IOANE 12:15-40

¹⁵Siona natuna kekenina e, asio gari. A itaia, emu Ḡaubada na e maimu, Doniki natuna doruna ai e helaimu.

¹⁶Ena hahediba na unu hereva anidia asi dibadia una negana ai; a Iesu hairaina e abia negana ai idia vada e helalo une, eto, Herevadia bunu vada e tore, idia danu unu e karaia toma.

¹⁷Taunimanima hutuma na ia ida e nohova, ia ese Lasaro gara amo e boiria lasi bona mase amo e hatorea isi negana ai; bena idia ese harina e piua.

¹⁸Una dainai hutuma bada ia vairana ela; badina be idia na vada e kamonai ia ese una toa e karaia.

¹⁹Bena Farisea taudia na e hereva heheni, eto, O itaiamu, umui na o dareremu; tanobada idoinai be ia enai vada e taomu.

²⁰Aria negana ai toma-diho totona e dara dae taudia haida na Helene taudia.

²¹Idia na Filipo, Betesaida Galilea tauna, dekena ela, e hamaoroa, eto, Ḡauka e, ai na a uramu Iesu baia itaia.

²²Filipo na ela, Andrea e hamaoroa, bena Andrea Filipo ida ela, Iesu e hamaoroa.

²³Bena Iesu ese e haere henidia, eto, Negana vada eme gini dae, Taunimanima Natuna ese hairaina vada baine abia.

²⁴Momokani vaitani na hamaoromuimu, uit nadinadina na tano ai basine moru, basine mase, ia na sibona baine mia kava; a baine mase, anina badana baine dobi.

²⁵Ena mauri e ura heniamu tauna ese mauri baine reaia; a ena mauri ina tanobada ai e inai heniamu tauna ese mauri baine abia tao ela bona hanaihanai.

²⁶Tau ta baine ura lau isiaigu baine lao henia, ia ese baine ḡavagu; bena lau baina noho gabuna ai na egu hesiai tauna danu baine noho. Bema tau ta ese lau isiaigu baine lao henia, Tamagu ese do baine hanamoa.

²⁷Harihari kudougu eme hetaha. Dahaka aina gwauraia? Bainato “Tamagu e, ina hora amo ame hamaurigu”? Lasi; badina binai hari ina hora ai vada name kau.

²⁸Tamagu e, ladamu a heatolaia. Bena gado ta guba amo ema, eto, Vada name heatolaia; ma baina heatolaia.

²⁹Bena hutuma unuseni ai gigini vada e kamonai; bena eto, Guba eme rahua. Ma haida eto, Aneru ta ese e hereva henia.

³⁰Iesu ese ma e hereva henidia, eto, Una gado na dia lau daigu ai, a umui daimui ai ema.

³¹Harihari ina tanobada na e hahemaoro heniamu; harihari ina tanobada lohiana bae lulua lasi.

³²Lau na tanobada ai bae piugu isi; unu amo taunimanima iboudiai lau dekegu ai baina veridia.

³³Ia na unu e gwau toma, ena mase dalana e hahedinaraia.

³⁴Bena aru taudia ese e haere henia, eto, Ai na taravatu amo vada a kamonai, Keriso na do baine noho hanaihanai. Badina be dahaka oi na o tomu Taunimanima Natuna bae piua isi? Ina Taunimanima Natuna be daika?

³⁵Iesu eto, Nega sisina diari na doene mia dekemui ai. Ba raka balaheni, diari o abiamu negana ai, dibura ese baine butumui tao na garina. Dibura lalonai e rakamu tauna na e lao heniamu gabuna asi dibana.

³⁶Diari o abiamu negana ai, diari bavabiabiraia, diari memeromui ai ba hahelao helaoreana. Iesu na unu e hereva toma, bena e raka oho, e noho hehuni.

³⁷Ena be ia ese toa diaḡau vairadiai e karava, to idia ese asie abiabiraiava.

³⁸Taunabunai, Isaia, peroveta tauna, ena hereva vada e momokani; eto, Lohiabada e, daika ese emai hereva eme abia dae? Bona Lohiabada imana danu daika enai eme hedinarai?

³⁹Una dainai idia ese asie abiabiraia; badina be Isaia ma eto,

⁴⁰Ia ese matadia vada e hakepulu, Lalodia danu vada e haduhu; Matadia amo bae ita na garina, Bona lalodia amo bae diba na garina. Bena bae helalo kerehai bona baina hamauridia na garina.