Jon 12:15-40

¹⁵“Gong gam sokeh, foron keleflik tina Saion. Gam par, king kimi apiek mang, ka kiis na nenge dongki ae biil biitom tikas i kiis ta lo.”

¹⁶Na famu, berberat na fafausum kia biil ri malal tah na foron tier tikii igii. Isau le na aunbiing Iesu i aptih fis tina minet, ma ka kep memeh kia tah, ke ri ka malal mang le foron tier igii, Buk na Gogoh i use ta u ulo, ma igii ri ka tel ta u ulo.

¹⁷Ma gur na fanu tinaiwa na aisa, na aunbiing i kam fasuuh ta Lasarus tina matanfat una luun minet, ma ka faptih pes u tina minet, ri ka famam kep sararah orek.

¹⁸Pesu gur na fanu ae ri ka la isi tafe u, wara le ri ka ongen ta u le, ka fatapiek ta rakrakai na fakileng igii.

¹⁹Ke foron Farasi ri ka fas fafis temtem tikii lo ri le, “Gam par u, biil biitom kere tel fasuut ti tier. Gam par u, fanu tikii ri ka mih mang lo.”

²⁰Fal e fanu tina Grik tinaiwa na fatpoton fanu ae ri la tah isi lotu na tel inen na Liuliu Kulef na Ierusalem.

²¹Ri ka la usuf Pilip, kaltu tina Betsaida, na sun falifuh na Galili, ma ri ka tarah, “Ier, kemem ier isi par Iesu.”

²²Pilip ka la isi fas Enru, ke ru turim ru ka la isi fas Iesu.

²³Iesu ka kiliis ruh aragii, “Aunbiing igii mang ka tapiek, isi Kalalik ken Kaltu ik kep memeh kia.

²⁴Tekentu kanaka ia fas kamuh, le nenge kutun wit biil i luut una nanal ma ka mang, ke in tapiek in tikii sau e kutun wit. Isau le, male in luut una nanal ma ka mang, ke in kuum, ma in fatapiek in fuun e kutun wit.

²⁵Ma kaltu ae i ier kanaka tom isi liu kia, liu ae in mangmangal koseng u. Isau le kaltu ae i ememse liu kia aga na piklinbat, in guun u una liu fitliu.

²⁶Seh sau ae i ier la isi tel foim kiak, in mi lo iau, isi falifuh ae ian la ulo, i sabin in la ulo. Tata in fakalok seh ae i ier la isi tel foim kiak.”

²⁷“Igii balang ka tatawin, ma sanih ian use u? ‘Tata, faliu iau koseng kiptin aunbiing na tatawin igii.’ Biil. I wara ia ka la uga, isi ian la na palga e kiptin aunbiing na tatawin igii.

²⁸Tata, on me asam!” Ke neng e orek ka puh tina kukulii, ka tarah, “Ia ka me ta asang ma ian me u sabin.”

²⁹Ke gur na fanu ae ri tih tah aiwa, ri ka ongen u ma ri ka tara le i pah tah, ma fal ri ka tara le neng e angelo i orek tah usuf i.

³⁰Iesu ka kiliis ri ma ka tarah, “Orek igii una rokap kimi, biil kiak.

³¹Igii mang e aunbiing God in nagogon fanu tikii na piklinbat, ma igii in fes ufu Satan, laulaumet tinaga na piklinbat.

³²Isau le, aunbiing ri ka fafen ta iau tina nanal, ian dat fanu tikii usuf iau.”

³³Ka use u aragii una finngas matngan minet, ae in met arae.

³⁴Ma gur na fanu ae ri ka kiliis u le, “Kemem ka ongen ta u na Nagogon le Mesaia in kiis fitliu, ke arafah bin o ka tara le, Kalalik ken Kaltu rin fafen ta u tom? Seh tom, i e Kalalik ken Kaltu igii?”

³⁵Ke Iesu ka fas ri aragii, “Gamen kep u e malal ae fatuklin aunbiing sau. Gam la, aunbiing i mel biitom e malal isi kubunor gong i afit gam. Ma kaltu ae i la na kubunor, biil i usum na falifuh i la ulo.

³⁶Luun unune kimi na malal na aunbiing gam kep u, isi gamen tapiek arae foron kalalik tina malal.” Aunbiing ka farfarop na orek, Iesu ka la ma ka mumun lo ri.

³⁷Taftawa le, Iesu ka tel ta ifuun e rakrakai na fakileng tah na matri, isau le biil tom ri unune lo.

³⁸Foron tier igii una fatekentu orek ae poropet Aisaia i siit ta u le, “Kumguui, biil tikas i unune biitom na orek kimem, ke biil tikas i kep ti malal biitom na rakrakai kiam.”

³⁹Pesu, biil i fasih rin unune, wara le poropet Aisaia i use u sabin le,

⁴⁰“God ka fakut ta matri, ke ka fasorokai ta balri, isi biil i fasih rin par failiim ini matri, le biil rin ililiim ini balri, isi rik fis usuf iau ma iak faliu pes ri.”