Génesis 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Adán e-ome-Evaʼse-gochagu, Eva gurgin-nika gunonikid. Evaʼga susugwa uklenonikid, Caínʼye onugsasad. Ar Eva sogded: “Bab-Jehová na e-sogedba susugwa anga uksad.”

²Geb a-sorba, Evaʼga Abel uklenonikid, Caín-e-urba. Abel sibad-wawaad-edarbedga gusad. Caínʼdi sapurba-arbaed-dulega gusad.

³Ibagan-nasad-sorbali, Caín na e-ibmar-sanmaksamalad wesad. Geb Bab-Jehováʼga-ukega senonikid.

⁴Abelʼdi na Bab-Jehováʼse sibad-wawaad-gebegwalulesmalad senonimogad, geb oburgwisad. A-sibad-wawaad-e-gwallu ogumakar Bab-Jehováʼga uksad. Bab-Jehová Abel-yeer-daksad, degine, ega-ibmar-uksad yeer daksabalid.

⁵Bab-Jehová Caín-yeer-daksasulid, degine, ega-ibmar-senonikid amba yeer daksasurbalid. A-ulale, Caín bela-bela sae-itoalid. E-wagar-daklegedi magar-dakleged, nue sae-itoged.

⁶Geb degine, Bab-Jehová Caínʼga sogded: “¿Ibiga sae be itoge? ¿Ibiga be-wagar urwakwaa daklege?

⁷Ar ibmar-nued be imakele, ¿an be-abingassurmogar be insae? Eye, an be-abingasmogale. Ar emigindi, be ibmar-nued imaksursoggu, isgued begi-aibinega guakwaa be-edarbediid. Degi-inigwele, sunna isguedgi be obined.”

⁸Ibagwengi, Caín e-urbaga sokalid, sapurba wis-garmakdii sanamarye. Geb ebo-sapurba-gudiidgi, Caín e-urba-Abel-sarsosad, geb oburgwisad.

⁹Geb degine, Bab-Jehová Caínʼse egichided: —¿Bia be-urba-Abel nade? Caín, Bab-Jehová-abin sogded: —An wissuli. ¿Ar ande an-urba-edarbedsi?

¹⁰Bab-Jehová Caínʼga sogded: —Ar wede, ¿ibi be imaksa? Be-urba-ablis be eosad. Emide, a anga sogeyob an itoged: ‘Anga be igar-naboye.’

¹¹Be be-urba oburgwisadba, napa be-urba-e-ablis gobsad. A-ulale, be ukabsalessunnad.

¹²A-ular, be nainugi arbaoen-inigwele, bega ibmar sanmakosulid. Be we-napneggi dule-wakindiiyob negsuli gudii guoed.

¹³Geb degine, Caín, Bab-Jehová-abin sogded: —Weyob sabsur be an-odurdakele, gwen guo an itosulid.

¹⁴Ar emi-ibagi, nainugi-arbaedgi be an-ononaisoggu, we-napneggi garmakdii, dikasur begi bangus gudii, dule-wakindiiyob negsuli, obunnoged-sate an gudii gudoed. Degisoggu, doa-dule an-dakalile, an-oburgoed.

¹⁵Bab-Jehová Caín-abin sogded: —Suli, deyob guosuli. Ar dule be-oburgwele, we-dule-be-oburgwisad ilagugle (7) bur bule sabsur-odurdaklegoed. Geb degine, Bab-Jehová Caínʼgi wilub nasiksad, adi, dule-gwensak Caín-dakalile, melle oburgwegar.

¹⁶Caín Bab-Jehováʼgi bangudgu, Nod-yargi megidapid. Nod-yarde Edén-dad-nakwedsik naid.

¹⁷Caín e-omese-gochagu, e-ome gurgin-nika gunonikid. Machigwa-ega-uklesad, Enocʼye onugsasad. Caín, neggwebur urbenonikid. E-machi-nugba, we-neggwebur Enocʼye onugsanonikid.

¹⁸Enoc, Irad-e-babad. Iradʼdi, Mehujael-e-babad. Mehujaelʼdi, Metusael-e-babad. Metusaelʼdi, Lamec-e-babmogad.

¹⁹Lamecʼdi ome-warbo-nikusad: Wargwen Adaʼye nugad, baiddi Zilaʼye nugad.

²⁰Ada machi-nikusad, Jabalʼye onugsasad. Jabal-inse dordoneg-sobed onoded. A-inse ibmar-durgan-akwedgi-arbaed onodbalid.

²¹Jabal urba nikusad, Jubalʼye nugad. Jubal-inse gar-arpa-ogoled onoded. A-inse gammu-ogoled onodbalid.

²²Zilaʼdi machigwa-nikunonimogad. Tubal-Caínʼye a-machigwa onugsasad. Tubal-Caín-inse esgoro-gordikidgi-ibmar-sobed onoded, degi, esgorogi-ibmar-sobed onodbalid. Tubal-Caín bun-wargwen nikusad. E-bunde, Naamaʼye nugad.

²³Ibagwengi, Lamec e-omemarga sokalid: “Ada, Zila, an bemarga ibmar-sogoedi, nue be an-itomalo: Dule naibi-an-imaksad-ular, an oburgwisad. Machigwa an-sarsosad-ular, an oburgwisad.

²⁴Ar dule Caín-oburgwisale, we-dule ilagugle (7) buged-mai, sabsur-odurdaklegoye sogleged. Ar dule an-oburgwisardi, we-dule an-oburgwisad-ular, dulapaa-gakambe-gakagugle (77), bur bule sabsur-odurdaklegergebed.”

²⁵Adán e-omese gochabargu, Eva susugwa-nikunonikid. Geb Eva sogded: “Caín, e-urba-Abel-oburgwissoggu, Bab-Dummad susugwa anga Abel-anar uknonikid.” A-ular, Eva a-susugwa Setʼye onugsasad.

²⁶Set machigwa-nikusmogad, Enósʼye onugsasad. A-ibagan-akar, dulemar Bab-Jehováʼse gotemalad.