Job 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Hapit e en ebpatey; henduen be te egkevidtew en is gehinawa ku. Andam en he edawat kedì is penlevengà.

²Edliǥuyan a te menge mesudì. Utew inmezaat te ǥehinawa ku is kedsudia zan kedì.

³He Megbevayà, tevangi a wey a melibri. Wazè en duma he ebpeketavang kedì, kekenà, iyan ke zà.

⁴Midsabpeng nu is ked-isip-isip te menge emiǥu ku su wey zan kenà mekesavut. Umbe kenè nu ituǥut he ebpekezaag dan kayi te kedsumbunga zan kedì.

⁵Iring sikandan te etew he edluib te menge emiǥu zin su wey mekeselapì, he iyan egkehimu he hinungdan te kebpekebmereǥen te menge anak din.

⁶“Midhimu a te Megbevayà he meengiti te menge etew, ne ed-ilevan e zan diyà te vuked.

⁷Mibmerusirem en is ked-ehè ku tenged te kegkeseeng ku, ne henduen be te neiring en te ǥimukud is lawa ku.

⁸Is menge etew he mid-isip dan he metazeng sikandan neinuinu kayi te nehitavù kedì. Ed-isipen e zan he lalung he iring te etew he wazà medsarig te Megbevayà.

⁹Iyan isip dan he melig-en wey edsigudu ed-iseg is kelig-en te kebpengungubpaan te etew he metazeng.

¹⁰Piru ebpeuman a ebpesusi kandan. Ne siguradu egkesavut ku zutun te kedsusi zan he wazà minsan sevaha kandan he nekesavut.

¹¹Meǥaan en egketapus is menge andew ku. Wazà medlampus is menge pelanu wey menge tinguhè ku.

¹²Piru migkaǥi sikandan te kela ke mebmeupiya zed is kebpekesavuk ku te huziyan he timpu. Ke sikandan te, ‘Divaluy te merusirem ne zuen kerayag he ebpekeuma.’

¹³Emun ebperateng a, ne iyan ebperetengen ku is kebpekeubpè ku ziyà te lugar te menge minatey. Egkesuatan ku en te ebpelastar is hizeǥaan ku keniyan te merusirem he lugar.

¹⁴Is leveng ed-isipen ku he amey ku, ne is menge tagkey he egketket kedì, ed-isipen ku he iney ku wey menge etevey ku.

¹⁵Duen ku pe be egkeperateng? Hentei is ebpekekaǥi he zuen ku pa egkeperateng?

¹⁶Is perateng ku eduma kediey ziyà te lugar te menge minatey. Ebpezumehè key ziyà te zizalem te tanà.”