Job 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne mid-engkezan en si Job te edtavak duen te tetelu he menge emiǥu zin, su midhitindeǥan man ni Job he wazè din salà.

²Ne zutun, duen sevaha he etew he iyan ngazan din si Elihu. Anak sikandin ni Barakel he tig-Buz he kevuwazan te pemilya ni Ram. Nepeukan din si Job su wazà besula ni Job is keugelingen din, kekenà, iyan mibasul zin is Megbevayà.

³Nepeukan din daan sikan is tetelu he emiǥu ni Job su kenè dan igkepeletew he nekesalà si Job ne nekeletew hinuun he iyan nekesalà is Megbevayà.

⁴Midtaǥad si Elihu ke ebpekepasad he egkaǥi sikandan is langun ne human din egkeǥiyi si Job, su geina te meǥurang sikandan kandin.

⁵Ne hein neehè din he wazè en egkekaǥi zuen te tetelu, ne utew sikandin nepauk.

⁶Umbe, migkaǥi sikandin te, “Batè e pa ne meǥurang kew en mulà, umbe ebpeneǥana a he egkaǥi. Wazà a mebpeǥaruǥaru he egkaǥi ziyà te keniyu te netuenan ku.

⁷Su neisip ku he iyan kew ereg he ebpenurù, su meǥurang kew en ne zekelè en is netuenan niw.

⁸Piru iyan heini tutuu: Is mulin-ulin te Mekeǥeǥehem he Megbevayà he imbeǥey zin diyà te etew, iyan ebeǥey kandin te kedsavut.

⁹Is kegkeǥurang ne kenà gerentiya he is sevaha he etew uluwanen wey metau te hustu.

¹⁰Umbe, pemineǥa a keniyu. Egkeǥiyen ku is netuenan ku.

¹¹Midtaǥad a hein ed-isip-isip kew pa ke hengkey is ereg he egkeǥiyen niw. Mibpemineg ku is menge ketezengan niw.

¹²Mibpurungan ku sikiyu pemineǥa, piru wazà minsan sevaha keniyu he nekepeletew he nekesalà si Job; wazè niw metavak is menge ketezengan din.

¹³Kenè kew kaǥi te, ‘Nesavut dey he edhuna sikandin he metau kenami. Iyan en ibpetavak kandin is Megbevayà, ne kenà iyan is etew.’

¹⁴Emun iyan a edlelisen ni Job, ne kenè ku sikandin edtevaken te iring te keniyu he kedtavak.

¹⁵Guntaan nekepereremek kew ne wazè niw en egkekaǥi.

¹⁶Kinahanglan pe be he edtaǥad a, te ǥuntaan mibpereremek kew en ne wazè niw en igketavak?

¹⁷Duen daan egkeǥiyen ku; egkeǥiyen ku is netuenan ku.

¹⁸Mezakel iyan is egkekaǥi ku, ne henduen be te kenè en heini egkeeǥen.

¹⁹Iring a te veǥu he lundis he teleǥuey te vinu he nepurung mepenù he henduen be te ebensì en.

²⁰Ne kinahanglan he egkaǥi a su wey meterini is taǥù ku.

²¹Wazà edepiǥan ku wey wazè ku edigdiǥen.

²²Wazà a melayam te kedigdig. Ne emun ebeelan ku heini, ne segugunà a edsiluti te Megbevayà he iyan mibaal kedì.”