Job 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Impelaus ni Job is menge lalag din te,

²“Duen ibpenangdù ku ziyà te uuyag wey Mekeǥeǥehem he Megbevayà. Minsan wazà sikandin mebeǥey kedì te hustu he kukuman wey minsan mibpeǥezam kedì te mesakit he ǥehinawa,

³iyan penangdù ku is: mintras egeǥehinawa e pa, ne idtuǥut pa kedì te Megbevayà is kegkeuyag-uyag,

⁴ne kenà a egkaǥi te mezaat wey kenà a edtarùtarù.

⁵Kenà a ebpengumbenar keniyu. Idliet ku te egkaǥi he wazè ku salà taman te ebpatey a.

⁶Edtindeǥan ku he metazeng a, ne kenè ku heini ed-engkezan. Mintras uuyag e pa ne kenè ku ed-isipen he mekesesalà a.

⁷“Deyzey ke edsilutan te Megbevayà is mibpekigkuntada kedì te silut he ereg he idsilut te lalung he menge etew.

⁸Ebmenmenuwen te Megbevayà te kegkehewi a zin te untung te etew he wazà medtuu kandin?

⁹Ebpemineg be is Megbevayà te kebuyù din te tavang emun egkeumahan sikandin te kemereǥenan?

¹⁰Igkelipey zin be vuwa is Mekeǥeǥehem he Megbevayà? Ebpengumew-umew ve sikandin te Megbevayà seled te langun he timpu?

¹¹“Ebpenuruen ku sikiyu mehitenged te ǥehem te Mekeǥeǥehem he Megbevayà. Egkeǥiyen ku ziyà te keniyu is menge paaǥi zin.

¹²Piru sikiyu is langun netau kayi. Ne maan is migkaǥi kew kayi te kediey te wazè din pulus?

¹³“Iyan heini egkeulaula he inteǥana te Megbevayà he Mekeǥeǥehem diyà te lalung wey mesipala he etew.

¹⁴Is lalung he etew, minsan mezakel is menge anak din, is duma kandan, ebpatey te tebek etawa vitil.

¹⁵Is egkesamà kandan he uuyag ne ebpatey te zaru, ne wazà edlalew mehitenged te kebpatey zan, minsan is menge esawa zan.

¹⁶“Minsan edtiǥum is lalung he etew te zekelà he selapì wey visti,

¹⁷kenà heini ebpulus diyà te kandin. Is metazeng wey wazà mekesalà he menge etew iyan ebpekesul-ub te visti te lalung he etew, ne ebehinen dan is selapì din.

¹⁸Is baley he ebengunen din iring keǥevù te valey te kelelawà etawa vuǥawan diyà te pemuleey.

¹⁹Ebpurung edrerey-as is sepian, piru kegkepukew zin ne egkahanew en is langun he ketiǥeyunan din.

²⁰Ebpekeuma ziyà te kandin is kegkahandek he iring te zalem he ed-anud kandin ke mezukilem.

²¹Idlayap sikandin te keramag he ebpuun diyà te edsilaan, ne egkaawà sikandin diyà te ubpeey zin.

²²Henduen be te kenè en heini egkehizu he edhiyup kandin te ebpenigudu para mekelingkawas.

²³Ebpelakpak wey ebpemunsuwit te kedsudia kandin su naawà sikandin diyà te ubpeey zin.