Job 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne midtavak si Job te,

²“Purungi a keniyu pemineǥa su wey a keniyu melipey.

³Pemineg kew emun egkaǥi a, ne emun ebpekepasad ad, ne sudia ad keniyu ke iyan egkesuatan niw.

⁴Kenà a ziyà edriklamu te etew, kekenà, diyà a edriklamu te Megbevayà. Iyan heini hinungdan ke maan is melemu a egkepauk.

⁵Tengtengi e man keniyu, ne siguradu egkesabpeng niw is bèbè niw te kegkeinuinu niw te nehitavù kedì he henduen te kenà egketuuwan.

⁶Emun ed-isipen ku is nengehitavù kedì, ne egkerkeren a te kegkahandek ku.

⁷“Maan is ebpedayun is kegkeuyag-uyag te lalung? Ebmemeǥurang sikandan wey ebmeuswaǥen.

⁸Ne egkeehè dan pa is kedezekelà te menge anak dan wey menge apù dan.

⁹Ne ebpekeubpè pa sikandan diyà te menge valey zan he wazà kezeetan wey wazè dan igkahandek, ne wazà sikandan siluti te Megbevayà.

¹⁰Kenà edsalang ed-anak is menge vaka zan wey kenè daan egkengerenranan.

¹¹Henduen be te menge kerehidu is menge anak dan su mahabet. Edsesayew zan,

¹²egkanta, wey edlilipeylipey te tukar te tamburin, alpa, wey pulalà.

¹³Ebpengungubpaan sikandan he meuswaǥen wey ebpemematey zan he melinawen.

¹⁴Piru egkeǥiyan dan is Megbevayà te, ‘Bey-ani key en kenikew! Su wazè key medtinguhà he metueni zey is menge paaǥi nu.

¹⁵Hentei ke man is egngezanan he Mekeǥeǥehem? Maan is ereg ka he edsilbiyan dey? Ne hengkey is egkekuwa zey emun ed-ampù key ziyà te kenikew?’

¹⁶Piru is tutuu, is ked-uswag dan ne kenà tenged te keugelingen dan he kedhaǥù. Umbe kenè ku ebpemineǥen is sambag kayi te lalung he menge etew.

¹⁷“Piru zeisey zà kandan te menge lalung is ebpematey. Mezelag dà sikandan ebpekesaǥad te kelised etawa silut he ebpeseǥazan te Megbevayà kandan tenged te pauk din.

¹⁸Mezelag dà sikandan edsegseǥa iring te reǥami etawa ukap he idlayap te mevandes he keramag.

¹⁹Egkaǥi kew te emun kenà sikandan edsilutan te Megbevayà, iyan din edsilutan is menge anak dan. Piru iyan kedì he egkekaǥi is: iyan ereg he edsilutan te Megbevayà is nekesalà, su para meseǥazi zan

²⁰wey meǥezamgezam dan is kegkezeeti kandan. Belaǥad en ke egkeǥezaman dan is pauk te Mekeǥeǥehem he Megbevayà.

²¹Emun ebpatey zan en ne wazè dan en hanew te egkehitavù te pemilya zan.

²²“Egkepenurù be te etew is Megbevayà te iyan man sikandin kes meghuhukum te minsan menge lavew he ilengiten he linimbag?

²³Duen menge etew he nemematey he zekelà is azen dan wey eyehey is kebpekesavuk dan,

²⁴wey meupiya is kedlelawa zan.

²⁵Ne zuen daan menge etew he nemematey he utew subra is seeng dan, wey wazà mekeǥezam te meupiya he kebpengungubpaan.

²⁶Piru ebpeked-iring dan dà su pudu zan idleveng wey pudu egkeena te tagkey.

²⁷“Netuenan ku ke hengkey is ed-is-isipen niw. Netuenan ku is paaǥi niw te kebaal te mezaat he ebpekesuǥat kedì.

²⁸Edtudtulan a keniyu mehitenged te sepian he menge etew he nengerundus is menge valey zan tenged te kelelalung dan.

²⁹Piru insai niw is sumeseǥazà, wey pemineǥa niw is ebpengeǥiyen dan. Su edtudtulan kew zan

³⁰he minsan is lalung he menge etew, egkelibri emun ebpekeuma is bangkit tenged te pauk te Megbevayà.

³¹Wazà etew he ibpeǥawaǥawa zin is kedewaya zin te lalung he etew. Wazà daan etew he ebales kandin te mezaat he vaal zin.

³²Emun igkeleveng en sikandin, duen pa vantey he ebantey te leveng din.

³³Mahabet is eduyug kandin, ne is tanà ebeǥey kandin te egkehimelayan din.

³⁴“Umbe kenà egkehimu he egkelipey a pinaaǥi te menge lalag niw he wazè din pulus. Kenà tutuu is ebpengeǥiyen niw.”