Joan 12:15-40

¹⁵“Gara pitsarogaigi viroegi Shionkunirira, pokapaaketari Pigoveenkariegite ishigakotantapaakari akamotiakyanirira ashino.”

¹⁶Kantankicha yogaegiri irogamereegi tera irogoige iroro otsatagunkani otsirinkakotunkanirira, kantankicha impogini iataira Jeso enoku ario pinkante isureiganakaro magatiro ineaigakerira ovashi ikantaigake: “Arisanoniroro iriro oniakotake otsirinkakotunkanirira nerotyo ario ikañotagunkani maika.”

¹⁷Yogaegiri neaigakeririra Jeso yoganiairira Irasaro ikaemakotairira ikitavetunkanira ikamantageigakeri maganiro,

¹⁸nerotyo iatantaigakarira itonkivoaigavakarira Jeso.

¹⁹Yogaegiri pariseoegi ikantavakagaiganaka: —Nero nokantira tyampa ankantaigakempara maika. ¡Pineaigakeriniroro maika maganirosanotyo ishineventaiganakari!

²⁰Iatagarantaigake aikiro guriegoegi Jerosarenku irogavisaigakiterora Pasekoa.

²¹Iriroegi iaigake inakera Jeripe poniankicharira Vetsairaku Garireaku ikantaigiri: —Nokogaigake noneaigakerira Jeso.

²²Impo yogari Jeripe iatake ikamantakerira Anturishi ovashi itentanakari iaigakera ikamantaigakerira Jeso.

²³Impo irirori ikantaigiri: —Maika atake aganaka inkoveenkatagaerira Tasorintsi Kañotasanotakaririra Matsigenka, inkamaketari impo iranianaera iriataera iriroku.

²⁴Maika nonkamantasanoigakempi ario onkañotakempa maika, garika opankitagani turigoki garatyo otovaigi kantakanityo onkañotakempara pakitsotiro onake. Antari ompankitakenkanirika ompegavetakempatyo oga okitsoki, kantankicha ogatyo ontovaiganake onkitsokitanakera, oshivokanaketari oga okitsoki.

²⁵Ario okañotaka maika tyanirika intagati ikogake irovetsikagetakera tatarika ikogagetakerira irirori ikiirotyo kañotagantanankicha, kantankicha yogari kogankitsirira irovetsikakerora nokogagetirira naro, iriro pinkante nonkavintsaavagetakeri, aikiro inkantakani intimake.

²⁶Tyanirika kogankitsi irovetsikakera nokogagetirira naro irorotyo impiriniventake, impogini intimake naroku, imirinkatari vetsikatsirira nokogagetirira naro, irishineventakempari Apa inkantakerira: ‘Kametitake, maika taina naroku pishinevagetakempara.’

²⁷“Maikari maika novankinavagetakatyo kara, kantankicha ¿ario tyara nonkante? Garorokari nokantumati: ‘Apa, pogavisaakotaenara ganiri natsipereavageti nonkamakera’, irorotari nopokashitake.

²⁸Apa, neakagaigeri maganiro arisano pagaveavageti kameti irishineventaigakempiniri.” Impo inianake Tasorintsi enoku ikanti: “Matakaniroro noneakagaigakeri, kantankicha impo noneakagaigaeri aikiro.”

²⁹Iroro ikemaigakerira maganiro patoventaigakaririra Jeso ikonogagarantaigaka ikantaiganake: —Onti kareti. Kantankicha pashinikya kantaiganankitsi: —Inti niakeri isaankariite Tasorintsi.

³⁰Yogari Jeso ikantaigiri: —Tera ario onienkani nonkemakerora naro, ontityo oniinkani pinkemaigakerora viroegi.

³¹Maika gapaaka inkañotagantaigakenkanira maganiro kisaigakenarira, aikiro iragaveakenkanira shintaigaririra maganiro kañovageigacharira.

³²Antari irogaenokakoitakenara inkentakoitakenara ario pinkante nonkematsatagaigakeri maganiro ikogakagaigakerira Apa inkematsaigakenara.

³³Antari ikantakera maika onti ikamantantakera tyara inkantakenkani irogamagakenkanira.

³⁴Yogaegiri patoventaigakaririra ikantaigiri: —Kogapage okantake itsirinkakagantaigakenarira Tasorintsi yogari intigankakerira impegakempara Agoveenkariegite gara ineimatiro igamane. Maika ¿tyara okantakara pikantakera irogaenokakotakenkani Kañotasanotakaririra Matsigenka inkentakotakenkanira? ¿Matsi tyanimpatyora yoga Kañotasanotakaririra Matsigenka?

³⁵Yogari Jeso ikantaigiri: —Maikari maika aiñokya pikutagitetakoigi, kantankicha gara samani okañota maika. Irorotari nonkantantaigakempirira kametitake panuivageigakera maika aityokyara okutagiteti ganiri okomutagaigimpi pavatsaari. Antari panuitera pavatsaariku gara pogoti tyara piatake.

³⁶Narotari kutagitetakoigakempi, maika pinkematsaigakenara aiñokyara notentaigimpi kameti pimpegaigakempara itomiegi Tasorintsi. Impo iroro ikantakera Jeso maika iatake yomanapitsaigakarira.

³⁷Yogari Jeso yovetsikagevetakatyo posantepage terira oneimagetenkani ineakagaigakerira maganiro, kantankicha iriroegi teratyo inkematsaigeri ikantakera: “Nanti Itomi Tasorintsi.”

³⁸Onti okañotaka maika kameti ontsatagakenkanira itsirinkakerira kamantantatsirira Isaiashi okanti: “Notinkami, nokenkitsaigavetakaro piniane kantankicha teratyo tyani kematsatumaigenane. Pogikoneatimoigavetakari pagaveane kantankicha teratyo inkematsatumaigempi.”

³⁹Okañotantakarira maika tera iragaveaige inkematsaigakera, ariotari ikantakeri Isaiashi aikiro itsirinkakera ikanti:

⁴⁰“Yogari Tasorintsi tyarika ikantakoigakeri kameti ganiri yogoigi, kañomataka ontinirikatyo tenige ineaigae, aikiro kañomataka tenirikatyo ontimumate isureegi. Ikañoigakeri maika kameti ganiri ineantaigaro iroki, aikiro ganiri ikemaigavakero iriniane iragaigavakerora isureku, ontiri aikiro ganiri ikantatigaiga kameti nogavisaakoigakerira.”