San Juan 12:15-40

¹⁵Ayi guidxyihbi tu bwiinn nin nuu loh guihdxyi Siohn; gulguiaꞌha laꞌh xrrehyi tu zeꞌ dziꞌba tuhbi buhrra bweezu.

¹⁶Ya desde guzoꞌbalohon, ayi guhcabwaꞌ raꞌ xpwiinn Jesuhs dxyiꞌdxyi raꞌ riiꞌ, per chin babahn Ñiꞌh loh raꞌ bwiinnguuchi, chiꞌchi bagannahstoꞌ raꞌ ba garaa raꞌ dxyiꞌdxyi nin caa loh Xchihtsi Dxiohs pur laꞌh Ñiꞌh cun neezaa garaa raꞌ nin bwiꞌhnnee raꞌ bwiinn laꞌh Ñiꞌh tin guzohba raꞌ dxyiꞌdxyi chi,

¹⁷ya bwiinn raꞌ nin zuunee laꞌh Jesuhs chin bacwaꞌhn Ñiꞌh laꞌh Lásaro loh guelguhchi, bwiiꞌyidxyiꞌdxyi raꞌ ba nin bwaꞌha raꞌ ba,

¹⁸niꞌchin nin biriaꞌh raꞌ bwiinn tin bagadxiꞌhyi raꞌ ba laꞌh Jesuhs, laasii bihn raꞌ ba bwiꞌhnn Jesuhs tuhbi sehn rooꞌ,

¹⁹ya chiꞌchi rahbi loh lasaaꞌ raꞌ bwiinn fariseu raꞌ: ―¿Gu rwaꞌha tu nnah ayi nuu xa guidiꞌhnn nuꞌh? Garaa raꞌ bwiinn zeenaꞌhla laꞌh Jesuhs.

²⁰Loh raꞌ bwiinn nin zee raꞌ para guihdxyi Jerusalehn nin zee raꞌ lañih dxaꞌga raꞌ paaldaa raꞌ bwiinn griehgu raꞌ.

²¹Bwiinn raꞌ riiꞌ gwabiiga raꞌ hasta zeꞌ Felipe, nin naa tuhbi bwiinn Betsaida loh guihdxyi Galilea, ya gunaaba raꞌ ba loh Felipe rahbi raꞌ ba: ―Daada, xclaaꞌdzi nu guidiaꞌha nu laꞌh Jesuhs.

²²Ya gwahguihtsi Felipen loh Andrehs, ya garoopa raꞌ ba gwahguihtsi raꞌ ban loh Jesuhs,

²³ya chiꞌchi rahbi Jesuhs: ―Laꞌh hohra bigaꞌha tin guunn lasahca Dxiohs laꞌh Lliiꞌn Ñiꞌh nin naa Lliiꞌn ndxiꞌhw Ñiꞌh,

²⁴pwihsi rñiꞌn loh tu, sidela laꞌh tuhbi bwiiꞌdzi trihgu dxiaaba loh yuh ya sidela ayi ñichilohon zeezah naan tuhbi dxiꞌh bwiiꞌdzi, per sidela laꞌhan ñichilohon loh yuh ya guitahnan rudiꞌhin jusehchi rooꞌ.

²⁵Bwiinn raꞌ nin rcaꞌhstoꞌ ru ñiꞌh xquelnabahan raꞌ ñiꞌh zuñihchi raꞌ ban, per laꞌh raꞌ bwiinn raꞌ nin rbweꞌhestoꞌ ñiꞌh xquelnabahan ñiꞌh loh guihdxyiyuh riiꞌ zicaꞌha ba guelnabahan nin ayi ñichilohtiiꞌ.

²⁶Sidela chyuulla bwiinn xclaaꞌdzi dxieꞌnaꞌhla naꞌh, dxieꞌnaꞌhla ba naꞌh; ya hasta chuuꞌhuhn riꞌchi za chuu raꞌ bwiinn raꞌ nin dxieꞌnaꞌhla naꞌh, nee sidela laꞌh chyuulla bwiinn xclaaꞌdzi guunn xtsiꞌnaꞌhn, ziahxinee Xtaada Dxiohsaꞌhn laꞌh bwiinn chi.

²⁷Rahbi za Ñiꞌh: ―Yannah ziahan lligaaba nuuꞌhuhn; ¿xa gaꞌpihn? ¿Ta gaꞌpihn: “Paah, bataꞌh naꞌh loh raꞌ cohsa riiꞌ nnah”? Per naꞌh para niꞌchi zeꞌldahn.

²⁸Paah, bwiꞌhnn nin guunn lasahca ziga naa lah luꞌh. Ya chiꞌchi bihn raꞌ ba tuhbi rsiaaꞌha nez llaaꞌndxibaaꞌ nin rahbi: ―Laꞌn bwiꞌhnn lasahca la laan, per nicala guunn lasahcañin stuhbi.

²⁹Ya garaa raꞌ bwiinn raꞌ nin rii raꞌ riꞌchi rahbi raꞌ ba guziꞌw niꞌchi guñiꞌ, ya snuhn raꞌ ba rahbi: ―Guñiꞌ tuhbi xaanjla Dxiohs.

³⁰Ya chiꞌchi rahbi Jesuhs: ―Ayi guhca dxyiꞌdxyi nin bihn tu pur xcweeꞌntahn, sino que pur xcweenta tu,

³¹yannah laꞌh hohra bigaꞌha dxiꞌh xquelguxchiisi Dxiohs loh guidxyiyuh riiꞌ, niꞌchin nnah zareꞌdxiaꞌhla bwiinn nin rnabwaꞌ loh guidxyiyuh riiꞌ,

³²per naꞌh chin guiteesa raꞌ ba naꞌh loh guidxyiyuh riiꞌ, zutiaaꞌha gahcahn garaa raꞌ bwiinn loon.

³³Ya cun garaa raꞌ dxyiꞌdxyi raꞌ riiꞌ guñiꞌ Ñiꞌh loh raꞌ ba xa gachi Ñiꞌh,

³⁴ya chiꞌchi raꞌbi raꞌ bwiinn: ―Pwihsi loh lehyi bihn nu xa rñiꞌn laꞌh Crixtu ayi nahpa gachi Ñiꞌh nahpa zibahan Ñiꞌh para tuꞌpazi. ¿Xaalla rñiꞌ chiꞌh luꞌh, laꞌh Lliiꞌn Dxiohs nin naa ndxiꞌhw nahpa guiteesa raꞌ ba laꞌh ba loh guidxyiyuh riiꞌ? ¿Cuun nin naa laꞌh Lliiꞌn Dxiohs nin naa ndxiꞌhw nin ruzeꞌta luꞌh?

³⁵Ya chiꞌchi rahbi Jesuhs: ―Laꞌh bwiinn nin naa biaꞌñih loh tu laꞌh ba nuu gahca loh tu, per za balaaquiꞌhn si nahpa tu biaꞌñih riiꞌ, niꞌchin gulsah loh biaꞌñih gaduhbi nin rziaꞌñihrun tin ayi sah tu loh nacahyi, laasii laꞌh bwiinn nin rzah loh nacahyi nin ayi gaann ba canehza guzee ba.

³⁶Gulchechiistoꞌ tu biaꞌñih gaduhbi nin nuu gahca Ñiꞌh loh tu, tin gaca tu bwiinn nin luꞌh cwih loh biaꞌñih. Ya chin guyaꞌloh guñiꞌ Ñiꞌh dxyiꞌdxyi raꞌ riiꞌ loh raꞌ ba, zee chiꞌh Jesuhs stuhbi nehza tin guyuuꞌlaꞌn Ñiꞌh loh raꞌ bwiinn Israel raꞌ chi.

³⁷Ya nicala bwiꞌhnn Jesuhs ziahan sehn rooꞌ raꞌ loh raꞌ bwiinn Israel raꞌ per ayi gwachiistoꞌ raꞌ ba laꞌh Jesuhs,

³⁸laasii nahpa guzohba dxyiꞌdxyi nin bacaꞌh guehtu Isaías chin bacaꞌh ba squiiꞌ: Daada, ¿chyu bwiinn gwachiistoꞌ ñiꞌh xchiꞌdxyi nuꞌh, nee chyuloo baluuꞌyiloh xquelrnabwaꞌ Daada Dxiohs?

³⁹Pwihsi ayi guhcabwaꞌ raꞌ ba tin ñachiistoꞌ raꞌ ba, pwihsi neezaa bacaꞌh guehtu Isaías squiiꞌ:

⁴⁰Dxiohs bwiꞌhnn dxieꞌpa laꞌh tu, nee cun bwiꞌhnn dxiipa za Ñiꞌh stoꞌ tu tin ayi dxiinn loh tu nee nin ayi za gacabwaꞌ stoꞌ tu, nee nin ayi za guibiaꞌgarii tu loon tin gusiaꞌcahn laꞌh tu.