Yohana 12:15-40

¹⁵“Msekogoha, wantu wa mzi wa Sayuni! Kaula Seuta ywenyu eza, kakwela mwana mpunda.”

¹⁶Wanampina wakwe hawabunkule izi mbuli izo nkongo, mna chipindi Yesu eze aheze kutunywa, niyo wakumbuka kugamba mbuli ziya ziwandikwa mwa uyo na viya wamtendile.

¹⁷Fyo dya wantu wadya wendile hamwenga na Yesu umo amwitangaga Lazalo kulaila mwe mbila niyo amuuyusa waukula mbuli zilaile.

¹⁸Ivyo nivyo vilekile fyo dya wantu wamsingila, kwaviya wose weva kugamba Yesu nendile kadamanya chilagiso icho.

¹⁹Mafalisayo niyo wagambilana, “Mwawona, Hachikudaha ng'o! Kaulani, isi yose wamtimila!”

²⁰Hendaga na Wagiliki wamwenga mgati mwa wantu waitile Yelusalemu kuvika mwe ngasu iyo.

²¹Awo niyo wamwitila Filipo mkaya ywa Betisaida mwe isi ya Galilaya, wagamba, “Mkulu, chaunga chimwone Yesu.”

²²Filipo aita, amgambila Anduleya, wowo nawo waidi waita wamgambila Yesu.

²³Yesu awagamba, “Saa ya kutunywa kwa Mwana ywa Mntu ibula.

²⁴Nawagambilani chindedi, mpuluzi ya ngano yasigala mpuluzi du mna hadya ikugwela mo ulongo nakubanika. Uneva inabanika, yeleka matunda yalozize.

²⁵Akunga wikazi wakwe nawaze, akwihiwa wikazi wakwe mwe isi ino nawike kwa chausa cho ujima wa mazuwa yose.

²⁶Akunga anisankanile aungwa anitimile, ivyo nuko kugamba hohose hadya na nitendeke miye naho no mndima ywangu natende. Na Tate namtunye mntu yoyose akunisankanila.

²⁷“Haluse muye wangu wehelwa, nanigambe mbwani? Nigambe, ‘Tate, nambula mwe mbuli na zinizile mwe saa ino’? Mna nivyo vikuleka siza chani nijinke mwe isaa ino.

²⁸Tate, ditunye idizina dyako!” Aho izwi dyevika kulaila kwembingu, “Situnya, naho naniditunye vituhu.”

²⁹Fyo dya wantu wendile wachimala aho weva izwi idyo, wamwenga wawo wagamba ni mlulumo, wamwenga wagamba, “Mndima ywa kwembingu kalonga naye!”

³⁰Mna Yesu niyo awagamba, “Izwi idyo hadivike kwa chausa changu miye, mna kwa chausa chenyu.

³¹Haluse nicho chipindi che isi ino kukantilwa, haluse Ibilisi, zumbe ywe isi ino naalagazwe.

³²Miye nami naninulwe kulanga kulaila hasi he isi nanimkwese chila yumwenga kwangu.”

³³Kwa kulonga ivyo kalagisa nabanike vivihi.

³⁴Fyo idyo niyo dyamhitula, “Suwe chagambilwa ni sigilizi yetu kugamba Kulisito nekale mazuwa yose, haluse wadaha vivihi kugamba Mwana Mntu aungwa enulwe? Uyo Mwana Mntu ni yuhi?”

³⁵Yesu awagamba, “Ung'azi uchei na nyuwe kwa chipindi chiguhi, talamkani mche mnanawo uwo ung'azi chani chilo chise kuwabwila, kwaviya akutalamka mwe chiza hamanyize uko akwita.

³⁶Umo mnanawo uwo ung'azi uzumileni chani mtende wantu wa ung'azi.” Eze alonge imilosi iyo, Yesu niyo ahalawa hekumanya aita hekukumanyika.

³⁷Hatahegu Yesu na kadamanya mpituko ino yose mwa meso yawo, wowo hawamzumile.

³⁸Ivyo milosi alongile muwoni Isaya niyo yalaila; “Zumbe ni yuhi auzumile ulosi wetu? Naho udahi wa Zumbe ugubulwa kwa yuhi?”

³⁹Ivyo hawadahile kuzumila kwaviya Isaya nakalonga vituhu,

⁴⁰“Chohile kajela utuntu ameso yawo, kazibalanga izifanyanyi zawo, wasekuwona kwa meso yawo, wasekumanya kwa fanyanyi zawo, naho wasekunihitukila, alonga Zumbe, chani niwahonye.”