Job 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Nenangdù a he kenè ku ebpezumahan te arig is kedtengteng ku te menge raǥa.

²Su hengkey man is bales he ibeǥey te Mekeǥeǥehem he Megbevayà diyà te langit te ebeelan te etew?

³Kenè be kezeetan wey vangkit is para te ebaal te mezaat?

⁴Netuenan te Megbevayà is langun he ebeelan ku.

⁵Emun midtarùtarù a wey nenlimbung a,

⁶ne zeyzey ke edhukuman a te Megbevayà. Su egketuenan din emun ebpekesalà a.

⁷Emun wazà a med-ikul te hustu he zalan su iyan ku mibpezumdumahan is iveg te menge mata ku, wey midremerikan ku is keugelingen ku,

⁸deyzey ke egkengezeetan is menge pinemula ku etawa zeyzey ke zuma he etew is ebpekekaan kayi.

⁹Emun netintal a te vahi etawa neeriǥan a te esawa te zuma ku he meǥinged,

¹⁰deyzey ke egkuwaan etawa edhulizen te senge memaama is esawa ku.

¹¹Su is kebpekivahi, mekeeled-eled he salà, ne ereg he edsilutan is ebaal zuen.

¹²Iring heini te hapuy he ebpekeigmuk su ebpekezezaat heini te langun he azen ku.

¹³“Emun wazè ku veliya is ketenged te menge suluǥuen ku zutun te kedriklamu zan kayi te kedì,

¹⁴hengkey is egkehimu ku emun edhukuman a te Megbevayà? Hengkey is idtavak ku ke ed-imbistigahan e zin?

¹⁵Kenè be is Megbevayà he mibaal kedì iyan daan mibaal te menge suluǥuen ku?

¹⁶“Emun wazà a medtavang te menge pubri wey valu he menge vahi he edlised,

¹⁷wey mibpeleleǥed a te keenen diyà te menge ilu, deyzey ke edsilutan a te Megbevayà.

¹⁸Piru puun pa te vatè e pa ed-eturen ku en is menge ilu; seled te tivuuk he untung ku wazè ku vey-ani is menge valu he vahi.

¹⁹Emun duen etew he egkeehè ku he egkerasey te kegkeǥenew su kurang sikandin te visti,

²⁰ne ebeǥayan ku te visti he para te meǥenew he vineelan puun te vulvul te menge kerehidu ku. Ne ebpeselamat sikandin kayi te kedì te ebpuun diyà te ǥehinawa zin.

²¹Emun mibpesekitan ku pinaaǥi te velad ku is ilu, su ǥeina te zuen ku ǥehem diyà te hukmanan,

²²ne zeyzey ke metamped is belad ku.

²³Kenè ku egkehimu heeyan he menge vaal su igkahandek ku is silut wey ǥehem te Megbevayà.

²⁴“Wazà a medsarig te ketiǥeyunan ku; wazè ku isipa he iyan heini ebpekeveǥey kedì te kesiguruwan.

²⁵Wazà a mebpegalbu tenged te zekelà he ketiǥeyunan ku wey te langun he menge azen he naangken ku.

²⁶Wazè ku ezapa is andew he merayag is kedsilè din wey is bulan he mekaayam-ayam is kedwaleng din.

²⁷Wazà mevulug metaǥù diyà te ǥehinawa ku is ked-azap kayi.

²⁸Emun tutuu he mibeelan ku heini he menge salà ne ereg a he edsilutan su midluivan ku is Megbevayà diyà te langit.

²⁹“Wazè ku ikelipey is kegkezeeti te menge kuntada ku etawa kebpekebmereǥen dan.

³⁰Wazà a mebaal te salà pinaaǥi te kedrewaki ku kandan.

³¹Wazà nevitil ziyà te pemilya ku.

³²Wazè ku ikesuat ke minsan hendei zà duen mekehizeǥà is menge langyew su ebirtu is baley ku para kandan.

³³Wazè ku ieles is menge salè ku iring te ebeelan te zuma.

³⁴Wazà a mebpereremek dà wey med-eles tenged te kegkahandek te egkeǥiyen te menge etew.

³⁵“Emun duen pezem ebpemineg kedì! Guntaan, andam a he ebpirma te kemetuuzan he wazè ku salà. Emun duen igkesumbunga kedì te Mekeǥeǥehem he Megbevayà, egkesuat a he keǥiya zin kedì, ne emun kenà ne isurat din.

³⁶Su ibpikit ku heini ziyà te pemenayen etawa ziyà te ulu ku he iring te kuruna su ibpeehè ku he andam a he ed-etuvang kayi.

³⁷Egkeǥiyan ku is Megbevayà te langun he ebeelan ku. Ed-etuvang a ziyà te kandin he iring te pengulu he wazà meeled.

³⁸“Emun mezaat is kegemita ku te tanè ku etawa midtakew ku heini ziyà te zuma,

³⁹etawa mibeǥayan ku te mezaat he ǥehinawa is nemenerebahu ziyà te tanè ku su migkuwa ku is menge abut dan he wazè ku sikandan beyazi,

⁴⁰ne zeyzey ke iyan edtuvù diyà te tanè ku is dezeisey he kayu wey menge sagbet ne kenà iyan is trigu wey barli.” Kayi metapus is menge lalag ni Job.