Job 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne migkaǥi pa is Nengazen diyà te ki Job te,

²“Iyan a Megbevayà he Mekeǥeǥehem. Piru ibpeletew nu ves diyà te kebpekidlalis nu kedì he nesayep a. Ne ǥuntaan tevaka a kenikew.”

³Umbe, midtavak ni Job is Nengazen te,

⁴“Kenà a ereg he edtavak kenikew. Hengkey is idtavak ku? Ebpereremek e zà.

⁵Mezakel en is nekaǥi ku. Kenà ad ebpedayun te kegkaǥi.”

⁶Ne mid-uman megkaǥi is Nengazen diyà te ki Job he ebpuun diyà te eribpures is laǥeng din,

⁷“Pengandam ka, ne tevaka nu is menge insè ku.

⁸Iyan be ibpeletew nu he kenà a metazeng su para medletew he iyan ka metazeng?

⁹Mekeǥeǥehem ke ve iring kedì? Edraǥeb be is laǥeng nu iring te kedì?

¹⁰Emun egkehimu nu heeyan, ne ipeheehè nu is kegkemekeǥeǥehem nu, kegkelavew nu, wey zengeg nu.

¹¹Ipeehè nu is dekelà he pauk nu te menge mepelevawen pinaaǥi te kebpekevevaa nu kandan. Ne runteka nu is menge lalung diyà te edhitindeǥan dan.

¹³Ileveng nu sikandan is langun diyà te tanà, diyà te lugar te menge minatey.

¹⁴Emun egkehimu nu heeyan, iyan a mismu edalig kenikew, ne ebpeǥumbenar a he zuen nu egkehimu te kedlibri te keugelingen nu.

¹⁵“Ahaa nu is langgam he hipuputamus, he linimbag ku iring kenikew. Ebpenabtab dà sikandin iring te vaka,

¹⁶piru utew sikandin mezesen. Is lawa zin ne utew melig-en.

¹⁷Is ikug din iring te kayu he sidru, nepenù te zesen is menge vuvun din.

¹⁸Is menge tulan din ne iring kelig-en te tuvu he brunsi etawa kebilya.

¹⁹Edhuna heini he egkein-inuwan kenà te zuma he menge linimbag ku, piru siak is midlimbag kayi egkezaag ku heini.

²⁰Ebpenabtab sikandin diyà te menge vuvungan dutun te eguǥusà is leew he menge langgam diyà te uvey zin.

²¹Edleku heini ziyà te lempek te ebpenuvù he zuǥiyen, he egketembunan te menge ribpes he uvey te wahig.

²²Iyan egkehimu he helungè din is ebpenuvù he menge zuǥiyen wey zuma pa he ebpenuvù diyà te uvey te zal-ug.

²³Kenè din igkahandek is deǥurus te wahig. Melinew is kegeǥehinawa zin minsan henduen be te egketembunan en te Wahig he Jordan.

²⁴Hentei is ebpekezakep kandin pinaaǥi te kedezeeti te mata zin? Hentei is ebpeketinlang te izung din pinaaǥi te kedhingutela kandin?