete kale. Kame, i elo bokolewomeliw: “Kamok kutaka! Nu Yesus elo atemomin talbuluw te!”, dangsiliw kale.

²²Dangiwi, e uneko, Andulu elo bokolewei, aso i uneko, Yesus elo weng kal be de unsiliw kale.

²³De uniwi, e akalem gelewkabiliw kunum ilo bokoyemomele: “Kawtiw Aul nem wiin fian kulomin ding kame bakalete!

²⁴Yu nem fakam weng kale kilele kililoliwka! Kunum mak wit ais dem mak kawin dim kailei, ais dem be kuaninba kele tewe, ais dem be dem banban nam gilako, emikel kuw bóke te.

²⁵Yu kilele ibolow fukunina! Nimin kunum waneng ite mak ikalem kal folok keko, ibolow fian dulewbiw tewe, ikalem finik so fein banimokoliw te. Kate, nimin kunum waneng ite mak ikalem kawin dim kaleem kal folok kelinba keko, deng dako, ibik kuliw tewe, ikalem finik bete, sunsun kuw aluweko, bókoliw te.

²⁶Nimin kunum waneng ite mak nelo ‘Kom weng afak kunum waneng keluma!’, nangiw tewe, i nelo nenggeleweko, nem bi dim ka kel akati nem weng afak kunum waneng keko, neso boliwka! Bomeliwi, i nem weng afak kunum waneng keliw tewe, Aatim e ilo wiin fian mak duyemoke te.

²⁷Ebo! Kame, ne kal ilum fian mak kululomin mewso kebomi, ibolow tiaktiak kebi kasike, ne Aatim elo bokolewomeli: ‘Ku nem kal ilum kale dokonemew kano, bakinemoka!’, dangoki sako? Bayo! Ne nam dangi te! Nimtew angom? Kaneloke kal ilum be kulomin beem mongom ete kuw talsi kasike.”, yangesomi,

²⁸akalem Alew elo bokolewomele: “Nem Aatim kutaka! Kukalem auk so kitil so be kukuyemeko, wiin fian keboka!”, dangse kale. Em angse ding dim bakate, abiil tikin katem elote weng mak gaaneko, mit dako, bokolomele: “Sua kel akate, nakalem wiin e fian kelewsi te. Kame akati, iti wiin fian so keli te!”, angse kale.

²⁹Angei, mali ka biliw kawtiw i weng be kiliko, bokolomeliw: “Kiman bikine sako?”, angiwi, mali mak bokolomeliw: “Babo! Sunbin-Got em dabalakamin finik mak weng fian mak bakalewbe kai!”, ange ange kesiliw kale.

³⁰Ange ange kemiwi, Yesus e bokoyemomele: “Nem ibolow kitil kelomin beem dulum elo weng be kililinba keliw kate, yulo dokoyemomin beem dulum elo weng be kilisiliw te.

³¹Feinka! Kame akate, kawin dim kaleem kasel im diwyemomin ding kele kasike, kawin dim kaleem emisik kamok fian Seten-Ataanim em anbakalalomin ding akati kele te.

³²Ibik kel em nelo nemdeko, nem kal kawin dim kale dao konemokoliw ding dim kabalak e, ne kunum waneng demdem mak nem dim elo kuw sok so giko, bing tew keyemoki te.”, yangse kale.

³³Yesus em bokoyemomele: “I nelo nemdeko, nem kal kawin dim kale dao konemokoliw kai!”, angse weng be akalem ais dim da kolewiwi, e kuanoke em kiskiw weng ete kale.

³⁴Keko beli, ka biliw kawtiw i bokolewomeliw: “Moses em kukuyemse weng e nulo bokoyemomele: ‘Mesaya e teleko, diwkuw diwkuw kale kel boke te!’, angse kate, ku nimtew angom ete bokolomelew: ‘I Kawtiw Aul nelo daoko, kolewokoliw te!’, angbelew a? Kawtiw Aul be kante kate?”, dangsiliw kale.

³⁵Dangiwi, e yan weng bokoyemomele: “Fong sukum ding gel mak ailbin e yuso be te. Em ailbe dim ding bakate, yu ailbin dim kel kakamoliwka! Mesik esik kutiliw em kitil e yulo kasi koyemoke kasike. Yu kutiliw mutuk kakamiw tewe, yu deiw kawkeineko, teifulu unokoliw kasike.

³⁶Ailbin beem yuso be ding dim bakate, yu ailbin elo ‘Fein kai!’, dangoliwka! Dangesomi, yukal ailbin dim em muluwel kebokoliw te!”, yangse kale. Yangbe ding dim bakate, e ilo koyemeko, im kiin dim wokmoko, unse kale.

³⁷Feinka! Yesus e kitil so auk so aluwbamin banso banso aluwse kate, kawtiw banban mak elo “Fein!”, danginba kelewsiliw kale.

³⁸Kanese beem mongom ete sua kel akate Sunbin-Got em bontem dim kunum Aisaya e weng mak fut tem boko, bokolomele: “Kamok Fian kutaka! Mak kunum waneng mak nukalem yangsi weng be kiliko, elo ‘Fein!’, danginba kebiliw te. Feinka! Ku kawtiw ilo kom kitil so teing em aluwbamin kukuyemkabelew kate, i atemeko, ‘Fein!’, danginba kebiliw te.”, angse kale. Angse weng bakate, kame Yesus em dulum fein dem so kese kale.

³⁹Sua kel akate, Aisaya be iti weng mak bokose kasike, kawtiw i ki keko, Yesus elo ‘Fein!’, danginba kelewsiliw te. E fut tem boko, bokolomele:

⁴⁰“Sunbin-Got e kunum waneng im kiin e kasi koyemei, i kiin so ateminba keliw te. Keko beli, e ikalem ibolow fukunin tem akal kou net keyemei, i ibolow teifuluko, kilele kal keko, nam dolon keko, biw te. Keko kasike, i ki keko, wa kukuw gelewkabiliw em deiw koleweko, nem mit mewso nam teliw kasike, ne ilo dokoyemeko, nam kileleyemi te.”, angse kale.