JUAN 12:15-40

¹⁵Grëse to meṉ Israel, gdziebde to. ¡Goḻwi gaṉle, laa meṉ ne rnabey ladz to ziaad i, zobse me lad tib burr yeeṉ!

¹⁶Grëse no ne nac no xpëëdscuel me, ni tib no bieṉd hor co ne grëse ncuaaṉe noyac ga, raquietlew lo Xtiidz Dios; sinque haxta zeyle me gbaa, dzigoraa psoladz no nzian grë ncuaaṉe raquiet lo Xtiidz Dios ga, goṉlo no goca; ni bieṉ no Jesús raquiet ga.

¹⁷Lad grë miech guizhiu co no nzian zha ne goṉ zha bleeban me Lazh, dzigo nguiedz rzodiidz zhow lo grë miech co.

¹⁸Ni nzian grë miech co, laa zho blanso ga ziaad-xinëz zho me, sac bin zho zha beeṉ me milagr nroob co.

¹⁹Grë zha farisé, zeeṉe goṉ zho grë miech guizhiu co, rneechaa zho: ―¡Pe zhidaa grë miech qui racnie meṉ qui! ¡Peraa nadieṉ dziuuṉ ne!

²⁰Lad grë miech ne bdziṉ Jerusalén ga, ziegaṉ Dios leṉ ngbidz Pascw co, lad co no blalaa zha zit ne nacd zha Israel,

²¹dzigo bnee zho lo Lip (zha Betsaid nac Lip) rëb zho: ―Bzhiguieḻ bnë dieṉ pa lo no Jesús, laa no racladz dziaṉ no me.

²²Dzigo güey Lip rëb Lipa lo Ndrés, blozh ga güey zho grop zho güeynie zho diidz lo Jesús.

²³Dzigo rëbchaa me lo zho: ―Naa ne nac naa Mgui ne pxeeḻ Dios, niinataa nagoṉ laa dze bdziṉ zeeṉe laa naa gbire guia gbaa stib.

²⁴Goḻquiaadiaga gaṉle: Tib zhobxtil, teḻne tsoda liu tibaque zhob naca; per zeeṉe laa zhob co rio liu, nzian raca. Scaque naa nagoṉ, none guet naa, none tsoliu naa, zeeṉa gacnzian zha ne ygab xnëz naa.

²⁵Sac zha ne rquia zdoo xquieḻmban, znitlonie zhow; saṉgue zha ne cueeladz xquieḻmban, zha cosi zgaa zho tib guieḻmban ndzon ne ib gdziṉd dze lozh.

²⁶Zha ne racladz sëëb xnëz naa, none guṉ zho miṉe rnabey naa; ni zaatne gdziṉ naa yeque zho no gdziṉ ga. Ni grëse zha ne sëëb xnëz naa ni gon zho xtidz naa, zuṉnon Pxoz naa zho.

²⁷Mban rac zdoo naa niina. Per lëda ga guṉ naa, teḻne guiep naa lo Pxoz naa csilaa me naa lo grëtaa guieḻnë ne no teed naa. ¡Sac par miṉcopaa ziaḻ naa lo guidzliu rii!

²⁸’Dios, luu ne nac luu Pxoz naa ―rëb me―. Blu lo grë miech rii gaṉle ne meṉ nroob nac luu. Dzigo bin zho zëëb tib tsi meṉ co gbaa, rëb me: ―Laaw blule naa, ni niina laa naa gbire gluw stib.

²⁹Nzian grë miech ne ndxie ga, zeeṉe bin zho tsi meṉ co, bzhaac zho nguziw; zha ne bieṉ led nguzida, rnee zho: ―Xanjl Dios ga goṉ bnee lo me.

³⁰Dzigo rëbchaa me lo zho: ―Laa to bin gaṉle laa Pxoz naa bnee, ni por to goṉ bnee me, zeeṉa gon to tsi me ni gliladz to ne me pxeeḻ naa.

³¹Laa dze nagoṉ bdziṉ zeeṉe laa Dios guṉquizh naa xtoḻ grëse miech guidzliu rii; lëë dze bdziṉ zeeṉe laa meṉdox piche gnabeydraa ma lo guidzliu rii zigne rnabey ma niina.

³²Sac zeeṉe laa naa quia glaa lo cruz, ga cuedz naa grëse miech zeeṉa sëëb zho xnëz naa.

³³Ga bzeet me zha gut miech me.

³⁴Grë miech ne ndxie ga, zeeṉe bin zho sca rëb me, rëbchaa zho: ―¿Guet luu ye? Lo Xtiidz Dios name rnee, ib guete Meṉ ne cxeeḻ Dios ga. ¿Zha nac dzigo ne rnee luu laa luu guet? ¿Chopaa dzigo nac luu?

³⁵Dzigo pquiab me rëb me lo zho: ―Naa nac zig tib biini ne noziini lo miech; ni ngabse dze ne cuëz naa lo to. Laga noziini naa lo to, goḻsëni zaatne riab biini zeeṉa ygaade to guieḻcow; sac zha ne rzë lo ncow rieṉd zho palo zie zho.

³⁶Niina ne rdeeda diidz goḻliladz cho nac naa, zeeṉa gac to zha ne nlipaa no lo biini. Blozhse sca rëb me laa me biche ga, blulodraa me lo zho.

³⁷Niicle goṉlo zho nzian milagr ne beeṉ me, per ib rliladzd zho ne nli Dios pxeeḻ me.

³⁸Ni ib scalegaa no gaca, sac ga brieequia miṉe bzeet Isá (tib meṉ ne biadteed xtiidz Dios) zeeṉe znu rëb me: Dios, bui gaṉle ni tib choot nëd gliladz xtiidz luu, niicle raṉ zho grëtaa milagr ne ruṉ luu.

³⁹Ni nligaa ib brieelod nliladz zho me; sac zeeṉe pquiaa Isá, znu rëb me:

⁴⁰Ncow psaṉ Dios lo zho, ni beeṉndip me zdoo zho; zeeṉa gaṉd zho me, niicle guieṉdgaa zho zha gbig zho lo me csilaa me zho lo xtoḻ zho.