Ioanes 12:15-40

¹⁵“Natu i Sion, a vavina, koko u burut, una gire kaum King i vana rikai, i ki ta ra nat na as.”

¹⁶Kana tarai na vartovo pa dia matoto lua boko ta go ra lavur magit; ma ba Iesu i tar ki ta kana minamar, dia nuk pa ia muka ba di ga tumu go ra umana magit ure, ma ba di ga pait ot pa go ra lavur magit i tana.

¹⁷Nam ra kor na tarai, dia ga tur pirana ba i ga oro vairop Lasaro kan ra babang na minat, ma i ga valaun pa ia mulai kan ra minat, dia varveai tana.

¹⁸Go bula i vuna tago a kor na tarai dia ga vana oai dia totongo upi ia tana, tago dia nunure ba i ga pait go ra vakilang.

¹⁹A umana Parisaio dia biti vargil dari: Ava gire ba ava mama pait ta magit; ea, a rakarakan a gunagunan i mur ia.

²⁰Ta ra umana Elenas bula diat dia ga vana urama ta ra lukara upi diat a lotu;

²¹ma dia tadav Pilipo, nina maro Betsaida arama Galilaia, ma dia tir ia dari: Luluai, ave mainge ba avet a gire Iesu.

²²Pilipo i vana, i ve Andreas; Andreas dir ma Pilipo, dir vana, ma dir varve Iesu.

²³Iesu i biti dari ta dir: Gori a pakana bung i tar pot ba da mar Natu i ra tutana.

²⁴A dovot go iau tatike ta vavat: Ari ona ra pat i ra vit pa i bura ta ra bala na pia ma ba pa i mat, i ki varkolono ko; ba i mat, i vuai mangoro na vuaina.

²⁵Nina i mari kana nilaun, na varara vue; ma nina i milikuane kana nilaun ati ra pia, na vatur vake upi ra nilaun tukum.

²⁶Ba tikai i toratorom tagu boina ba na murmur iau; ma kaugu tultul na ki aina ina ki ie; ba tikai i torom tagu, Tama na vadoane.

²⁷Go i ngarao ra tulungeagu; ma ava ina tatike? Tama, una valaun iau kan go ra pakana bung. Ma ure go ra magit iat iau tar tadav go ra pakana bung tana.

²⁸Tama, una mar ra iangim. Ma ra nilai tikai i vana rikai marama ra bala na bakut dari: Iau ga mar ia, ma ina mar ia mulai.

²⁹A kor na tarai, nina dia tur pirana, dia valongore, ma dia tatike, ba i tar pangpagur; ta ra umana dia biti: Tika na angelo i tar tata pa ia.

³⁰Iesu i biti: Go ra tinata pa i vana rikai ure iau, ure avat iat.

³¹Go di kure go ra rakarakan a gunagunan; go da okole vue ra luluai kai go ra rakarakan a gunagunan.

³²Ma iau, ba di vatur iau urama kan ra rakarakan a gunagunan, ina al pa ra tarai par piragu.

³³I tatike go ure ra mangamangana vinirua ba na mat i tana.

³⁴A kor na tarai dia bali ia dari: Ave ga valongore ta ra tinata na varkurai ba ra Kristo na laun tukum; ma dave go u tatike ba: Da vatur Natu i ra tutana urama? To ia go ra Natu i ra tutana?

³⁵Iesu i biti ta diat: A ik ika boko ra kapa i ki pire vavat. Avat a vanavana ba ra kapa i ki boko pire vavat, kan ra bobotoi na tadav avat; nam i vanavana ta ra bobotoi, pa i nunure ba i vana uve.

³⁶Ba ra kapa i ki boko pire vavat, avat a nurnur ta ra kapa, upi avat a umana natu i ra kapa. Iesu i tatike vue go ra lavur magit, ma i vana, i parau kan diat.

³⁷Ma go i tar pait mangoro na vakilang ta ra mata i diat, ma pa dia nurnur tana;

³⁸upi na da nam ra tinata Iesaia i ga tatike dari: “Luluai, to ia i ga valongore kaveve varveai? Ma di ga ve tar ra lima i ra Luluai tai ia?”

³⁹Go ra vuna pa dia ga nurnur tana, tago Iesaia i ga tatike bula:

⁴⁰“I ga vapula bat ra kiau na mata i diat, ma i ga valeo ra bala i diat; Kan diat a gigira ma ra ura kiau na mata i diat, ma kan diat a matoto ma ra bala i diat. Ma diat a vana tapuku, Ma ina valagar pa diat.”